Tuesday, May 6, 2008




مش كنتى تقولى يامه ان الزمن جرى بيا
و العمر عدى و راح.. و انا مغمى عينيا


سنين كتيرة عدت ..منها ولا خدت بالى
و لما ضهرى اتنى.. بديت اقول انا مالى


اتارى الهم بيهد و بيجرى السنين
و حتط ايدى عالخد بتزود فى الحنين


حنينى للى راح و الفرح راح معاه
و كل يوم افتكره و احلم انى القاه


لو الموت ياخدنى عشان اشوف عنيه
اشوفه.. نتكلم.. المس ايديه


ادينى ليك مستنى.. يا موت تعالى خدنى
و لو اموت دلوقتى.. هاقابله و اخده فى حضنى


عشقت يا موت.. من كتر عشقى ليه
و بستناك كتير.. من كتر شوقى ليه


و لمست وشى بايدى.. لقيت رسم الزمان
رسمنى خط خط.. الله عليه فنان


بكل يوم عدى.. راسم خطوط خطوط
و اكن وشى بيسجل.. ولا حاجه عليه بتفوت


و شفت صورتى بعينى.. لقتنى لسه شباب
غمضتها و فتحت... لقيت شيبى م العذاب


اتارى عمرى قليل.. و انا لسه شاب صغير
و شكلى زى ماهو.. ولا شئ فى وشى اتغير


بس الهم ف قلبى... جرى عمرى كتير
و بقيت فى الشكل صغير.. و بهمى عجوز كبي
ر

مش كنتى تقولى يامه.. فوق يابنى من الاحزان

لا الحزن ده يوم يهدك.. و تشيب قبل الاوان


ماخلاص يا امى انسى... مانا شبت قبل اوانى

و الحزن سكن قلبى.... و الهم بقى عنوانى


خدينى يامه فى حضنك... و بقوة ضمينى

دى دموعى يامه فى حضنك.. من الهم تشفينى
أخوكم: معتز

3 comments:

Noha El-arabi said...

ليه يا معتز ليه
يعني الكلام ده يتحس مش يتكتب عشان احساسه لوحده رهيب ما بالك لو اتكتب

حسن ارابيسك said...

معتز
واللهي الفكرة جميلة ومخدومة صح وواضح انها من جوه جوه القلب احاسيس فعلا معجونة بالهموم والحزن والأسى في عالم يجهض الأحلام قبل ان تولد في عالم يحترق فيه الكثير بسبب هموم تلك الحياة الصعبة
ارجع واقول الكلمات مختارة بعنايه فائقة وحلوة حلوة وبتوجع وبتمس القلب والوجدان وبتخلي الجسد ينتفض
تسلم
أرابيسك

Anonymous said...

ياه يا معتز
ايه كل ده احساس جامد قوى
وحزن غريب على شاب زيك
ليه حاسس كده
انسان جميل زيك ازاى يكون جواه كل الحزن ده
حقيقى هى جميلة وتعبيرات قوية
وانت عاملها كويس قوى
بس برضه ليه الحزن ده كله
مع انه حزن جميل جدا
نجلاء