Tuesday, July 29, 2008

عملوها ولاد الايه




براءة....!!!
بامارة ايه..؟؟!!
صحيح اللى اختشوا ماتوا
عملوها ولاد الايه
عملوها و عدوا و فاتوا
خلصوا واحد من مراته
و خلصوا واحد من حماته
و اللى راحت منه حياته
عملوها ولاد الايه

انتم مجانين؟؟!!

ازاى تقولوا مذنبين؟!
دول ابطال مخلدين
قتلوا الشاب و المسن
و الرفيع و التخين
عملوها ولاد الايه
عملوها و طلعوا منها
زى الشعرة مـ العجين
عملوها ولاد الايه
عملوها و جالهم قدرة
طفل كان وسط اهله
خلوه مقطوع من شجرة
انا قلت جريمة نادرة
طلعوا براءة....!!!
قلت ده جهل منى
و اللى طلعهم ادرى
و اكيد بيفهم عنى
و بياكل فول مالقدرة
عملوها ولاد الايه
ولا سحر ولا شعوذة
من غير ازاى وليه
لعبوها كده باستذة
تقارير متلفقة
تقارير متجهزة
و جيوب متعمرة
و كروش مكلبظة
عملوها ولاد الايه
جابوا عاليها واطيها
و اللى اهله غرقوا بيها
مايقولش ليه
و اللى مات و هو فيها
مايقولش ليه
و اللى ابنه ولا بنته ولا اخته ولا امه
راحوا فطيس كده فيها
برضه مايقولشى ليه
يدعى على الظالم
و يحسبن عليه
و ربنا يعوض عليه

....

          اخوكم: معتز

          SuPeR_mAz

....

10 comments:

Abu Shahin said...

ربنا يعوض علينا كلنا يا معتز

حسبى الله ونعم الوكيل

Anonymous said...

فعلا بجد حسبنا اله ونعم الوكيل فى كل واحد موت الناس البريئه دى وكمان فى اللى ضيع حقوق الناس البريئه دى و خلى ممدوح اسماعيل ياخد براءة كده بكل سهولة يعنى وده يعنى بامارة يعنى بجد
" حسبنا الله ونعم الوكيل "

Unique Gurl said...

ربنا ينتقم منهم
و حسبي الله و نعم الوكيـــــل :(

Anonymous said...

حسبنا الله و نعم الوكيل
و شفت البجاحة كمان .. قال ايه محامى البيه عاوز اعتذار و رد شرف من الشعب على كل كلمة اتقالت فى حقه .. اللى اختشوا ماتوا ؟؟!!
ربنا المطلع على كل شىء .. واذا كان ما فيش حساب فى الدنيا , حسابهم عسير باذن الله فى الاخرة

Mostafa said...

ya 3am yl3n abo mamdoo7 esma3eel 3la abo 7osny 3la abo elly lssa shayef feh amal fel balad de

ola_barakat said...

تصدق اني حسيت ف اليوم ده انهم اتقتلوا تاني
طيب لما مافيش حد ياخد للمظلوم حقه امال المظلوم يعمل ايه ؟
ولو حب ياخد حقه بايده يبقي ارهابي ومتوحش
وربنا مايرضاش بالظلم ده كله
علي الاقل كانوا اخدوا حقهم م الجاني
لكن ربنا ينتقم م الظالم
ويرحمهم ويغفر لهم
ويبدلهم خير عن اللي شافوه من عذاب
علا بركات

Foxology said...

حسبنا الله ونعم الوكيل

النهاية قربت انا متفائل والله

تحياتى :)

Noha El-arabi said...

طبعا بقدر الالم للخبر ده
الالم اللي مش حيتنهي من جوانا
باشكرك علي اللي كتبته لانه بجد حلو

Anonymous said...

مش عارفة اقول ايه
كلنا اتاثرنا بالموضوع ده جدا وكان جوانا كلام كتير وكبير اوى
بس قليل منا اللى قدر يخرج اللى جواه فى صورة شعرية تكون حادة كده وجميلة فى نفس الوقت
تسلم دماغك يا معتز
هو ده الفرق بين المبدعين وبين الناس الغلابة اللى زينا
تحياتى
نجلاء

Anonymous said...

بجد رااااااااااااااائع