Tuesday, February 10, 2009

سمعوني زغروطة بقى ... لولولولولوولولولولولولولولوي

سمعوني أحلى زغروطة بقى .. لأ مش هتجوز .. بس جالي عريس عقبال أملتكومعلشي أنا مش قادرة ما احكيش الموقف ده .. أصلها أول مرة تحصل بالشكل ده معايا يعني .. اللي هو يجيلي واحد ويقعد في الصالون مكسوف والحوارات ديه .. اسمعوا بقى التفاصيل وقولولي بذمتكو حاجة تفطس من الضحك ولا لأ؟ عشان ماما مصرة انها حاجة ما تستاهلشي اني أضحك لحد ما عينيا تدمع يعني
صلوا على النبي
أنا كنت خارجة مع واحدة صاحبتي ماشي؟ .. وبعدين واحنا بنتمشي ومروحين خلاص .. لقيت واحد بيبيع ورد .. قولتلها تعالي نجيب ورد .. وللأسف الراجل ماكانشي عنده ورد أحمر قاللي للأسف مافيش بنوزعه كله عشان الفالانتين ..ناهيك عن إني بصيت لصاحبتي بإستغراب وبعدين سألت الراجل هو البتاع ده امتى؟ قاللي يوم 14 .. يا راااجل؟ ابقى فكريني بيه يا إيمان بيه والنبي
المهم بقى .. طبعا الطريق زحمة .. وأنا أصلا مشيت متأخر .. فداخلة البيت الساعة 9.30 تقريبا .. ماما واخواتي بره البيت عند خالتي .. وأنا طالعة على السلم عمالة أغني أصلا وماسكة الورد في ايدي وعمالة أغني الدنيا ربيع والجو بديع قفلي على كل المواضيع قفل قفل قفل .. ومع قفل الأخرانية كنت بفتح الباب بالمفتاح .. لأفاجئ ببابا قاعد في الصالة (احنا حاطين الصالون في ركن كده في الصالة) وقاعد معاه واحد .. بيبصلي بإندهاش أوي .. من هنا فصاعدا بقى الكلمة اللي هكتبها بين قوسين هي اللي كانت في بالي وماقولتهاش
أنا بقى داخلة ورافعة الورد في وشي زي ما بكون بأدي طابور التحية العسكرية وشايلة البندقية .. ربنا ستر وماكتش برقص بقى كمان .. المهم لقيت كائن في وشي بيضحك .. رحت منزلة السلاح (الورد يعني) وكشرت في إندهاش وبصيت لبابا بصة تحمل معنى (مين الأخ؟!) وبعدين غصب عني ضحكت وقلت : (سلامو عليكو) ودخلت حطيت الورد على الترابيزة .. وانتو عارفينني بقى .. صباح التلقائية يعني .. ببص على الكنبة اللي في الصالة لقيتها مكركبة بغباء . عمار أخويا الصغير كان بيعمل إختراع صاروخ .. وساب مخلفات الإختراع بقى عليها .. ولك أن تتخيل مخلفات صاروخ بقى .. اشي ضمغ واشي مواتير وأسلاك ولقيت قلم كان ضايع مني وكان فيه شمعة مش عارفة كان بيعمل بيها ايه .. (يادي الفضيحة .. ايه المنظر ده) وقفت ألم الحاجات كلها بقى وبعدين حطيتهم في الدرج وقفلت عليهم .. بابا بيقوللي إعملي شاي بقى يا سمسم ( ده وقت دلع يا حاج) .. حاضر يابابا .. دخلت المطبخ ولعت على المية .. وبعدين إفتكرت إني عطشانة أوي فخرجت تاني جبت إزازة المية .. وبعد شوية إفتكرت إني ما سألتوش كام معلقة سكر .. فخرجتله .. قلت من باب إكرام الضيف أسأله لو يحب شاي أخضر ولا حاجة ..
أنا: شاي أخضر ولا عادي؟
هو: أنا مش عايز أتعبك والله
أنا: (ياختي كميلة اخلص يا كتكوت) لا والله مافيش تعب ولا حاجة .. ها أخضر ولا عادي؟
هو: خلاص أوك ناخده جرين ... وراح ضاحك
أنا: (ده عبيط ده ولا ايه مافيهاش تضحك) بالنعناع؟
هو: لالالا .. لا نعناع ولا سكر
دخلت المطبخ تاني صبتله الشاي وبعدين قلت المفروض أجيبله كوباية مية .. هيا ماما بتشيل كوبايات المية فين؟ لقيت كوباية كده عاملة زي ما يكون كان مزروع فيها قلقاس .. غسلتها وبعدين خدت بالي إن أنا شربت الإزازة كلها .. يعني المفروض أخرج تاني عشان أجيب إزازة وبعدين أرجع تاني أصبله في الكوباية وبعدين أروح خارجة مقدماله .. فاضياله أنا بقى .. رحت حاطة الكوباية فاضية .. كنت بفكر أعملها مقلب وقلت بلاش بابا ذنبه ايه .. رحت شايلة الصينية على ايد واحدة زي القهوجية بظبط .. وفتحت الثلاجة بالإيد اتانية طلعت إزازة مشبرة .. وحطيتله الإزازة والصينية جنب بعض .. وقلتله اتعامل بقى ..
قاللي: مرسي على تعبك والله ..
أنا: (ربنا يهدي) ابتسامة حاولت أخليها رقيقة بس والله أعلم كانت زي ابتسامة صورة الفيش والتشبيه
دخلت جوه .. وبعدين شوية وخرجت أدور على الشاحن بتاع الموبايل .. بصيت عليه مالقيتهوش فبقوله معلشي بص عليه جنبيك كده .. قعد يبص عليه .. أنا زهقت دخلت وسبته .. شوية وافتكرت ان الكاميرا بره وأنا عايزة أشحنها .. خرجت جبتها من بره .. المهم اني في كل مرة أخرج أبصله شذرا كده وأبص لبابا ما معناه ( ياعم الأشكال اللي انت جايبها ديه) .. وبعدين بابا سألني بيهيص هو كمان : هو انتي كنتي فين بقى؟
أخ ايه السؤال ده .. أقوله ايه ده؟ أقوله كنت فين يعني؟ كنت صايعة مع صاحبتي بنلف؟ قلت لا ما بديهاش بقى نديها كدبة وربنا يسامحنا .. واهو برده الواحد يترسم شوية
أنا: كنت في الساقية يا بابا .. ورسمت على وشي علامة (اكيد في مكان مهم هو أنا هروح فين يعني إلا أماكن مهمة)
راح الباشا بقى رادد
هو: ساقية عبد المنعم الصاوي؟
أنا : (تخيل؟ سبحان الله يعني) آه
هو: بتحضري بقى ولا بتروحي تقعدي وخلاص؟ ها هاها
أنا: (بس ياد قوم روح يللا) لأ بحضر طبعا...
هو: بتحضري ايه بقى؟
أنا: (وانت مالك ان شاء الله؟ عبيط عبيط) بحضر أي حاجة مواعيدها تبقى كويسة حفلات ندوات أمسيات
هو: بتحضري عمر خيرت؟
أنا: لاااااااااااااا بتبقى غالية أوي
زمانه قال عليا مش لاقية آكل
هو: ليه بكام يعني؟أنا: بأربعييييييييييين جنيييييييييييه بحالهم .. بستخسر بصراحة
هو: مش غالية أوي يعني
أنا: (ما انت تلاقيك على قلبك رزم رزم) لأ غالية طبعاااااا .. بناقص يعني أنا بحضر حاجات رخيصة .. بلاك ثيما اسكندريللا وسط البلد كده يعني
وبعدين لقيته هيصاحبني بقى رحت داخلة وسايباه .. شوية افتكرت ان الشاحن بتاع الكاميرا بره أصلا رحت خارجة تاني جايباه .. والله زمانه بيقول عليا يا هبلة يا بستهبلشوية وافتكرت اني سايبة الورد بره .. رحت قايمة جايبة الفازة ومالياها مية ورحت قدامه بقى فتحت الورد ورصيته في الفازة .. وعايشة كأنه عم عبده السفرجي مثلا .. وبعدين رحت باصاله ورفعت راسي في إباء وشديت الفازة ودخلت .. وأنا داخلة وحاضنة الفازة قلت لبابا: أنا قاعدة جوه بقى لو عزت حاجة نادي عليا .. بابا أول ما دخلت راح منادي عليا .. نعم يا بابا (ده من جوه بزعق يعني) قاللي مش عايز حاجة قولتله احنا هنهزر بقى مش كده؟آخر مرة بقى طلعت .. كنت عايزة الكتاب بتاعي اللي سايباه على الترابيزة .. فالترابيزة قدامه أوي وأنا مش هعرف أعدي عشان أجيب الكتاب قولتله: ناولني الكتاب ده الله يخليك .. وهو متحمس بقى راح مديني الكتاب .. والبيه بيهزر بيقوللي: ده كتابي على فكرة مش كان قدامي؟
أنا: (كر كر كر كر .. ياخراااابي ايه الظرف ده ...قوم روح بدل ما أخليك تندم انك تعرف أبويا) لا على فكرة ده كتابي بقى .. ومكتوب عليه إسمي كمان .. ورحت داخلة جوه
شوية والراجل مشي بقى .. وبعدين ماما رجعت من بره .. وأنا قاعدة في أمان الله في قوضتي بقرا رواية صالح هيصة بتاعة خيري شلبي ومستمتعة بقىماما من القوضة التانية: سمية تعالي عايزاكي
أنا: عملت كأني ما سمعتش .. شوية وهتزهق
ماما راحت باعتالي عمار روحي كلمي ماماروحتله
اأنا: نعم يا ستي؟
ماما وعلى وشها ابتسامة الأم اللي جايبة لبنتها عريس وفرحانة بيها: ايه رأيك في الراجل اللي كان قاعد مع أبوكي
؟أنا: الراجل الكوميدي ده؟
ماما: كوميدي ليه بس يابنتي؟ ده راجل ملو هدومه .. وبتقرالي من الورقة بقى .. عنده شقة 160 متر في مدينة نصر ومرتبه ألفين جنيه ومهندس كمبيوتر ...أنا: هو مديكي السي في بتاعه تشوفيله شغل ولا ايه؟
ماما: لأ أصله متقدملك وكان جاي يقعد مع أبوكي عشان يطلب ايديكي
أنا: لا والنبي؟ احلفي كده
ماما: يابنتي عريس والله
أنا: عريس!!! وانفجرت في الضحك لحد ما عينيا دمعت ... وكل ما آجي أتكلم أفتكر منظري وأنا داخلة بالورد ومنظري وأنا داخلة خارجة داخلة خارجة ..
أنا: يا ماما تلاقيه أصلا قال عليا بنت هبلة والله .. هو مش هييجي هنا تاني
ماما: لا يا بنتي ده معجب بيكي أوي
أنا: أتاريه بقى كان عمال يبصلي أوي ... نظام الله ديه طلعت عينيها ملونة .. وبتنور
ماما: أفهم من كده ايه؟أنا: مش موافقة طبعاااااماما: يابنتي ده بيشتغل في الكويت وراجل محترم وعنده عربية موديل الفين وسبعة
أنا: بس يا ماما الله يخليكي بدال ما أموت من الضحك
ماما: انتي هتقعدي في أرابيزي في الآخر أنا عارفة .. من كتر خطابها بارت
أنا: بضحك بضحك بضحك بضحك بضحك بضحك بضحك
زغرطي يا اللي ما انتيش غرمانة
جايلي عريس محترم وابن ناس وعنده شقة 160 متر في مدينة نصر وبيشتغل في الكويت وبيقبض 2000 جنيه لولولولولولولولولولولولولولولولولولوللوولولولولولولوللوي
Somaia Rabie
10/2/2009

32 comments:

Anonymous said...

طبعا مش عارفة اقولك ايه
بس موقف كوميدى جدا
خاصة بعد اليوم الطويل ده
انت الوحيدة اللى بتعرفى تضحكينى حتى لو كنت بعيط
ايمان

سايكووو said...

هو الموضوع ظريف
بس سؤال .. ماله العريس .. ليه لأ
مروه

Sumaya Rabie said...

eman
:D:D
انتي اللي عندك استعداد تضحكي والله
أحلى حاجة في الموقف بصراحة .. منظري وأنا داخلة بالورد
:D

Marwa
أقولك يا ستي ماله
أولا .. وده بعيدا عن أي حاجة أنا ضد الجواز بالطريقة ديه يعني
مش مقتنعة بيه وليا أسبابي اللي مريحاني
يابنتي ده عمره ما شافني ده جاي كده يعني
وجايب الجاتوه وبتاع
وبعدين اللي يضحك أوي أصلا ان ده بيحصلي أنا
:D:D:D:D

Young entrepreneur said...

كتابتك دمها خفيف
بس عايز أقولك رأي غريب شويه و هضربلك مثل .. غاده عبد العال .. مواضيعها شبه موضوعك ده و انا في رأي من زمان .. انها بتهدم مستقبلها بكتاباتها ديه .. راجل ايه ده اللي يروح يتقدم لواحده يلقاها كاتبه عنه تاني يوم و ماسكاه تريقه عالنت ..

أنا عن نفسي لو ملكه جمال الكون .. و واخده الموضوع ده تهريج كده .. متلزمنيش ..

ده بالنسبه لغاده .. بالنسبه ليكي بقي .. اهه بوست و فلت منك .. فكري فيها شويه و أعقليها..

و جاوبي علي سؤالي ده:
لو انتي عرفتي اني اي بنت بقابلها بتريق عليها عالنت .. كان ممكن تفكري تعرفيني ؟؟

محمد سعيد
طراطيش كلام

Anonymous said...

ههههههه بجد والله فاكرتينى باللى حصلى هههههههه بس بجد الف مبروووووك يا سومة لوووووووووووووووووووووى ابقى اعزمينى بقى
بهيجة

Ehab said...

والله و عدلك جالك اهو يا سمية
اتكلي علي الله ... ماحدش لاقي النهاردة
:D

زهرة الجنة said...

سمسمة ازيك
اول مرة اجي عندك
بس بجد دمك خفيف جدااااااااا

شوفي يابنوته
هو من ناحية بيستظرف فهو بيستظرف
بس برده الموضوع محتاج تفكير
مش فيه هو في كلام مامتك
هي زي اي أم محتاجه تفرح ببنتها
ربنا يسعدك يارب

بس بيني وبينك كده يابنت
بذمتك مش كنتي بتتحججي بحاجتك اللي نسياها بره عشان تخرجي
هههههههههه

Abeer said...

Salamo 3alykom

ezaiek ya soma bgd miss u loads
ma3lish ana msh ba3raf aktib 3araby kteer fa haktib frankoarab law makansh hyday2ik
ana 3andy kam comments 3al post da w as u know me ana hatkalim ma3aky bsara7a w hope enik matez3alish mny
1st: zay ma kol so7abik alolik ketabtik fe3lan laziza awee bas msh kaketaba mmkn tkon alaz bkteer law da mogarad kalam ma3 so7abik l banat msh kalam kol l nas btshofo

2nd : ana ma3 Mohamed awee fel ra2y w i think en ay wa7da fena law ta3aradt lel mawkif da bel3aks ya3ny law l 3ares shaf soretha aw sm3 3anha(zay ma by7sal kteer now) w howa a3ad yetarya2 aked d msh hateb2a 7aga koisa 5alis w rad fe3l banat kteer msh hykon mogarad l rafd mmkn ye7sal rodod af3al tanya

3rd:(d nasi7a le kol l banat elly 2aro l post w mo2ayden ra2y Soma fe l rafd l tam)
DENA ya gama3a ma2alinash keda ma2alinash lama yegilna 3ares norfod w netarya2 w n2ool msh da l gawaz elly bn7lam beh
ESTA5IRO abl ma ta5do ay karar (RABENA by7ibna nasta5ero fe kol omoor 7ayatna) w 3'er keda l ragel da mmkn yekon fe3lan kois w nkon zalmnah bmogarad n 2olna LA2 mn 3'er mane3raf mada TADIONOH,KHOLOKOH,TEBA3OH,TEBTOH,TA3AMLO MA3 EL NAS, AHLO,....
w ana a3raf banat kter w sa7baty w etgawezo bl taree2a d w l gawaz naga7 l 7amdo LELLAH
fa BELLAH 3aliko mattsara3osh fe et5az karartko w ESTA5ERO 5asatan w ma7adsh 3aref l 5eer fen w da 3'er en mmkn l karar elly a5adteh now ya soma ba3d fatra tendamy 3alih...!!

sry eny tawilt 3aliko w i hope n ma7adsh yekon ze3il mny w kalamy mykonsh daye2 7ad

JAZAKOM ALLAH KHYRAN

Anonymous said...

عفروته معفرته خالص ايه دا بجد موضوع جميل وفيه سرد رائع وجميل انك واخداه بالروح دي اصل مينفعش غير كده صحيح فيه عربيه وشقه وكده يعني بس اهم شيء انتي ترتاحي للاتسان اللي هاترتبطي بيه كمان عسان تكوني عارفه بجد والله قليل اللي بيرتبط بحد مجنون وعلي طبيعته ايوه هاتقوليله نروح الاوبرا هايقولك مشغول طب نروح معرض الكتاب معلش بقي اصلي مصدع طب ساقية الصاوي يا حبيبتي اسف بس عاوز انام بدري طب ايه رايك في القصيده او المقال الجديد دا تلاقيه بيبصلك من تحت لتحت كويسه وطبعا هو لا حاسسها ولا فاهمها اساسا عشان كده لازم نسيب نفستا للحياه ونعيشها بجد لحد ماربنا يبعت لنا اللي يستاهلنا بجد انما تبقي العمليه روتيييييييييييييييين يبقي نفر نو لالالالالالالالالالا
اسلم الايادي بجد عاوزين اكتر

شاذلي دنقل

Anonymous said...

Hi Somaia,
mesh 3rfa leh ana shayfa el mawkf 3ady...i think enty bs 3ashan konty lssa rag3a mn barra w deh kant mofag2a leki fa 2alabet be de7k:D.....rabna ywfa2k & be careful lw hwa bel sodfa shaaf el mawdoo3 da hayb2a el manzar mesh lateef.

Ahmed Mostafa said...

هو لو بيقبض الفين جنيه وعنده شقة 160 متر
اتجوزو انا
بعدين ده دمه شربات
انتي بتبطري على النعمة يا بنتي

Anonymous said...

hehhehee
lolololllllllllllllllly
alf mabrook ya smsm fere7telek awyyyyyy :P :P :P
ta2rebn elragl d kan by23od warna f elmicrobus w seme3ek w enty bet2oly en elbnt a5reteha beet gozeha :D
walla teftekry elmorataboh 2ooo geneh d mabyrekbsh microbus ??
hahahaaa
la2 bs katbaha b tare2a as5ara ana mota5yla shaklek asln :D :D
bs ma 2oltelenash elfara7 emta ba2a :P :P

Unknown said...

لولولولولولولولولولولولولولولولولولو لولولولولولولولولولولوى
سماح ابراهيم

Sumaya Rabie said...

قبل ما أرد على الناس هوضح حاجة بدل ما أقعد أعيد الكلام

لو تاخدوا بالكو .. أنا مش بتريأ عليه قد ما بتريأ على نفسي أصلا
الفكرة كلها في تصرفاتي أنا وأنا مش فاهمة حاجة
أنا اتريأت عليه في كام حاجة بس فيهم استظراف .. وده طبيعي مافيهوش حاجة يعني
ان الواحد يتريأ على اللي بيستظرفوا
لاحظوا ان طول الوقت ما أعرفشي أصلا ان هو عريس .. بتصرف بتلقائية وأنا ما اعرفشي

حاجة كمان .. أنا مش عايزة حد يعتبر ده موضوع أو مقالة
أنا بس كنت بحكي عشان أضحكو على الموقف اللي أنا اتحطيت فيه
مش ده مش مقالة أتحاسب عليها من الناحية الفنية يعني

آخر حاجة بقى
رأيي في موضوع الجواز بالطريقة ديه
أنا رافضاها تماما .. أنا عارفة ان فيه ناس بتتجوز كده وجوازاتهم بتنجح
إنما أنا مش عايزة ده
أنا ما بقولشي يعني ان أنا عايزة أتجوز واحد أخرج معاه ونعيش سوا
بس على الأقل أبقى شفته بيتصرف بره البدلة وقوضة الصالون
والجواز بالنسبة لي مش غاية .. هتنتهي بان الباب يتقفل علينا
الجواز وسيلة .. سلمة عشان نوصل لما هو أبعد
لذلك مش فكرة واحد على دين وخلق وخلاص
أنا مصرة ان الناس أيام الرسول كانت عارفة بعضها أصلا
عشان كان مجتمع صغير وكله عارف بعضه تقريبا
انما مش واحد ما شوفتوش غير كده خالص مش هينفع معايا على الأقل

نرد بقى على الناس

Mohamed
ازيك الأول؟
زي ماقلت التريأة على الموضوع أكتر منها عليه أصلا
ثانيا .. أنا مش بسخر من أي محاولة للإرتباط .. أنا بتريأ على الطريقة ديه
فياريت كلهم يعرفوا اني مش عايزة واحد يخش الصالون ..
وبعدين فرق كبير بين انك تبقى بتتريأ على أي بنت تعرفها
وبين انك تبقى بتتريأ على طريقة معينة
أنا والله وأنا بكتب البوست كنت ملاحظة انه شبه اللي غادة بتكتبه .. وكنت عايزة أبعتهولها أصلا
انما قلت مش مهم بقى خليه هنا وخلاص

Bahiga
ألف مبروك ايه؟ هو أنا ليه حاسة ان الناس زي ما تكون ما صدقت تخلص مني
:D:D

Ehab
:D :D
ماحدش لاقي ايه بظبط؟
:D

Zahra
بس أنا عايزاكي تبقى فاهمة اني في العادي ما بكتبشي كده
أنا بس اللي ما قدرتش أسكت وما احكيش
وبعدين أتحجج ايه يا بنتي
:D:D
ليه يعني .. على ايه
:D

Berooo
awlan wa7ashtenyyyyyy
أنا مش شايفة في اللي أنا قلته ده كلام غلط أو ما يصحش يعني يتقري
كله كلام في السليم
أنا وضحتلك وجهة نظري في موضوع الإرتباط بالطريقة ديه وفكرة الخلق والدين على عيني وعلى راسي
بس المعايير اختلفت
مش معنى كده ان الكلام ده غلط
لا طبعا صح جدااا
بس أظن كلمة خلقه وسعت عشان تشمل حاجات أكتر
زمان
كانت إختيارات الحياة محدودة .. والمهام اللي على الناس واضحة وحدودة برده
فكان مافيش مساحة أوي عشان يبقى فيه إختلاف في كل حاجة بين الطرفين
دلوقتي
الحياة اختلفت تماما
بقى ألف مجال وكلهم خير يعني
والإختيارات كترت
بقت كلمة خلقه متهيألي تشمل أكتر من مجرد انه مهذب ومؤدب وابن ناس

بس خلاص
:D

Shazly
هي بتبقى مسألة توافق .. ده هيرتاح في كده
وده هيرتاح في كده
ده هيرتاح مع النوع ده من البشر وللطريقة ديه وده مش هيرتاح
سعيدة ان الموضوع عجبك
وابقى تعالى المدونة علطول بقى

Anonymous
مجهولة الهوية
:D
أيوة بظبط .. الفكرة مش فيه هو قد ما كانت في تصرفاتي أنا
أنا هدفي اني أضحكو على اللي أنا عملته وأنا مش عارفة
هو لو شاف الموضوع مش عارفة بصراحة هيبقى رد فعله ايه
بس واضح أوي أوي اني مش بتريأ عليه قد ما بتريأ على نفسي

Ahmed
sheel w egry :D

Samah
:D:D:D ...
طول عمرك واقفة جنبي
بس المدونة نورت والنعمة .. نزل ساقع هنا يا بني على حسابي لأجدع سماح في الدنيا
:)

Mohammed Al-Azhary said...

انا الصراحه مش شايف اى حاجه تضحك او تسدعى الصحك ده كله ..

وبالرغم من انى رافض فكرة جواز الصالونات الا انى شايف ان الراجل ماعملش حاجه غلط وداخل البيت من بابه زى مابيقولوا .. وماكنش فيه مانع انك تديله فرصه وتتعرفى عليه وكانه انسان عادى يعنى .. ولو ماعجبكيش كزوج يشاركك حياتك .. اعتبريه كان واحد زميلك او صاحبك ماثلا وعلاقتكوا انتهت !

بيييييييس

Mohammed Al-Azhary said...

بس على فكره عاوز اقولك على حاجه حلوه لاحظتها ..

انت بتحكى كويس اوى .. وطريقتك فى سرد الموضوع مشيقه ولذيذه .

تحياتى

suzy badr said...

سميه حلو اوى طريقتك فى الحكى وبجد موقفك كان كوميدى جدا وخصوصا انك مش عارفه اى حاجه وفاكراه ضيف عادى تبع والدك
بس بجد امتعتينا بطريقتك اوى
وربنا يوفقك فى القرار السليم
ساره سعيد

engmodyyyyy said...

مانتى برضه غريبه اوى
كل شويه تطلعى ايه شاى اخضر ولا ناعم
ما يشربش اى حاجه
ثم انتى كنتى طالعه تساليه على معالق السكر اصلا
ولا وقت تدوير على الشاحن ولا القرايه قتلكى دلوقتى
يعنى من حقك تدورى على انتى عايزاه
بس الراجل برده شايفك كل شويه تطلعيله حط امل

مقلتليش
رجعتيله الجاتوه ولا خدتيه

eng modyyyyy

Sumaya Rabie said...

Mahmoud Al-Azhary
again
أنا ما بتريأشي على الراجل عشان هو جاي يتجوز كده
أنا بتريأ على الطريقة والموقف اللي حصل معايا
وبتريأ عليه لما استظرف .. مش عشان الموقف

أنا بحب النقد البناء ده .. اللي هو أقول اللي عاجبني واللي مش عاجبني
نورتني حقيقي

Suzy
بظبط الفكرة اني مش عارفة أي حاجة
:D
شكرااا يا جميل

engmodyyyyy
ده ايه النور ده؟؟
منور يا فندم والله
أنا فعلا دخلت وخرجت كتير .. نصيب بقى
:D
بالنسبة للجاتوه أحب أقول ان طعمه كان حلو أوي
كنت عايزة أخبي العلبة كلها على أساس ان من غيري ما كانوش هيدوقوه بس زي بعضه

Mostafa said...

no comment bgd y3ny

Anonymous said...

بصى يا سمية
كالعادة هتلاقى ناس بتعترض على الموضوع لمجرد الاعتراض
صدقينى انا عارف الناس بتفكر ازاى
:d:d:d
بس سؤاء انتى موافقة على موضوع الجواز
صالونات او مش صالونات
انتى فعلا بتتريقى على موقفك انتى
مش بتتريقى على العريس خالص
انا حاسه ده
واعتقد انه لو شاف الكلام ده
هيضحك اصلا
لانك كاتبه باسلوب لذيذ
ايمان

vepoo said...

مش عارف حسيت من طبيعة الموضوع وكلامك نفسه ان الرد مش مسموح غير للقريبين منك حتى لو ماتقلش ده بشكل مباشر ..
بس لاقيت في ردود الناس اللي محتاج رد ...
بالنسبة للموضوع نفسه زي مانتي قلتي هو موقف بتحكيه لاصحابك ويمكن الموقف في حد ذاته لو حد تاني بيحكيه مكناش هنضحك كل الضحك ده .. انما الكاتب الساخر - اللي زي حضرتك كدة - بيعرف يشوف في حاجات صغننة كدة مكان للضحك
كمان بيقولوا الكاتب الساخر الناجح هو اللي يقدر يتريق على نفسه ..
اسمحيلي بقى اكمل كلام في حتة تانية شوية حكاية جواز الصالونات دي
عجبني رأيك في نقطة اتساع معنى الخلق وانه بالتأكيد يشمل اكتر من مجرد طيب ومؤدب وابن ناس ...
والدليل موجود وحي في اغلب بيوت مصر تقريبا اللي مستمرة لمجرد ان فيه اطفال بيربطوا الطرفين مش اكتر ..
كمان جملة ان الجواز وسيلة لحاجة اكبر مش غاية في حد ذاته ..
وعاوز اسأل اللي حكم على الجوازات دي بالنجاح ايه مقياس النجاح ده ؟؟ متقولوش الاستمرارية بعد اذنكم الموضوع اكبر من مجرد بيت مفتوح واب بيصرف وولاد بيكبروا والله اعلم ايه المشاكل اللي بتحصل في شخصيتهم من عدم توافق الاب والام ...
وعلى فكرة دينا كمان بيسمح للبنت ترفض الزوج اللي متقدم دون ابداء اي اسباب ... وكأن عدم الارتياح مش سبب كافي ..
ولا مقومات الزوج اللي بقت مرتب وشقة .. كأن اللي معهوش دول مينفعش زوج واللي معاه دول عمل كفاية علشان ينفع ..
بيتهيألي كفاية كدة ... انا حاسس اني كتبت مقالة ...
قلة ذوق هي مني اني طولت بس اصل الكلام كان محشور في زوري معلش

محمود نشأت said...

الله بجد
جميل جدا
وبعيدا عن انك مش موافقع على العريس ولانى متفق معاكى ان الطريقه دى معدتشى تنفع خلاص .
بس بجد الاسلوب فى القصه جميل اوى
وتابعى على كده. وسيبك من اللى يقول انه قريب من اسلوب الدكتوره غاده عبد العال
وانا بموت فيها بصراحه بس انا شوفت ناس كتير اوى بقت دى طريقتها فى الكتابه فممكن نقول انها بقت مدرسه جديده للكتابه ..
وبالتوفيق الدائم

Sumaya Rabie said...

Mostafa
ah wallahy ... tedsa2 fe3lan No Comment :D

Eman
براحة يا بت
ده أنا ما اتنرفزتش كده :D
بس تقريبا انتي فاهمة الناس بتعترض لمجرد الإعتراض أكثر مني
اللي جرب حاجة غير اللي شاف من بعيد برده
:D:D:D
مش أنا النهارده شفت واحد في الشارع شبه العريس أوي .. وكان بيبصلي برده
قلت يا نهار أسود لا يكون هو وبعدين عملت عبيطة ... وقعدت أدعي في سري انه ما يبقآش هو
:D:D

Vepoo
على فكرة أصلا أصلا الموضوع كونه نزل على البلوج
يبقى مسموح لأي حد في أي حتة انه يعلق عليه
أبقى سخيفة أوي يعني اني أنزل موضوع على المدونة وأقول ما حدش يعلق عليه
:D
صح أوي الجملة ديه
وعاوز اسأل اللي حكم على الجوازات دي بالنجاح ايه مقياس النجاح ده ؟؟ متقولوش الاستمرارية بعد اذنكم الموضوع اكبر من مجرد بيت مفتوح واب بيصرف وولاد بيكبروا
صح أوي أوي أوي
القضية مش قضية حفاظ على الجنس البشري من الإنقراض وخلاص
ولا برده مجرد حاجة بتعمل عشان الإستقرار
إستقرار ايه!!!!!!
أكيد ربنا ما ادالناش الأرض وادانا عمرنا عشان نستقر وخلاص
وبعدين يا فندم حضرتك تخش تتكلم وترغي براحتك
واحنا نسيب البلوج خالص ونمشي كمان
:D:D
لا والله ولا قبة ذوق ولا حاجة .. أنا اتبسطت من تعليقك بجد

محمود نشأت
:):):)
سعيدة ان الموضوع عجبك طبعا
بس أنا فيه نفسي أقولها بس خايفة الناس تفهمني غلط
أنا في العادي ما بكتبشي حاجات كده
ده بوست طلع مني مش عارفة إزاي والله
أنا دمي مش خفيف لدرجة اني أضحك الناس كلها كده
:D
بس أوعدك لو لقيت حاجة عندي تانية أقولها وأحس إنها هتضحك أقولها
:):)

zamzooma said...

somaiaaaaaaaaaaaaaaa...da7aktini 2wwwwwy ...w 2lf 2lf mabrook ...w ba3edan 3an kol el comments el mo3tareda w el mo7alela w el motdareba bayn mo3ared w mo2ayed ...l fekra el wa7ida el mosaytera 3laya ..( di somaia sa7bty )

moro_wbs said...

طبعا الموضوع كله يتلخص في ... الراجل الكوميدي دا ..

بصراحه ياما الواحد هيشوف ..

لكن بصراحه البوست جميل ولذيذ جدا ..

وتعيشي وتاخدي غيرها ..

Rosie said...

أسلوبك لطيف أوى و كوميدى كمان..
ربنا يوفقك..

Sumaya Rabie said...

Zamzoma
y3ny ana 2abl kda kont Somaia bent l geran y3ny :D:D .. ana heya mn zamaaaan :D
missing you btw ;)

moro
أنا مش فاهمة بصراحة انت عاجبك الكلام ولا لأ
:D:D
لو تقول تاني عشان أفهم
بس أيا كان
شكراا على التعليق
:)

Rosie
ده بس من ذوقك يا باشا
ربنا يخليكي يا جميل

Abu Shahin said...

عين العقل والله يا سمية

هيثم الغيتاوي said...

عارفه اللى يضحك ايه فعلا يا انسه؟
ان من صورتك دى
انك الظاهر مفكره نفسك حلوه ولا جذابه مثلا
على ايه يا بنتى
بوسى ايدك وش وضهر
ههههههههههههههه
فرصه سعيدة
وقلبى عندك

Gehan said...

سمية انتى ضحكتينى جدا جدا بس عارفه بلاش رفض على طول ما يمكن يبقى كويس؟؟؟ و الا ايه

Anonymous said...

اول حاجة بس قبل ما اكتب ... انا اول مرة ادخل على عيش وحلاوة و اقرا حاجة ... اول حاجة اقراها كانت حاجتك انتى و عجبتنى اوى اوى .. دمك خفيف جدا وشكلك فقرية طبعا ... بس فعلا حاجة تضحك يعنى
وزى ما دايما بيتقال
keep it up :D