أعزائي القراء ... عزيزاتي القارئات
نصيحة مني ليكو ... وعشان أبقى : اللهم قد بلغت ... اللهم فاشهد
شغل موسيقى هادية ... هادية أوي لو سمحت
وخش البلكونة كده ... بص على القمر
غمض عينيك وخد نفس عميــــــق، وفكر في أحلى حاجة في حياتك ...
أحلى حاجة على الإطلاق .... طلع بقى النفس ده على دفقات
فتح عينيك على شكل القمر وعلى دقات الموسيقى ...... حاسس بايه؟
اتأمل بقى في القمر شوية ... اتأمل في نوره ... شوف منور أوي ازاي
بص على الهالة اللي عاملها حوالين نفسه ... وبص ازاي نوره ده
منور السما كلها ومضيع عتمة الليل
تخيل ان عتمة الليل ديه هيا أحزانك وغربتك وكل حاجة بتعكنن عليك الحياة
والقمر ده هو الحاجة الحلوة في الحياة اللي بتيجي في وقت ما،
وساعات بتبقى مش واخد بالك انها جت .. وساعات بتبقى مش واخد بالك انها موجودة أصلا
إنما لو خدت بالك هتكتشف انها منورة الغربة ديه
يعني لو ادتلها فرصة ... هتحول ليلك المعتم لليل منور وله سحره الخاص
تخيل ان نور القمر ده بيخش جواك بيتعمق أوي أوي، بيجيب كل اللي جوا،
تخيل انه بنوره القوى ده بينور الضلمة اللي جواك كلها، بيدور على كل الأماكن المظلمة جوا قلبك وجوا نفسك ...... وبينورها
طب تخيل بقى انك فراشة ليك جناحات وبتطيـــر ... وانك طرت وفضلت ترتفع ترتفع ترتفع لحد ما وصلت للقمر ....
تخيل نفسك وانت بتستحمى في نور القمر
تخيل نور القمر بحر ناعم ميته صافية ورايقة وانت بتسبح جواها، بتغطس كلك فيها وما بتغرقشي .... بتتنفس أحسن وعينيك مش شايفة إلا نــــور
هقولك على سحر تاني مصاحب لسحر القمر، وانت برده مش واخد بالك منه
سحر النجوم
مش إسم فيلم على فكرة، إنما بص كده للنجوم
مش هتلاقي نجوم كتير عشان نور القمر مغطى على نورهم
وديه أحلى حاجة في الموضوع
حاول تعدهم هتلاقيهم عشرة خمستاشر بالكتير
عد كويس بس
طب بذمتك مش حاسس ان كل نجمة من دول وهي ضوئها بيرتجف كده
زي ما تكون بنوتة صغيرة خجولة
بتبتسم إبتسامة مكسوفة كلها رقة ودلع
طب مش حاسس ان كل نجمة من دول ممكن تبقى شخص مهم في حياتك؟
نوره قوي أو ضعيف على حسب أهميته عندك ومدى تأثيره عليك
ها؟ فيه كام نجمة اختفت؟؟ وفيه كام نجمة نورها مابقآش زي الأول
وفيه كام نجمة بقت منورة أوي أوي أوي
فكر كده، مش السما ديه فيها سحاب؟؟ طب ليه مش باين؟
عشان الدنيا ضلمة ، بس بتحس بالسحاب ده امتى؟ مش لما سحابة بتعدي من قدام القمر أو من قدام نجمة من نجومك؟
حاول تعمل مقارنة بين الحتة ديه وبين نفسك
اعملها لوحدك بقى أنا مش هغششك كل حاجة
الخلاصة يا جماعة، ان فيه حاجات حلوة أوي في الدنيا
وفيه حاجات ممكن تخلينا نحس بسعادة مش هنحسها الا بيها
وفيه حاجات ممكن تدينا مساحة من التأمل في نفسنا غير عادية
إنما احنا اللي قافلين كل الأبواب ومش مديينلها ولا مديين لنفسنا فرصة
ادي نفسك مساحة للتأمل .. للدهشة .. للفرحة
واستشعر لذة الاستكشاف
سمية
21/5/2008
21/5/2008
6 comments:
فيه حتة جوة الانسان .... جوة خالص ... لو صافية ومش متعكرة .... بتعرف تستقبل الاحساس .....
فكرتيني بشروق الشمس على بحر اسكندرية .... ازاي كان بيديني مع تغيير اللون شوية بشوية ان الدنيا بتتفتح تاني .... ان جوايا كله بينور ويتفتح كأنه وردة كانت مقفلة وفتحت .....
حابب اوي احساسكم .... وروحكم ....
صح عندك حق الحتة اللي جوه ديه بس أنا متهيألي ان معظم الناس عندهم الحتة ديه ماعدا أشرار العالم
ممكن يكون فيه ناس نسيوها فاتكوم عليها التراب سدها بس ممكن ينضفو التراب
وفيه ناس بيقفلوا عليها بالضبة والمفتاح عشان فاكرينها ضعف بس بيفضل المفتاح معاهم يقدروا في أي وقت يفتحوها
المهم انها موجودة والانسان اللي بجد واللي فعلا عايز يعيش كانسان لازم يدور عليها ويتعامل مع الحتة ديه على انها مملكته وما يسمحش لحد يتلويثها أبدا
*******
شكرا على الرد وياسيدي احنا اللي سعداء باهتمامك بينا
مافيش جديد
gamda awi ya somaia.....sba7 l sha3rea y3ny
7elwa ya siti bas msh 3arfa a3milha...wallahi ma 3arfa
ليه كل ده وسيقى هاديه وفتح عنيك واقفلها
عشان نشوف الحاجات الحلوه اللى فى حياتنا
محتاجيين بس نبقى عايزين نشوفها
Post a Comment