Thursday, March 13, 2008

لما تقوم الثورة .... بلاش نموت بعض

هذا الكلام قد لا يحمل أي معني أو قيمة الآن لأنه مبني على افتراض ما سيحدث في المستقبل، ولكن كل الدلائل تشير إلى حدوثه. عشان كده، أنا لازم أقوله لأني لم تعد لدي القدرة على كتمانه ... ولأنه سيكون ذي فائدة وقتها... فوقتها تذكروا هذه المقالة .. أرجوكم تذكروها ................



نخش بقي في الموضوع، بتتفرجوا على النشرة؟ وبتقروا جرايد؟ أنا أقصد هل أنتم على علم بما يحدث في العالم ؟! لأن ما يحدث كارثة ... كل يوم، دولة جديدة تضاف على القائمة السوداء. هذه القائمة، التي تحوي كل الدول المضطربة داخليا من جراء الصراعات الأهلية والقبلية أو الصراعات مع أمريكا أو مع دولة أخري على حدودها ... العراق ... لبنان ... باكستان .. الهند ... كينيا ... السودان ... أفغانستان ... الجزائر ... فلسطين ... ايران ..... وهذه هي الدول التي أعرفها، وبالتأكيد هناك دولا أخرى لا أعرف عنها شيئا ولكنها في القائمة أيضا، ولن تختلف كثيرا عن الدول المذكورة فستجد فيها اثنين يحملان في خانة الجنسية نفس الكلمة ويقتتلان.

اغتيالات .. معارك دامية .. مشاحنات ... وأمريكا تدعو القبائل المتنازعة لمائدة الحوار ثم فشل المحاورات الثنائية والخماسية والمليونية ثم قوات حفظ السلام التابعة للأمم المتحدة ثم أمريكا تتدخل بجيوشها للقضاء على الارهاب ... وهوب انسي البلد ديه خلاص ...

كينيا .. عملوا انتخابات فاز بها شخص، فيه ناس من الشعب مش عاجبهم الرئيس المنتخب، معارضيه يعني ... وبمجرد اعلان النتيجة تتحول البلد إلى ساحة معركة وناس تموت وناس بتقتل في بعضها ...... فلسطين، وبدون مناقشة من هو الأحق بالحكم، ولكن يكفي أن فلسطيني يدفع مالا ويبذل جهدا لقتل فلسطيني آخر ..... في باكستان، اغتليت بوتو، وبغض النظر كذلك عنها شخصيا وعن توجهاتها السياسية والفكرية ما يهمنا، هو أنهم قتلوها واقتتل الشعب ... في العراق، حكومة لوحدها وشعب لوحده وناس بتتخطف وناس بتتقتل وناس بتفجر نفسها وهم كلهم في النهاية عراقيين. وقس على هذا باقي الأمثلة التي لا تنتهي وتتجدد كل يوم.

أظن الصورة قد وضحت الآن ... الفكرة يا جدعان .. ان البلد اللي احنا عايشين فيها ديه، مصر يعني،في وقت أصبح قريبا، ويقترب أكثر، ستحدث به ثورة أو انقلاب، مبارك يموت وينصبوا جمال ملكا أقصد حاكما على مصر ووقتها الناس مش هتسكت (المفروض بقي)، أو ربما الأسعار تستمر في التزايد بدون توقف فالناس مش هتلاقي تاكل بجد بقي فيعملوا مظاهرات، شيئا ما سيحدث وسيملأ البلد مظاهرات واحتجاجات ... وبقدر سعادتي بالثورة، بقدر ما يملأني الرعب خوفا من أن نتحول، لنصبح مثالا آخر مثل الأمثلة التي ذكرتها، وننضم للقائمة السوداء بصراع قبلي آخر والناس بتقتل بعضها والمصريين منقسمين كل واحد بيفكر في نفسه وبيكره التاني.



الثورة آتية لا محالة، والاضطرابات هتحصل هتحصل .. لا مفر .. بس ساعة ما ده يحصل يا بشر اوعوا تكرهوا بعض .. اوعوا تقتلوا بعض .. اوعوا مصري يرفع سلاحه على مصري تاني مهما حصل ومهما كان ... ساعتها ابقوا افتكروا ان البلد ديه بتاعتنا وان ا حنا اللي عملنا الثورة ديه عشان بنحب البلد أوي وعايزينها أحسن بلد في الدنيا.

الإختلاف واجب، وضرورة حتمية، أكيد لن نتفق جميعنا على نفس المبادئ. ولكن يمكننا أن نتفق على مبدأ واحد، هو أننا قمنا بالثورة حتى نتخلص من الفساد وونتخلص من الدكتاتورية ونستعيد حقوقنا المسلوبة، ونتفق على أننا جميعا نريد الحياة في مصر الأمان، وليس مصر الخوف والاضطراب.

ساعتها افتكروا ان انتم لو حاربتوا بعض هتدخلوا بلاد تانية في بلدنا وهنبقي بلد مافيهوش أمان ؟! يرضيكوا ؟!! أكيد لأ ... أنا عشمي كبير في طيبة المصريين وقلوبهم اللي زي البفتة البيضا ... بس أنا بقول كده من باب التذكرة ... ماتخلوش حد في يوم من الأيام يقول علينا ما بنعرفشي نعمل حاجة وما ينفعناش ديموقراطية وما بنمشيش غير بالكرباك.

7 comments:

Anonymous said...

ياريت....... بس وقتها هيكون في ناس في النص كل همها انها توقع بيت الناس وبعضها يعني مصالح مشتركة مع جهات اخري او كره للبلد دي واهلها او حلاوة روح من الناس اللي ثوراة قامت ضدهم
بس بردو مفيش حاجة بعيد علي ربنا
يارب الثورة تيجي والناس كلها تكون مجتمعه عليها ومحدش يقتل حد

MR.TITO said...

هو فعلا الثورة جايه واحتمال فى عهد مبارك كمان قبل مايموت لان فى ناس فعلا مش لاقية تاكل فى الاسعار الرهيبة دى والظروف المنيلة دى ...
بس مشكلتنا اننا كل واحد بيقول وانا مالى خلينى جنب الحيط ، هى كلمتى انا هى اللى هتصلح الكون ، بس ااااه كلمتك هى اللى هتصلح الكون لما نجمع بعض ... بس الواحد حاسس باحساس كويس لان الناس بدات تتحرك معتش فيها سكوت ، بقى كل يوم فى اعتصام فى مكان او مظاهرة فى مكان وده كويس الناس بدات تتحرك وياريت كلنا نتحرك بقى ...

Ahmed Mostafa said...

الثورة آتية لا محالة

اشك
هو ممكن زي ما قال الاستاذ تيتو الناس تتحرك ساعة لما ماتلقيش تاكل
واول ما يلاقو ياكلو هنرجع تاني
لو حتى جابولنا اولمرت يحكومنا مش جمال مبارك

Ehab said...

هاهاها
ثوره ايه ؟؟؟
و مين اللي هيعملها ؟؟؟
وليه ؟؟
يا بنتي كل واحد عايز يربي عياله
واللي ماعندوش بيلم فلوس عشا ن يعرف يصرف عليهم و علي مراته
واللي مش متجوز ... بيلم فلوس عشان يتجوز
و تقوللي ثوره
فوقي
الشباب دلوقتي كل همه البنات و الحشيش و الموبايلات و الكوره
و عايزه ثوره .... ممكن ثوره حشيش مثلا ....
تنفع الثوره دي ؟؟؟؟

Mostafa said...

bass hea t2oom bass ...we7na sa7ee7 blash nmawet b3d bass feh nas lazm nmwtha bsra7a w ella tb2a el swra mlhash lzma mel awl........gmda kal3ada ya somaia

Abu Shahin said...

يا نهار ابيض
ايه الكلام اللى انتى كاتباه ده يا سمية
ثورة ايه وكلام فاضى ايه
ماكنتش اتوقع ان الكلام ده يطلع منك
معقول يا سمية معقول
بقى مش شايفه النعيم والرغد والسعادة التى يرفل فيها المصريون هذه الايام من فصل انتاج الخبز عن التوزيع وايصاله للمنازل والطفرة التكنولوجية فى استخراج شهادات الميلاد وكل ده وتقولى لى ثورة

أهى كده المدونة هاتقلب عيش وحلاوة بجد
أنا ماليش دعوة يا جدعان

Anonymous said...

ممممممممممممم

ايه البوست المستقبلي ده ؟
طيب , بما إن تفكيرك عجبني صراحة فهأحب أوضحلك نقطتين من وجهة نظري :
-ليه مش بيكونوا يجوعوا الشعب دلوقتي عشان لما يمسك عمونا جمال يزقطط الشعب ؟
بنظرة أخرى ..
الشعب مش موافق على جمال .. معترض عليه و السياسة العليا عارفة كده كويس .. طيب يعملوا ايه ؟
يبقوا يجوعوا الشعب و يغلوا الأسعار على الآخر بالتدريج ..
بحيث لما يمسك جمال الحكم يقوم باسطها على الشعب من مبدأ : ابسطها يا باسط ..
فالشعب يرضى بيه ..
وجهة نظر ..

النقطة التانية ..
أنا انتخبت الرئيس حسني مبارك فيا لانتخابات الأخيرة .. رغم اني مش بحب سياسته الداخلية ..بس انتخبته عشان كان أفضل المترشحين أولا , و عشان كان أقدر مرشح يقدر يخلي مصر مش تحتل في وسط البلاوي السودا اللي انتي عارفاها كويس ..
لما ييجي جمال يترشح للحكم أنا هأبصله مش إنه جمال ابن السيد مبارك الرئيس الحالي .. هأبصله على أنه جمال مبارك المرشح للرئاسة كشخص من حقه يترشح .. هاشوف بنرامجه الانتخابيو اشوف برامج الناس التانية .. والله لو كان أفضل منهم يبقى هأختاره و لأضرب بكلمة التوريث عرض الحائط .. لو غير كده مش هأختاره .. ولو مسك الحكم مش هأزعل لأني عملت دوري السياسي كمواطن واحد ..

بالنسبة لمشكلة الثورات و الذي منه , فالناس للأسف بتمشيي بمبدأ مع علي كرها في معاوية وليس حبا في علي , و ده أكتر مبدأ خطر و غلط في التاريخ السياسي المصري لو تم بجد ..
الحركات الحالية المناهضة لسياسة التوريث زي ما بيقولوا , يا ترى هم سمعوا برنامج جمال ايه ؟ سمعوا برامج الناس التانية ايه ؟
اللي عايز اقوله ان احنا مش نتسرع بالحكم على حاجة احنا مش عارفينها .. ومش نخلي كرهنا لشخص يدمر البلد اللي احنا فيها .. يعني متفق معاكي في التحذير بتاع النقطة دي ..

على فكرة أنا مش بحب جمال :) بس عشان بلدي لو هو الأنسب هأختاره :) وصلت ؟

تحياتي
ومعذرة للإطالة
الساحر
رابطة العصبة الأدبية ..