"يا باشا احنا عيلة بتبيع أعضاءها عشان تحسن من مستواها الاجتماعي"
ماجاش في بالي وأنا بقرا خبر بيع أصول مصر في الجرنان غير الجملة ديه من فيلم لهنيدي ... بنبيع أعضاءنا فعلا ...
لما تبقى الأرض بتاعتك ومحتل يحتلها .. فانت تعمل مقاومة شعبية وتحارب بأقصى قوة عشان ترجع أرضك ليك من تاني ... ساعتها انت بتدافع عن حقك ... انما لما تبقى انت اللي بايع بيتك بنفسك .. انت اللي بعت ... ساعتها عايز ايه؟؟ مش من حقك ترجع تاني تقول أنا عايز أرضي ... مابقيتشي أرضك خلااااااص
هشتكنا وبشتكنا يا ريس .. بس كفاية هشتكة بقى الله يخليك ... قلبي وجعني من الهشتكة ... دول بيبيعوا أًصول البلد !!! ومكتوبة كده في المصري اليوم مكتوب : بيع كل ما يمكن بيعه من أصول البلد ..... يا لهوي !!! وعشان ماحدش من الشعب يفتح بقه هنوزع على الشعب القمور أسهم مجانية في الشركات ديه .... وياريته كل الشعب ... ده اللي أكبر من 21 سنة بس ... والباقي حقه محفوظ في صندوق الأجيال ... طب بالنسبة للورث؟؟ طب هما كده عملوا حساب الشعب اللي لسه هييجي؟ ظلم في التوزيع وكأن الشعب هو حبة الناس اللي عايشين دلوقتي .... تقريبا هيسمموا الأسهم ديه عشان يبقى ده آخر جيل من الشعب ...
سؤال يطرح نفسه .. طب الحكومة هتستفيد ايه؟ لا يا عزيزي هيا من جهة مستفيدة مستفيدة طبعا بس حدد الأول انت تقصد ايه بالحكومة؟ لو تقصد بيها التعريف الصح للحكومة الحكومة اللي بجد فهيا مستفيدة انها هتحط رسوم بيع على الصكوك ديه ... دمغة يعني فيطلعلها قرشين حلوين برده
أما بقى لو تقصد بالحكومة الحكومة بتاعتنا .. اللي هما رجال الحكم والمحيطين به وكلاب السلطة فدول بقى مش مستنيين جنابك عشان تقولهم هيستفيدوا ازاي ... أصلا اللي سعادتك بتاخده ده الفتات اللي وقع منهم وهما بيهبروا الهبر الكبير
أصل انت مش فاهم
هما الأول كانوا بيبيعوا الحاجة واحدة واحدة ويمصمصوا براحتهم وينقنقوا ويشفطوا البهاريز من جواه ... كلوا كل الهبر السمين التقيل، العضم اللي فضل نفسهم عافته فقالوا نستفيد منه باننا نديه للشعب ... اهو مننا خصلنا من قرفه وغمه وهمه .. وخلصنا من الرأي العام وكلامه اللي مابيخلصشي (قال يعني كان بيهمه) وبرده يطلعلنا منه سبوبة حلوة ... تفكير اقتصادي ميه في الميه ...
خد بالك بقى من حاجة كمان ... انت دلوقتي هتوزع على مين؟ على الغلابة اللي مابيفهموش حاجة في الاقتصاد غير ان الكام ملطوش اللي معاه مش هيقضوه لآخر الشهر ... وبتقوله كمان ده قيمته دلوقتي 2000 جنيه بس خد بالك ياعم الحاج .. البتاع اللي معاك ده ممكن يخسر ... يعني ما نضمنالكشي أي حاجة ... شوية وهيلاقي السهم بيخسر فعلا ... هيعمل ايه؟؟؟؟ أكيد هيبيع طبعا
وهنا يسألني قارئ ومين اللي هيشتري؟؟ أرد عليه في سرعة وحسم :أي حد يا عزيزي مش هيفرق .. هتسألني ليه؟؟ ما يمكن اللي يشتروا مصريين ... هرد عليك ساعتها في سرعة وحسم أكبر : أي حد معاه فلوس .. يبقى حرامي ... بقت قاعدة خلاص صدقني .. أصل قوللي واحد معاه مليااراااات هيجيبهم ازاي من غير ما يدي ده رشوة ويعمل سمسرة غير شريفة ويبيع في السوق السودا؟ شفت بقى؟ أكيد حرامي
طب رجال الحكم دول ماعندهومشي دم ومش فارقة معاهم .. ماشي عارفين ... ده شئ مفروغ منه ... انما احنا؟؟؟!! هنحس امتى بالخطر؟؟ الناس اللي في الشارع ديه هتتحرك امتى وتحس ان فيه أزمة؟؟؟
آخر سؤال بقى هسألهولك ... هتشتري ايه بنصيبك في مصر؟
بقول لماما هتشتري ايه بنصيبك في مصر؟ قالتلي هنشتري بيهم لبس الشتا .. ماما كانت بتهزر .. بس تفتكر لو سألت واحد يوميته 15 جنيه .... الاجابة هتختلف كتير؟؟؟ ما أظنش
اشتري بنصيبك في مصر أي حاجة ... بس هتعرف تشتري بيهم دفا؟؟ حتى لو كان بيجيلك هربان ... هتعرف تشتري بيهم شوارع بتلمك؟ حتى لو كانت مش علطول بتفهمك... هتعرف تشتري بيهم ناس شبهك؟؟ حتى لو كانوا شبهك في الحزن ... هتعرف تشتري بيهم وطن؟؟ ... حتى لو وطن بيكرهك؟؟ ...
11 comments:
مش عارف وحيد حامد كان بيتنبأ ولا هو اللي ادالهم الفكرة .... بس مشهد المزاد اللي كان في فيلم عايز حقي مبيفارقش دماغي من ساعة ما سمعت الحكاية دي .... يمكن من قبلها بشوية .... من ايام ماعرفت ان شرا الاراضي مفتوح للاجانب في اماكن زي الغردقة مثلا .... حسيت ان مصر بقيت فعلا معروضة في المزاد ... اللي يدفع يشيل ... وان الاحتلال دلوقتي بقى مش بالبلد ... بقى بالشوية ... يعني احنا هنبقى بلد محتلة مساهمة ... كل بلد ليها فينا شوية اسهم ... واللي يشتري اكتر له بقى حق الادارة .... وطبعا اصحاب البلد لو معجبهمش الشعب ممكن يكهنوه او يبيعوه هو كمان ويجيبوا شعب مستورد ... غالبا هيبقى صيني
هنبيع ونبيع ونبيع محنا واخدين على البيع !!
الطوفان جاى خلاص انا حاسس بكدة
ربنا يستر
هما 2000 جنيه ... ولا 2000 سهم ؟؟؟
أيا كان .. أهى بيعه خسرانه ..بقى ده نصيبنا فيكى يا مصر
يا بلاااااااااااش والله
مش عارفة الناس فرحانه ليه بالموضوع
ده ؟؟
ده انا قلبى موجوع جداااااا وحاسة باحساس الغريب اللى على وش سفر ومش عارف يروح فين
حسبى الله ونعم الوكيل
منهم لله
laaaaaaa2aaaaa..
حلوة جدا حكاية يسمموا الاسهم
،، بس انا اشك فى الحكاية دى لانهم جربوا معانا تسميم العيش و الخضار و الهواء و لسه بنعافر ...يبقى اكيد عندنا مناعة من السموم...يفكروا فى حاجة تانية و اهه برضه "فكر جديد" عليه العوض و منه العوض
تعرف هما عاوزين يكسروا عنينا بالكام ملطوش اللي مش هيعدوا 400 جنية ولا حتى 500 في أحسن الظروف ... وطبعاً كتير من الشباب محتاج يبدل الموبيل بتاعه , وكتير عاوز يتفسح فسحايه محترمة , وكتير مش لاقي ياكل فهيعوز طبعاً يجيب شوية أكل ويرميهم في البيت , وكتير بردوا مش فاهم فهيبيع ... الخلاصة كله هيبيع حقه والحكومة بكده تكون كسرت عنينا وهتقولنا
"أنتوا شعب عبيط بعتم حقكم وبأرخص الأسعار"
وقتها هنصحى على كارثة كبيرة جداً ربنا الأعلم بيها ... بس مش هتكون أكبر من كارثة وجود الحزب الوطني لغاية دلوقتي
تحياتي
وسوري لللإطالة
عالم عبيطة عايزه تبيع وخلاص
الأول باعت شرفها
وبعد كده باعت شعبها وناسها
وبعد كده عايزه تبيع ومش لاقيه حاجه تبعها غير بلدها
بس احنا مش هتبيع في حد يببع شرفه وعرضه
اهي هي البلد دي شرفنا وعرضنا
تقبل مروري
مجنووون
اخوتى الاعزاء
سعيد بزيارتى لمدونتك ...
ما رايك فيما يحدث من حولنا ؟
اتمنى التواصل لنصل الى رؤيه واضحة
لما يدور حولنا ...
الصدور ضاقت .. الحناجر بحت
فهل من مجيب ؟
فى انتظارك
ازيك يا سمية
بجد مدونتكم جميلة جداً
أنا سعيدة جدا بمعرفتك
انتى وجروب القاهرة
بجد ناس جامدة
ربنا يوفقكم يارب عشان انتوا ناس تستاهل
المشاريع اللى انتى كلمتينى عنها فى الزيارة بجد مفيدة جدا
المجلة ومشروع قريتنا احلى
ربنا يعينكم
طول ما مصر فيها ناس زيكم اكيد هتبقى أحلى
ده اميلى ياريت تضيفيه عندك
bezret_amal@hotmail.com
انا مش هقول رأي فى البوست لانه معروف راى بجد عندك حق فى كل اللى قلته ربنا يستر ومنتبعش احنا كمان ونرجع لزمن الرقيق يلا ربنا يستر بس بجد المدونه رائعه انا اول مره ادخلها يلا بورتوفيق ان شاء الله
لألألأ
عيب عليكى
حكومتنا حكومه نضيفه
هتديكى اسهم وصلوا دلوقتى بقيمه اجماليه
هاه
اقول الرقم
مستعديين
180 جنييييييييييييييه يا معلم يا معلم
يعنى حتى مش هتعرف تشترى بيهم اكتر من شبشب توكيل
بس انت ممكن تلعب بيهم فى البورصه بقى
تخليهم مبلغ كويس
يعنى روح ذاكر اقتصاد من دلوقتى
ولو مش عارف
فيه اعلان فى المترو ب1200 كورس تبقى ميه ميه بورصه
وعشان تجيب فلوسه بسيطه
بيع اسهمك انت والعيله وروح خده
وربنا يخليكى لينا يا حكومه
Post a Comment