Thursday, July 24, 2008

حاسس انك مش حاسس بحاجه






تخيل كده فى يوم انك اتعورت ومحستش بحاجه يعنى شايف الدم بينزف من ايدك بس بردو مش حاسس بحاجه
تخيل بقا لو اخوك او اختك هما اللى اتعورو ومحستش بحاجه طيب بلاش لو شفت حد غريب متعور وبردو محستش باى حاجه
اكيد اكيد ده هيبقا احساس وحش اوى بس ساعتها انت مش هتكون حاسس فمش هتفرق معاك
الاحساس نعمه كبيره اوى ربنا انعمها علينا بس مشاعرنا واحساسنا ابتدوا يصابو بالتبلد نتيجه للعيشه اللى احنا عايشنها والاضمحلال المادى والثقافى والاجتماعى والاخلاقى والنفسي والاسرى والتعليمى وال كل حاجه اللى احنا بنعانى منه
لما تكون ماشي فى الشارع وتشوف طفل بيعيط ...هتعمل حاجه؟؟؟ بالكتير اوى هتبصله وتقول ياعينى وتكمل طريقك ومش هتفكر انك تروح تساله مالك او بتعيط ليه ما الطفل ده ممكن يكون تايه او يكون تعبان او محتاج اى حاجه
طيب لما تبقا بتتفرج عالتليفزيون وتشوف المسلمين والاطفال اللى بيتقتلو فى كل حته بتحس بايه؟؟؟ولا حاجه.....ولا شويه تعاطف وبعدين هتقلب القناه وتتفرج على فيلم او اغنيه....ولا ممكن تطلع حسيس وعينك تدمع....بس اهم حاجه ان كل واحد حاطط فى دماغه مادام انا عايش وزى الفل هوجع دماغى ليه وبعدين هو انا هعملهم ايه ....
كتير اوى المواقف اللى الواحد بيتعرضلها فى حياته اليوميه والمفروض انها تثير مشاعره او تعاطفه ومع ذلك تستغرب من رد فعل الناس اللى هو نظره البلاهه اياها وهز كتف بسيط و يدورو عنيهم عن المنظر المثير للشفقه حتى لو كانو قادرين يساعدوه
بجد احنا عشان نغير فى البلد ديه محتاجين نحس ببعض اوى اوى ونحب بعض ونخاف على بعض

7 comments:

Unique Gurl said...

فعلا الواحد شايف الناس بتتغير
و احساسها بيختفي
او بمعني اخر بيقل
و كل واحد بيقول انا فيا اللي مكفيني
و هو حد حاسس بيا
,مش مقتنع انه لو حس بغيره اكيد حد حيحس بيه
المصيبة بقي لو حد قرأ الكلام دة و محسش بحاجة :s

Sumaya Rabie said...

الإحساس نعمة
ربنا خلقنا بني آدمين المفروض منظر الدم والناس المقتولة وخصوصا لما يبقوا كمان أطفال المفروض الحاجات ديه تخلينا نتأثر ونحس ان قلبنا اتقبض بغض النظر عن جنسيتهم وعن دينهم
فمالاك بقى لما يبقوا من نفس دينك؟؟؟؟؟
إنما هي الفكرة ان ماحدش بقى بيحس بأي حاجة
اتربت عندنا ال مبالاة بأي حاجة وكل حاجة بقينا مافيش دم خالص

الفكرة كويسة يا هبة بس كان ممكن تتناوليها بشكل أعمق من كده شوية
المقال كان محتاج يبقى أطول ومؤثر عن كده شوية

Anonymous said...

انت بقى يا هبه عوزانا نحس اكتر ببعض!!
انت بتفكرينى بفيلم جيم كارى و مورجان فريمان لما جيم كارى قام بمهام الأله وبالتالى كان عليه انه يسمع لدعوات وصلاه كل البشر..ودا كان فعلا كارثى!
يعنى انت بتطلبى انى اتألم مشاركه مع الأخريين..هههههه هيا ناقصه ألم يا هبه؟ الحمدلله مصر مليانه نجميع انواع الألم يعنى لو تحبى أختارى اللى عوزاه وشاركيه!!
سيبوا الناس تعيش فى الألم لأنها هتموت به ومش هيبقى امامهم غير القضاء على المسبب للألم دا..وطبعا انت فاهمه ومش لازم اوضح اكتر علشان اخوانا البعدا..
لنين,على ما اتذكر,لما شاف لوتشينكا زوجته بتعطى الشحات طعام قال لها"انك تأخرين الثوره ساعه"وانت يا هبه بمشاركتك الناس الألم و محاولتك تخفيفه بتأخرى الثوره سنين

Anonymous said...

اه على فكره..انا محمد

Heba said...

Unique Gurl
فعلا لو اللى قرا المقال ده محسهوش تبقى مشكله بردو
========
Somaia
سميه فعلا كان مفروض اخد الموضوع بصوره اعمق بس انتى عارفه لما تزنقى نفسك لاخر لحظه ولازم تنزلى دلوقتى فبتضطرى تكروتى
=======
دكتور محمد
منور المدونه قبل اى حاجه
فعلا هو كل واحد فيه اللى مكفيه بس ده مش معناه اننا مفروض منحسش ببعض
لا قلت احساسنا ببعض وصلتنالكتره الجرايم اللا انسانيه كمجتمع شرقى

وانا مجبتش سيره المشاركه الماديه فى البوست خالص انا اتكلمت عالمشاركه المعنويه

Anonymous said...

what about who feels more than he want?!!!
what about who wishes he dont has all these feelings and this sense?!!!!
feeling is much more bad than non. sometimes....

Heba said...

ايس مان

الاحساس ده نعمه مش نقمه
ممكن زياده الاحساس تحبطك شويه
زي انك تشوف حاجه غلط تحس بيها اوى فتتخنق فتتضايق انك حسيت بيها
بس كل لحظى
هترجع تانى يوم تحس تانى
الواحد بيبقي ماشي فى الشارع مزهول من قلت الحساس اللى بقت عند الناس