Thursday, February 7, 2008

قصص من سطر واحد

قصص من سطر واحد


· قلب كوب الشاي بالنعناع ... ووضع يديه علي زجاج الكوب يستدفئ به ... جلس علي كرسيه في البلكونة ... يرشف الشاي ... وينظر للقمر ... وينتظر ................


·
كان مستندا إلى جدار المترو حين رآها ... رأي في عينيها حلمه القديم ... وفي ابتسامتها مستقبله ... تردد ... هل يكلمها؟؟ ... وحين أخذ قراره ... كانت تنزل والباب يغلق وراءها ....


·
نظر إلى الفاترينة ... أعجبه جدا ذلك القميص الأزرق ... نظر إلى سعره ... تحسس جيبه ... وانصرف


·
تحتضن طفلها في قوة ... تهرول في الشارع ... صوت فرملة سيارة ... دماء علي الأسفلت ... الطفل يبكي ... ولا أحد يحتضنه .


·
الطريق هادئ ... محفوف بالشجر اللرائع ... الليل ... القمر ... النجوم ... وهو يسير هناك ... لكنه وحيدا .........


·
استيقظت من نومها ... فتحت الستائر ... تطلعت إلى الشمس ... والسماء الصافية ... وابتسمت ... اليوم سيكون أفضل بإذن الله ............


· نظر إلى الساعة المعلقة على الحائط .... تأمل عقاربها ... صوت دقاتها يربكه ... تسائل : متي ستتوقف هذه الدقات ... للأبد؟؟؟ ....................


·
الألعاب النارية تلمع في السماء ... والدقات تقترب من الصفر ... وهو جالس علي كرسيه لا يعبأ ..... فما ذا سيجد في هذا العام عن سابقيه؟؟


· قرر ألا يكتب مجددا ... سيتوقف عن كتابة الشعر ... أراحه هذا القرار كثيرا ... حتي أنه من فرط سعادته ... ألف قصيدة في لحظتها ...............


· تأملت وجهها في المرآة ... أخرجت صورة قديمة ... قارنت ... تغير شكلي جدا ... ولكن ... هل تغير شئ آخر؟



somaia

Tuesday, February 5, 2008

القلب القماش


الكوتشي اللي باش


م اللف ف شوارعك



يحرم عليه


يبوس ارض غيرك


والقلب القماش


اللي مكوي بعمايلك


لساه معبق


بريحة عبيرك


والواد اللي عاش


طول عمره يحايلك


ونفسه اسمه


ييجي في رسايلك


وتبعتيله تطمنيه


ان انتي عارفة


ان انتي ليه


وان انتي قايمة ونايمة بيه


وقت الشتا يتدفي بيكي


ووقت الخطر تتحامي فيه


وساعة اما بيقسي عليكي


وساعة اما بتدعي عليه


محدش فيكوا بيهنالوا بال


واول ما تصفي تفكي الريال


وتروحي تجيبيلوا كوتشي بدال


الكوتشي اللي باش

مصطفي

!!؟؟



مش عارف الكلام ده يهمكم ولا لأ...,,,بس انا قلت اقولكم عليه و اعذرونى رغاى انا شوية...طبعا كلنا عارفيين او سمعنا عن اللى بيحصل فى غزة,,,اكيييد يعنى كلنا عارفيين ده العالم كله بيتكلم فى الحوار ده و كله مالوش غير سيرة اللى بيحصل فى غزة.....انما هو ايه اللى بيحصل فى غزة؟؟!!
بيقولوا ان فى حصار و اسرائيل قاطعة عنهم كل حاجة ميه و نور و وقود......يااااه من امتى ده؟؟!!و لييييه كده طيب؟؟!هما بتوع غزة عملوا ايه غلط؟؟هى اسرائيل دى مالهاش كبير يعنى ؟؟طب حد ساعدهم يعنى؟؟ولا سايبنهم كده؟؟....انا عن نفسى سالت نفسى الاسئلة دى و اكتر شوية منها,,,و اتصدمت بقى,,اتصدمت ليه,,,عشان لقييت نفسى (زى ناس كتيييييييييير و كويسين والله) ماعرفشى حاجة عن الموضوع خالص ,,,
من مدة كده فى الامتحانات لاقيت سمية متضايقة اوى سالتها فى ايه؟؟ قالتلى عشان بتوع غزة,, مالهم,, يابنى متحاصريين بقالهم كتير اوى لا ميه ولا كهربا....يااااه...مش عايش انا فى الدنيا ولا ايه و ازاى ماشفتش فى التلفزيون اخبار عنه....حسيت انى لازم اهتم شوية بالموضوع و بدأت ابص كل يوم فى الجرايد واللى عندنا كل يوم على الاقل 4 جرايد يومية اهرام و اخبار و المصرى اليوم و الدستور وغيرهم,,,المهم بدات ابص فيهم و اتابع ايه اللى بيحصل...لاقيت انهم مش عايزين يفتحوا الحدود و شفتهم فى التلفزيون متبهدلين...اتضايقت اوى و قلت ايه التخلف ده !!هما ليه مايفتحوش الحدود و يدخلوهم,,و قمت اسأل ابويا و وانا بسأله حسيت بسذاجة شوية وقلت فى راسى(يعنى ازاى..ماهو كده هايسيبوا بلدهم و يجوا عندنا) رد عليا على طول قالى يابنى انت ماتعرفشى ان المصريين اللى هناك مش عارفين يعيشوا من غلوا الاسعار,,الحاجات كلها غليت قوى هناك و كمان بتوع فلسطين بيشتروا الحاجة و يرجعوا يبيعوها هناك!!!!!ايه ده...ده انا طلعت ولا فاهم حاجة...رجعت ابص فى الجرايد تانى و طبعا تهت فيها ولا عارف ايه صح ولا ايه غلط,,, ولا الكلام ده فعلا اننا كمصر موقفنا غلط فعلا صح,,والا ده بس كلام معارضة ,,,,ولا ان حسنى مبارك انقذ الابن الثالث لام الشهداء قبل ان يموت ده بجد والا ده بس عشان ده كلام حكومة...هو اللى انا متأكد منه اننا كعرب موقفنا غلط و اجتماعتنا لا بتحل ولا بتربط,,, واللى اكتشفته انى مش عارف غير فتافيت عن فلسطين و باقى الدول اللى بتتبهدل...
اما بقى اللى انا حسيت بيه و بقيت متاكد منه و حسسنى باحساس غريب و مايطمنشى...هو انى مش لوحدى اللى مش عارف حاجة بجد عن اللى بيحصل....
اكيد مش لوحدى,,,,شباب كتيييييييييييييير اوى ولا يعرف اى حاجة عن فلسطين ولا تاريخ احتلالها ولا ازاى نشأت اسرائيل دى كمان...
اكيد كلنا خدنا عنهم فى المدرسة و نسينا و مش فاكريين اوى,,,بس اللى يخلينا مش فاكرين تاريخ مصر اللى خدناه فى المدرسة اكيد يخلينا مش فاكرين غير طراطيش كلام عن فلسطين زى وعد بلفر و ان الفلسطينين باعوا ارضهم و انهم رفضوا ان السادات يرجعلهم الارض و قالوا عليه خاين....ده بس اللى احنا فاكرينه من المدرسة,,,و اصلا مش عاوزة قواله ان تلت تربع التاريخ اللى كنا بناخده فى المناهج متحرف و متشال منه و متحط فيه لما بقى قصة غير واقعية من خيال شخص ما(اهى دى بقى انا عارفها كويس)......و برضوا كلنا فاكرين ايام الانتفاضة و المظاهرات و سنسبرى اللى اتكسر و المذابح بتاعت دير ياسين و صبرا شالتيلا...و كمان فاكرين الشيخ الشهيد احمد ياسين...
يعنى فى كتير مننا و للأسف شبه مايعرفشى اى حاجة عن تاريخ فلسطين او غيرها,,,و اننا بقينا بنتعامل مع الحوار على اساس انه شئ عادى..حتى انا بقول عليه حوار,,يعنى عادى يعنى....يواحد يقولى يا عم هو احنا بتوع تاريخ !!!!مش مهم تفاصيل التاريخ احنا مش مؤرخين...بس نعرف عنه شوية و نسأل عشان نعرف يكون لينا راى فى اللى بيحصل ده و منبقاش شايفين مظهرات قدامنا و مش فاهمين حاجة او مضحوك علينا و فاكرين اننا فاهمين,,,عشان لما نشوف فى التلفزيون او نبص فى جرنال نعرف اللى بيكلمنا ده بيتكلم جد والا فاكرنا مش عارفين و بيضحك علينا و بيقول اللى على كيفه....
عارفين...انا كنت عايز اكتب مدة الحصار انما لقيت نفسى مش عارفها...فكرت اسال و بعدين اتكسفت من اللى هاساله...قلت ادور فى النت ,,موصلتش لحاجة,,,قلت اسال,,,بجد سألت 7 بنى ادمين عندى عالمسنجر...والردود كانت كالاتى: ياعم وانا مال اهلى,,,و انا اعرف منين انا مش بحب اتابع اصلا و بيجينى اكتئاب,,,,والله ماعرف بس بقالهم كتيير,,,دور عالنت ياعم,,,بقالهم مدة طويلة اوى,,,,اكتر من 3 شهوور و يمكن اربعة......
طيب قولنا مش عارفين الماضى و مالناش دعوة بيه ولا كنا عايشين ساعتها وعديناها....نتابع بقى الحاضر اللى بيحصل...نحاول نستعمل احساسنا ده فى حاجة واقعية قبل مايبقى مالوش وجود...والله مفيد الاحساس ساعات....لوحد قاللى احنا مالنا و عروبة ايه ياعم و خلينا فى نفسنا الاول....مش عارف هاقوله ايه....بس لو عندك اخ او جار او صاحب حتى ساكن فى اسوان و عرفت انه عيان...و بيودع خلاص فى الانفاس الاخيرة...هاتعمل ايه...اكيد لو فى اى نوع قرابة واقعية هاترووح تشوفه...او هاتكلمه فى التليفون,,,على الاقل هاتدعيله كل يوم ,,,اضعف الايمان يعنى لو ودع هاتسافر تحضر الجنازة....طيب مادول برضوا زى ماتقول كده فى بينا شبه قرابة...مسلمين بقى و اخواتنا فى الدين...عرب و اخواتنا فى دم العروبة...بلدين جنب بعض و جيران...سميها زى ماتسميها,,,انما فى حاجة بينا و بينهم ومانقدرشى ننكرها تخلينا على الاقل نهتم اننا نعرف اخبارهم اول باول و نطمن عليهم و نتعب لو خمس دقايق كل يوم على تعبهم اربعة و عشرين ساعة ,,او ندعيلهم و احنا بنصلى (بالمناسبة لو بعد كل اللى بيحصل فى العالم ده كله و انت لسه مابتقربشى من ربنا اعرف ان فى حاجة غلط و ده مش طبيعى ولا حاجة و اسال فيها شيخ جامع) قرب من ربنا و ادعلهم زى مابتقرب منه فى الامتحانات...حاول تعرف ايه الحكاية من اولها هناك...او هنا...حاول تتابع اخبارهم او اخبارنا حتى...بس اشترك فى عالمنا الواقعى خمس دقايق كل يوم.....هاتستفيد كتير لانى والله باستفيد كتير من ساعة مابدأت اعمل كده.....و اول حاجة تعملها تقولى ايه رايك؟؟!! هو معرفتنا للتاريخ و عبدالناصر عمل ايه ومعرفتنا السادات كان احسن والا ناصر والا الريس,, ده هايفيدنا فى حاجة؟؟!!....و ازاى اسرائيل دى طلعت كده فى وسطنا و تاريخ فلسطين و حرب العراق هايفيدونا فى حاجة ونحاول نعرف عنهم ولا مش هايفيدونا؟؟!!
والله بجد انا مش عارف يعنى...نفتح الحدود و نسيبهم ييجوا بدل ماهما بيموتوا هناك؟؟طب ماحنا لو عملنا كده هايسيبوا بلدهم و يجيوا يعيشوا هنا و يخلوا الاسعار تعلى اكتر ماهى عالية و الحكومة تعلى علينا الاسعار الطاق طاقين و يقولولنا عشان بتوع فلسطين و استحملوا يعنى هايضروا المصريين اللى هنا....و لو مافتحناش الحدود هانفضل قدام نفسنا ماعملناش اى حاجة و مش بعيد خونة قدام باقى العرب....يعنى نرووح نحارب مثلا ولا نعمل ايه و نعرف تاريخنا و تاريخهم كله والا نصه والا نعمل ايه...الله اعلم

SuPeR_mAz....اخوكم: معتز

Monday, February 4, 2008

من فوق ... ومن تحت




" البلد دي اللي يشوفها من فوق ... مايشوفهاش من تحت"... جملة عادل امام في طيور الظلام ... وبحكم اني كنت بشوف مصر من فوق النهاردة نظرا لكوني من سكان الدور 14 افتكرت الجملة دي


ليل... وساقعة وبلكونة بتبص علي مصر من فوق ومنير بيغني في وداني "ابكي... ابكي لو في عيني

دموع" ... صحيح الغنوة دي غناها منير لحبيبته بس ماعرفش ليه سيطر عليا احساس اني لو غنيتها هغنيها لمصر ... معرفش ليه حسيت اني عايزة انزل شوارعها واغني الغنوة دي...

ويبدأ منير مع " ابقي احساس الامان اللي عمره ما يبقي خوف".... صحيح هو مش البلد دي المفروض تبقي احساس الامان وليه احيانا بتتحول لاحساس خوف عجيب... خوف من حاجات قاااااااااااااد كده ....خوف من اي واحد بيلبس ابيض في الصيف واسود ومهبب علي دماغنا في الشتا ليخدك من قفاك ويوريك اللي عمرك ما هتشوفه في مصرالا من تحت... خوف من انك تصبح تلاقي ابنك عيان وانت اللي معاك مايكفيش غير انه يعالجه بلمونتين وحبة كراوية لتكتشف فقط ان الموضوع اكبر من الكراوية واللمونتين

ويسترسل منير..." احضنيني لو الغرام ممنوع "... تلخيص لكل اللي عايزاه من البلد دي ... مش عايزة غير حضنها .. حضن البلد اللي غرامها ممنوع
ايوة ممنوع علينا نحبها ... عايز تحبها حبها في سرك في صمت انما اكتر من كده ماتحاولش

طيب ازاي طالبين من واحدة بتشوف مصر بحلاوتها دي من فوق كل يوم الصبح وبتحلم انها تزل تلاقيها كده برده من تحت انها ما تدوبش في تراب البلد دي

ازاي عايزيني اخليني في حالي واقول وانا مالي واحب مصر من طرف تلات زي ما بيقولوا وانا حلمت بعلم كبيييييير اعلقه في اودتي من وانا 7 سنين

لأ مش هقول وانا مالي...

هحلم باليل وانا واقفة بشوف مصر بجمالها ده كله من فوق... وهعافر في نهارها اني اخلي اللي تحت زي حلاوة اللي فوق
وبحلم ان البراح اللي بشوفه في سماها من فوق يكون موجود علي ارضها من تحت... بحلم ان الهيبة والعزةاللي بحسهم في الهرم وانا شايفاه من فوق احسهم في ملامح كل مصري من اللي تحت من اللي كسره جريه ورا لقمة العيش... بحلم ان انوارها اللي عمرها مابتطفي ليلها من فوق تنور قلوب ناسها الطيبين اللي كتم عليها احساس الظلم والقهر
بحلم اني احب مصر من تحت زي ما بحبها من فوق
ويسترسل منير...."تبقي احساس الامان اللي عمرة ما يبقي خوف"
ازميرالدا... مي





مين اللي قام وانتفض؟



مين فينا ثار؟



مين اللي راضي الليل يطول؟



مين اللي قال انسوا النهار؟



مين اللي شاف فينا البنادق..؟



مين اللي شاف حفر الخنادق..؟



مين اللي شاف بُنى الجدار؟



مين اللي راضي لغزة الموت؟



مين اللي خارس كل صوت



عايز يثور.. يمحي الدمار؟



مين اللي قاتل فينا العزة؟



مين اللي رافض ينصر غزة؟



مين اللي شاف هدم الديار؟



شايف الموت و الحصار؟



ومين اللي قام وانتفض؟



مين فينا ثار؟



مين اللي قال ينفع سلام


..
مع احقر الناس اللئام..



مع اليهودي الغدار؟



نضمن له بيه الانتصار


..
يضمنلنا بيه المرار..



مين الضعيف فينا ومين الجبان..



و اترمى ف حضن الامريكان؟



مين اللي قال مالناش خيار؟



مين اللي شاف صورة الشهيد..



مين اللي خاف يخدله تار؟



ومين اللي قام وانتفض؟



مين فينا ثار؟



مين الي شاف دوسة زناد؟



وحرّم قصادها الجهاد؟



مين اللي راضي بالانكسار؟



مين اللي شاف مستوطنات


..
مين اللي التزم السكات..


وانكتم ولا خد قرار؟



مين اللي قال نصبر مين؟



ع السفاحين والسجّانين؟



مين اللي ورا الستار؟



مين اللي راضي الليل يطول؟



مين اللي قال انسوا النهار؟



ومين اللي قام وانتفض ..



مين فينا ثار؟