Friday, February 6, 2009

مالناش بخت


خلاص يا مصر..ملناش بخت
مهما علي حسي مهما صرخت
مكتوب علينا فراقنا والوداع
سلام يا احلى ام واخت
بس عايزك
لما تيجي تودعيني
عند باب المطار
اياكي تبكي
او تفتكري
ان انا اللي خدت القرار
صدقني
كان غصب عني
مكنش ادامي اختيار
انا عمري ما كنت قاسي
ولا عمري هبقى ناسي
ترابك اللي في اتمرمغت
حبك ده اصلي وكياني
وحضنك اللي اواني
انا عمري عنه ما انسلخت
وابقي سامحيني
لو يوم غلطت او لبخت
كل ده كان

من ورا قلبي
يوم ما تعبت فيكي ودوخت
ملقتش ليا مكان جواكي
ولقيت القدر بيبعد خطاكي
وغيوم بتحجب لون سماكي
علي حسي

صرخت
ليه يا زمن بوخت
طلع مالناش بخت
سلام يا احلى ام واخت
احمد مصطفى

14 comments:

Anonymous said...

الله عليك يا احمد
الله عليك بجد
وداعك جميل ورقيق وكله احساس عالى جدا
انا قلبى وجعنى وانا بفراه وحسيت ابتسامة مسكينة اترسمت على وشى
ابتسامة حنية ووجع فى نفس الوقت
الله عليك يا شاعر يا جميل

نجلاء

Anonymous said...

ياااااااااااه يا احمد
ااااه بجد
فعلا جميله وبتوجع اوي
realy i missed ur words

Noha Khattab said...

يوم ما تعبت فيكي ودوخت
ملقتش ليا مكان جواكي
ولقيت القدر بيبعد خطاكي
وغيوم بتحجب لون سماكي

ربنا يسامحك يا أحمد
إيه احساس الشجن العالى ده
وجعت قلبى بجد
:(((

Heba said...

حلوه اوى يا احمد
افضلو كده اتسرسبو واحد ورا التانى لحد ما البلد تفضا علينا

Amr Khater said...

eh ya a7mad enta hatsafer enta kaman wala eh
ew3a

da ma ymn3asha enha gameeela gedan

Anonymous said...

to7faaaa wemasha2 alah 3alek ya ahmed bgd 7elwaaaaa moooooot mestaneya menak 7agat a7la we a7la kal3ada :-)

mahberry said...

جميلة فعلا...و مؤثرة بجد... دا أدبيا و إنسانيا
أما من ناحية تانية..مقدرش أقول معندكش حق فى اللى قلته بس و بعدين ؟ لما الكل يسافر مين اللى هايفضل ؟

Mostafa said...

elly msh 3aref yakhod l visa

moro_wbs said...

انا حاسس بكلامك جدا .. وفكرت فيه بصراحه كتير ..

بس كل مرة مكنتش بقدر أقول خلاص ....

مش قادر أقولك غير ان مهما حصل .. هي بتاعتنا .. بلدنا ...

واحنا بتوعها ..

صعب أوي نبعد عن بعض ...

بس لو قدرت وانا متخيل صعوبة دا ..

متنساناش ... متنساش الناس الطيبه ... واللي مش طيبه ..
هي دي بلدنا بنحبها على بعضها ...

وبمشاعرك الجميلة دي .. فانا اقولك انها اكيد زعلانه دلوقتي ..

فمتتأخرش عليها وعلينا ...

و أنا آسف لو كنت انفعلت بعض الشيء ..

لكن كلامك مؤثر فعلا ..

تروح وتيجي بالسلامه ...

تحياتي ..

vepoo said...

انتوا بتهرجوا !!!!؟؟؟؟
ممكن تفهموني مين هيقوم البلد تاني على رجلها لو كلنا سيبناها متمرمغة كدة ومشينا؟؟؟
البلد هي اللي مظلومة يا جدعان مش اللي ظالمة .... وناس مننا - حتى لو اتبرينا منهم- هم اللي ظلموها ...
ومهما كانت الظروف مش الحل خالص اننا نسيبها كلنا ونمشي ...
انا معرفش ايه الظروف يا احمد بس بترجاك تفكر تاني وتالت ورابع ومليون ...
وبعتذرلك ... بس أكيد مكنتش هنفعل كدة لو مكانش احساسك وصلني بجد ...

zamzooma said...

a7med enta msafer fe3lan ..da bgad walla hzar ?????

zamzooma said...

خلاص يا مصر..ملناش بخت

kelma mo5ifa 2wyy

ضحكات الحياة said...

dameeeeeeeeeed gedan

e7sas 3aly we kala gamel

دعاء مواجهات said...

لما الوجع يتمد
ف السكه ولا تلاقى حد
يمسك ايديك ويقول
امسح دموع الخد

يبقى الالم يرتاح
ويلاقى صدر براح
واياك ف يوم ترتاح

وانت بعيد عنها
دى بردو مصر مهما هنلعنها

....