Tuesday, April 15, 2008

معتز يا رافع راسنا

الأربعاء 27 مارس 2008 ...بنفتح الدستور...صفحة 14...لقيناها...متصدرة الصفحة....وان مافضلش معاك غير قلبك ....اوعي تخاف..مش هتموت ..هتعيش.. ايه ده؟؟!!! ده معتز يا جدعان..يا عااالم ياهوووه ه معتز نزله فى الدستور..معتز بقى مشهور....عملنا فرح و الله..اشترينا كمية كبيرة اوي..تقريباً سحبنا الكمية اللي في السوق ....كله كان ماشي يدور علي معتز ....يا جماعة شوفتو معتز ....هو معتز فين .... شفتو الدستور ..عايزين نعمله مفاجأة...و شاهين جاب لوحة بيضا و ألوان و عايز يكتب له حاجة ....مي قالت لاسماء خديها ارسمي عليها ...و مسكت الألوان و هاتك يا فناكيش ....و علقناها فى المكان اللى بنقعد فيه...الورقة كانت بتضحك و ترقص من الفرحة...و عنين معتز لما شافها كانت بتضحك....و احنا كلنا بنضحك و طايرين من الفرحة...يااااااه ...من زمان الواحد مفرحش ....فرحتنا بجد يا معتز ...معتز يا رافع راسنا...و عقبال مقالات جاية كتير...

معشر العيش حلاويين


===============================
و ان مافضلشى معاك غير قلبك..اوعى تخاف..مش هاتموت..هاتعيش



انك تقول خلاص
اصعب حاجة فى حياتك انك تقول خلاص
انك تقرر النهاية لاجمل صفحة اتفتحت فى حياتك و تاخد خط تحدد بيه نهاية...المفروض يبقى خط و تنزل فى سطر جديد...بس ايدك مش بتقدر تجر الخط ده...لا عقلك ولا قلبك بيطاوعوك...كل كيانك و كلك كده مش قادر تقرر...مع انك عارف ايه الصح بتقول يمكن مش ده الصح...يمكن الظروف تتغير...و تفضل تعافر مع نفسك...بين ادراكك للحقيقة و بين تصديقك ليها...و توصل لدرجة انك توقف ادراكك و حسك و تفكيرك...و تتوقف الحياة كلها جواك مع استمرارك فى ممارسة الحياة اللى المفروض تعملها...تصحى و تنام...تنزل الشوارع,,,تروح نادى..تروح الكلية و تقابل ناس و تتكلم معاهم..تضحك و تهزر و تفرح و تتنطط.....مع كل ده...جوااك...متوقف عن العمل...ثابت..جامد..لا شئ يتغير مع الوقت....نفس الرفض للحقيقة...نفس العالم اللى بتوه فيه و انت داير بين اه و لأ بيتترددوا فى قلبك و عقلك الف مرة كل ماتفكر...الواقع و الاحلام بيصطدموا سوا..صدمة قوية بتعمل صوت فرقعة...فرقعة كف اخدته على وشك عشان تفوق قبل ماتغرق فى الحلم للنهاية.....و حتى بعد الالم اللى خدته بتعافر..بتفلفص عالاخر...بترفض اى فكرة ممكن توصلك انك تاخد قرار النهاية..انك تجر خط و تقفل صفحة...و مع الوقت...تخور قواك...مش من ضعف ولا ارهاق...ده من ادراك للواقع و استيعاب للموقف بشكل اوسع...و حبة حبة تبدأ تسلم و انت لسه مش مصدق...يضيق صدرك...تقابل الناس و و انت مبتسم...و تسكت شوية...و تروح الابتسامة ..تمسحها الحقيقة....تجر رجلك و انت ماشى...ترجع بيتك و تحس انك وحيد اكتر مما كنت وحيد بين الناس...تيجى تكتب ايدك ماتقدرشى...ماتتصلشى بحد فى التليفون ولا ترد على حد....تبدأ من جواك تدوخ و راسك تلف من حاجات كتيرة...الم و ندم و خسارة و فكرة الصح و الغلط و الاه واللأ و موقف الرجولة و ازاى تيجى على نفسك.....ماتقدرشى...تنام...و تنام...تصحى من نومك مش عارف نمت قد ايه ولا ازاى...تاكل او ماتكلشى مش فارقة....لحد ما و انت قاعد عالشات و وانت بتكلم صحابك يجى واحد منهم قريب منك و عارف سرك...يسألك هاتعمل ايه...هاتبعد و الا هاتكمل ولا ايه....تيجى تكتب مش عارف او لسة ماقررتش... تلاقى نفسك مش مطاوعاك...تكتشف انك خلاص بتنازع و حبك بيلفظ انفاسه الاخيرة...يتوقف قلبك و عقلك...تحس انك مسلوب الارادة..مفيش طاقة ولا قدرة....وتلاقى نفسك بتقول لصاحبك....انا باطلع فى الروح...و النغمات ويا كلمات عمر الزمن لمنير و انت بتسمعها تتملكك...تكتب اصعب حاجة يا صاحبى انك تقرر البعد...انك تقول خلاص...و من غير ماتلحق تمسك نفسك...تنزل دمعة من عينك كنت ماسكها بقالك كتييير...و وراها دمعة تانية....و كام دمعة تانية و تقول خلاص انا مدرك تمام الادراك...انا متأكد ايه اللى المفروض يحصل....و تلاقى من تانى كلمة مش عارف ظهرت...مش عارف هاقول كلمة خلاص دى ازاى....مش عارف بعدها هاعمل ايه...مش عارف هاكمل ازاى...و تزيد نغمات الموسيقى و ترتفع...و تنزل دمعة اخرى من عينك...ولا تعرف اذا كنت تتمنى ان تدمع عينك ثانية و كثيرا...ام تتمنى ان تكون هذه اخر الدموع...و تظل ساكنا لا تتحرك لا تسمع دقات قلبك و لا تشعر الا بالبرودة فى جسدك









اخوكم:معتز
SuPeR_mAz



9 comments:

Sumaya Rabie said...

معتز يا رافع راسنا ... والله وبقيت مشهووووور
مبروك يا عم عقبال ما نشوفلك برنامج على دريم ولا حاجة
ويسطع اسمك في سماء الإعلام
قول امييييين

Ahmed Mostafa said...

يا ميزو يا جامد..يا بتاع الدستور

على فكرة انتو نسيتو اهم حاجة
انا اللي كنت حاطط الورق اللي اتلزقت عليها المقالة

Mostafa said...

wna ro7t l cinema yoom l khamees

a7lam 3adya said...

معتز

انت اجبرتنى انى ادمع وانا بقرا كلامك .. وكأنك دخلت جوا ناس كتير وحسيت بيهم وبتحكى عنهم

ربنا يوفقك

Noha El-arabi said...

مبروك يا معتز
البلوج ده حيكون ليه مستقبل بكل اللي فيه عشان انتوا شباب زي الفل
عقبال حاجات تانية كتيييييييييير اوي اوي
بس اوعوا تكسلوا دوسوا في الكتابة عاوزين كل واحد فيكوا تنزله حاجة

Abu Shahin said...

يا معتز يا رافع راسنا
يا مشرفنا
يا مصيتنا

عقبال كل مرة كده يا عم معتز

على فكرة انا لسه عايز الحلاوة ومانسيتش عشان انا اول واحد شاف المقالة وفرحك
اشطة

Mostafa said...

wna tany wa7ed ya mezo.....elly ytla3 mn zmtak b2a

Anonymous said...

بجد يا معتز ومع انى قريت الكلام ده فى الدستور وحبيته جدا وحسيت بيه قوى بشكل خاص بس النهاردة له وقع تانى على قلبى واحساسى انت هايل فعلا وقدايه كلامك حقيقى وفى الصميم واللحظة دى اللى بتتكلم عنها اكتر لحظة بتوجع قوى وبصراحه انت عرفت توصل احساسها بمنتهى الابداع والروعة
تحياتى

vepoo said...

تعرف .... انا معرفكش ... عمري ماشفتك .... بس كأني كنت معاك وانتا بتكتب .... حاسس بيك ... أو يمكن كأنك انتا كنت معايا ... وكتبتها علشاني .....
اكيد ناس كتير قالوا الكلام ده .... بس مظنش ناس كتير حسوه زيي ....
الموهبة الحساسة احلى حاجة في الدنيا ....وانتوا يا شباب مواهبكم حساسة .... وروحكم جميلة .... أنا بتمنى بجد ييجي يوم واقابلكم ...
ربنا يوفقكم ....