Saturday, March 8, 2008

ابكو ياعرب



ابكوا يا عرب ...ابكو يا صنم
ابكوا يا شوية عجزة
ابكوا ما راحت غزة
ابكو ولا ينفع ندم
ابكوا على زمن الكرامة
ابكوا يا شوية لمامة
ابكوا ع الضمير اللي اتردم
ابكوا يا عرب ..كلنا متهم
ابكوا ع الشهيد اللي مات
ابكوا ع اليتيم اللي اتحرم
وابكوا للعدو اللي اغتنم
اللي حفر بايديه جراحنا
واحنا رضينا بالالم
والجرح رافض يلتأم
ابكوا يا عرب ...ابكو يا صنم
ابكوا.. والعنوا فينا الرمم
اللي باعونا لليهود
واللي نكسوا فينا الهمم
واللي ميعرفوش ف حياتهم
غير بس قولة نعم
شاهد علينا تاريخنا
بالورقة والقلم
شاهد على موقفنا
ومسيرنا هنتشتم
هيقولو ماكنش فيهم
لو حتى واحد محترم
ابكوا يا عرب ...ابكو يا صنم
ابكو ولا ينفع ندم
احمد افندي

Friday, March 7, 2008

أحكام مسبقة


أحكام مسبقة


.. كم هى لعينة تلك الاحكام المسبقة .. كم تسببت فى عدم خوضنا للعديد من التجارب .. كم من مرة حكمنا على أشياء وأشخاص .. وكنا مخطئين حيال ذلك .. كم من مرة حكمنا على أنفسنا بالفشل من قبل أن نخوض التجربة وكم وكم وكم .. ولكن عزيزى القارئ دعنى أركز على (كم) واحدة من الكام (كم) اللى فاتوا دول .. والكم دى هى ..... كم عرقلت الاحكام المسبقة علاقتنا بالاشخاص من حولنا؟
فكم عزيزى القارئ ( أصله عجبنى موضوع عزيزى القارئ ده ) كم عزيزى القارئ رأيت فيها شخصا لاول مرة و (طَسِيته ) حكم بانه إنسان خنيق ورخم وغتيت .. ورصيت عيوب الدنيا كلها فيه .. رغم إنه ممكن تكون العيوب دى كلها فيك أنت ومش شايفها .. فـ "أنت ترى القشة فى عين أخيك ولا ترى الخشبة فى عينك " ..و لكنك أصدرت الحكم فوريا بانه لا يستحق دخول جنتك والتعرف على شخصك المصون .. وخلاص ثبت ف مخك أنه كده .. واستبعدته من حياتك تماما ..رغم انك ممكن تكون لم تتعامل معه المعاملة الكافية للتعرف على شخصه الحقيقى.. رغم إن ممكن يكون الشخص ده ربنا بعتهولك كى يكون له دور مهم جدا بل وخطير من شأنه تغيير حياتك .
ولا يخفى عليكم إن البعض يصدر أحكامه اعتمادا على أراء أشخاص اخرين ..وإنتوا طبعا مش مستنيين أقولكم إن ده قمه العته ؛ وبهذا تكون عزيزى القارئ قد أضعت على نفسك فرصة التعرف على .. فكر جديد - ولا بلاش فكر جديد دى - خليها ..شخص جديد ..و خبرة جديدة .. لان كل شخص .. أى شخص .. حين تعرفك عليه ستكتسب حتما شيئا جديدا .
وعلى النقيض تماما .. فكم من مرة بمجرد رؤيتك لشخص ..بُهِرت به .. بهرت بجماله أو ربما بشخصيته القوية .. أو ربما بشجاعته أو لباقته ف الكلام.
قومت حضرتك ما كدبتش خبر .. قومت مركب له جناحين ولمبة نيون .. ومش أى جناحين .. دول جناحين ( ألترا ) ومش أى لمبة دى لمبة توشيبا العربى فى الموسكى تلتميت وات .. وتعاملت معه من تلك الزاوية فهو ملاك لا يخطئ .. ترى كل ما يفعله جميلا و إن كان قبيحا .. تحب من يمدحه وتنهر بشده من ينتقده ؛ وتصبح تتتبعه وتقتفى أثره وتترصد أخباره بل تجد نفسك متلبسا - سعيدا - بطريقة كلامك المشابهه لطريقة كلامه ..تقيس الناس جميعا بالنسبة إليه ..فتجد الناس جميعها مسوخ بجواره .. وانت برفقته تجد أجمل لحظات حياتك ..وتنتظر بفارغ الصبر مقابلته مرة أخرى .. ويا سلام بقى لو كان الشخص ده مخالف ليك ف الجنس .. يا سلااااااااااام قد تتحول لقصة حب كبيرة من طرف تالت إنما ايه اخر كوميديا ............تستمر تلك الألفة لفترة.
ولكن فجأة .......... تاتاتاتاتا ........يصدمك ذات مرة تصرفه فى موقف ما .. فتصيح مسائلا نفسك فى عنف ..كيف يفعل هكذا .. ليس هو الذى من الممكن أن يتصرف كذلك .. تصطدم صدمة كبيرة من جراء تصرفه مثل البشر.. تصرف بشرى عادى قد لا يكون مخطئا فيه .. ولكنك أنت من رسمته ملاكا فى ذهنك .. ويصبح هذا الملاك البرئ أبو قلب طيب قوى .......... يصبح وغدا نقلا عن ترجمة لـ
MBC2
حينها ستسرع الى الجناحين اللذين علقتاهما فى الماضى ........ لا تكتفى بانزالهم فقط .. ولكن تقوم ب(نتفهم) ريشة ريشة وحتة حتة .. وتذهب لللمبة لتدغدغها فوق رأسه وتطلع كل فولت م الـ تلتمية على جتته .. حينها ستفقد الايمان باشياء كثيرة مثل الشرف والامانة والصدق العدل والحب.. ولم لا فقد ألبست كل تلك الصفات لذلك الشخص .. لتصبح أغنيتك المفضلة حينئذ "يا ما ف زماننا قلوب ..رسماها أعمارنا ..زى النجوم (خوازيق ) على ضل شباكنا ".
لذا عزيزى القارئ ..لا تنتقص من قدر أحد أى أحد .. ولا تُجمل احد وتحمله ما لا طاقه له به ..واعلم جيدا أنك تعامل بشر ..ليسوا ملائكة ولا شياطين ..فى دنيا البشر؛لا مخلوقات دونية ولا مخلوقات فوقية .. وتذكر دائما حرف النون اللى فى كلمة بنتولد.. " بنتولد ..طاهرين .. بنتولد .. باكييين .. بنتولد .. كما زرعة خضرة ف أرض طين ".. وتذكر أيضا الوصية الخالدة " دور ع الناس ف قلوب الناس هاتلاقى الخير والخير ف الناس " وتذكر دائما اننا جميعا مخلوقات الله .. خلقنا جميعا لهدف واحد .. ونحن أمام الله لا فرق بين عربى وأعجمى إلا بالتقوى . ولكن ..وفى خضم ذلك كله ..تذكر أيضا أنه .. " ليس سوى أن تريد .. أنت فارس هذا الزمان الوحيد .. وسواك المسوخ
"


أحمد شاهين

Thursday, March 6, 2008

اهى عييييييييشه والسلام

طبعا طبعا كلنا بنمشي فى الشارع وبنركب عربيات وبنعيش فى شقق... زى كل الناس طبعا
انما عندنا فى بلدنا المحروسه-اللى الاجانب بقو بيخافو يهوبو ناحيت القاهره من كتر التلوث-لما تيجى تمشي فى الشارع تبقى مش عارف تلاحق عليها منين ولا منين من الدوشه وصوت الكلاكسات اللى تطرش ولا من مناظر الناس اللى بتجيب اكتئاب يعنى راجل ومراته وعياله قاعدين بيحرسوا ارض ولا حاجه الراجل ما شاء الله عنده بتاع سبع عيال وقاعد يضرب فيهم هما وامهم والعيال عمالين يصوتوا وهو شغال لحد ما يتعب... تمشي شويه تشوف عيل صغير من اطفال الشوارع نايم عالارض ومغطى راسه بايده وساعات بيبقي نايم كده والدنيا بتمطر عليه... وتعدى من جنب صفيحه زباله ويجيلك اختناق وضيق تنفس من ريحت الزباله اللى تحس انهم بقالهم سنين مشالوهاش-وممكن فى نفس اللحظه تسمعهم فى الراديو بيتكلمو عن الشركه الاجنبيه اللى احنا بندفعلها ملايين عشان تيجى تاخد من الناس فلوس وتلم الزباله طاب لزمتها ايه نديهم ملايين اقولكو انا عشان المعدات بتاعت لم الزباله المقشه والعربيه يعنى-
وممكن تكون راكب عربيه- مكروباص مثلا بما ان معظم الناس بتركب مكروباصات- قاعد كده فى امان ربنا وطبعا الدنيا زحمه اوى بقالك ساعه واقف فى نفس المكان والسواق مشغل اغانى غريبه والشريط زى ما يكون سافف وانت قاعد باصص من الشباك كده تلاقي العربيه اللى واقفه ادامك اول ما الاشاره تفتح تنطلق وينطلق وراها دخان اسود مهبب يخلايك تفضل تكح وكانك هتموت وممكن مثلا لما تبقا قاعد فجأه تلاقي الناس هجمت عليك عشان يركبو -معزورين برضو مش عارفين يروحو... بس انت زنبك ايه-وتلاقي المطروباص اللى حمولته 12 نفر بقدره قادر شايل 20 نفر والكتمه و الجو مع ريحت العوادم مع صوت الشريط السافف... يارب نوصل بـــــقا
ممكن بردو تبقا قاعد فى بيتك –لو كنت قدرت توصل للرفاهيه ديه يعنى – وتلاقي بقا الميه قاطعه تستناها تيجى ساعه التانيه التالته وبعدين تضطر تنزل تملا ميه من القهوه وعادى اوى لما الميه تقطع يومين تلاته ايه المشكله يعنى – مش كفايه انك عندك ميه اساسا- ممكن كمان المجارى تطفح ادام بيتكو وتفضل تعانى من الريحه والارف والناموس و خد عندك بقا حجات كتير
وهتعرف ان كل اللى انت شايفه ده مجرد خيالك المريض هو اللى صورهولك لما تسمع الاغنيه بتاعت لؤى بتاعت الحزب الوطنى....... ابقو اسمعوها

Tuesday, March 4, 2008

غزه.....تانى


سامحونى ياهل غزه اللى غارقه ف الضلام


سامحوا الناس اللى عاجزه يفكوا عقده اللجام


و البيانات اللى جاهزه


و الاشاوس و الجهابذه


اللى حلوين ف الكلام


والخطاوى اللى غارزه ف رمل سينا بالسلام


و اللى واقف ع الحدود


مانع القوت و الوقود


بيقولكوا سبوا الخلود


فوق الكراسى


سبوا القرود و الطبالين


سبوا اللى عامل نفسه ناسى


انه حيعود تانى طين


سبوا الفيران


اللى ماتت م الخوف ف الجحور


سبوا اللى قال


الارض ماتت مش ممكن تثور


سبوا اللى شايف النسور


و لسه بيربى الحمام


سبوا اللى مانع الكلام


سبوا اللى نفسه الناس تنام


سبوا اللى قال شدوا الحزام


و نايم فوق ريش النعام


و ابقوا قولوا للإمام


قبل اما تدعى ع اليهود


ادعى على ولاد الحرام



مصطفى

ماليش نفس

كان نفسي أنزل بوست حلوة وجميلة
أتكلم فيها عن الحياة والناس والمجتمع
أو بوست أحكي فيها موقف من مواقفي الشخصية
أو أنشر قصيدة أحبها
بس اتكسفت
وقلت يعني تبقي الناس بتموت في غزة وأنا بكتب عن حاجة عادية
قلت طيب هكتب الموضوع عن غزة وهقعد أشتم في اليهود وحكام العرب اللي ضيعونا وأدعي عليهم
وأدعو الناس للوحدة
ويمكن اجيب فيديوهات من اليوتيوب وصور للأطفال اللي ماتو ومنظر البيوت اللي اتدمرت بعد القصف
بس اتكسفت برده
وبعدين يعني ... ما احنا كل مرة بنعمل كده ومافيش حاجة بتتغير
فقررت اني مش هنزل حاجة مش هنزل لو اعتبرنا ده مجرد خواطر
ونقدر نقول ان اللا بوست ده تضامنا مع غزة وبقولهم سامحوني انا مش قادرة أعمل أي حاجة