Tuesday, January 29, 2008

الواد كان عنده حق.... اوعوا تقولولوه لأ


قاعدين ع الأرض ...حوالينا حاجات بالطول و العرض ....بنقول بسميلا معانا لا مؤاخذة حلاوة و عيش ....هنغمس حلو حياتنا بربع رغيف ملسوع ...و نعيش

اسماء ... zamzoom

مصر كلها بتاكل عيش و حلاوة... يعنى كلنا عايشيين فى سجن كبير و مع اننا بناكل عيش وحلاوة...انما العيشة بقت شبه خالية من الحلاوة و نقدر نقول بقت مرة خلاصو ربنا يستر علينا جميعنا ...و بنحبك يا ريس

معتز ...super maz

رغيف العيش..الجميل الصغنن ده..اللي كل ما يفوت عليه الزمن يصغر....اللي شايل همه الغلابة..هو ده ورا كل المآسي اللي عايشنها.."لقمة العيش"...اما الحلاوة..اللي طعمها حلو دي..اللي نفسك تدوقها ومش عارف تطولها..وهتفضل طول عمرك تدوّر عليها ...هي برده ورا كل المآسي اللي عايشنها..فبين العيش والحلاوة..وبين الحاجة اليومية والحياة الحالمة الصافية...كانت وكنّا بلوج"عيش وحلاوة"...احلى بلوج

احمد ... modhesh afandy

البلد دي ماينفعش ناكل فيها عيش .. البلد دي لو كلت فيها حاجة هتبقي عيش وحلاوة

مصطفي.... mostafa

ساعات بتطلب حلاوة اديها مشية علي الكورنيش... وساعات بكون متشعبط بجري علي لقمة عيش ولما بشوف الباشا جايبلي حتة بغاشة بعرف انها طلبت حلاوة مدفوسة في عيش

مي... azmeralda

العيش الحاف لوحده طعمه عامل زي الليلة الضلما في عز طوبة، والحلاوة لوحدها طعمها عامل زي الشمس الحارقة اللي بتلسع في عز بؤونة ... اخلطهم على بعض كده يطلع ساندوتش حلاوة طعمه عامل زي ساعة العصر في الخريف ... والحكاوي بقي مابتحلاش غير في ساعة العصر ديه ... لذلك أهلا بيكو على دكتنا في ساعة العصر ... وكل واحد هياخد سندوتش حلاوة هدية عشان نبقي كلنا مع بعض عيش وحلاوة

سمية ... somaia

مش احنا اللى بنمشى جنب الحيطة عشان ناكل عيش .. إحنا بنمشى ف وسط الشارع .. عكس السير .. عشان ناكل .. عيش ..........وحلاوة

أحمد شاهين