Thursday, February 19, 2009

ف طريق البحث عن الحقيقة .. اوعى تعيط .. مفهوم




ف رحلة البحث عن الحقيقة .. هاتمشى ف طريق طويل وهاتشوف حاجات كتير هاتجذبك وهاتبقى عايز تفضل جنبها .. ولو مشيت وسبتها هايبقى نفسك ترجعلها

ولما تمشى ف طريق البحث عن الحقيقة .. هاتقابل محطات كتير .. هايبقى نفسك لوتقعد و تستريح وتعيش مع الناس اللى فيها لاخر العمر .. كل الناس اللى فيها .. سواء اللى شبهك او المختلفين عنك .. ولو انت حقيقى بجد هاتحب الناس اللى شبهك من كل قلبك .. وهاتتقبل الناس المختلفين عنك وتحبهم .. وهاتكون مستعد ف اى لحظة انك تساند الناس المختلفين عنك قبل الناس اللى شبهك .
ولكن ولانك انسان حقيقى ومابترضاش بانصاف الحقايق .. هاتسيب المحطة دى برغم كل مافيها من فرحة وراحة وحب .. وهاتكمل لمحطة تانية .. المحطة اللى هاتعرف فيها ناس كتير برضه .. وهاتلاقى نفس الصوت اللى بيقولك ما خلاص اقعد بقى خليك هنا .. لكنك برضه بتسيبها وتمشى فى سبيل بحثك عن الحقيقة .
وعلى فكرة مش كل مرة انت اللى هاتسيب المحطة وتمشى .. لأ .. ساعات كتير الناس اللى ف المحطة هما اللى هايسبوك ويمشوا .. ساعتها اكيد هاتكون اصعب عليك لكن اوعى تزعل او تعيط او تياس .. واعرف انه" لو غاب (قمر) مليون قمر طالع" .. وانهم هما كمان سابوا المحطة ومشيوا .. لانهم ف طريقهم للبحث عن الحقيقة زيك بالظبط .. وانهم سابوك ومشيوا ..عشان ف طريق البحث عن الحقيقة مافيش حد مطالب انه يمسك حد من ايده ويوديه لاخر الطريق .. الباحث عن الحقيقة بيساعد الناس بس ويرشدهم انه فى حياة تانية غير اللى معظم الناس عيشاها .. حياة احلى وامتع ..حتى لو الناس العادية قالوا عكس ده .. حياة اكيد فيها متاعب ومصاعب .. لكنها احلى بكتير من الحياة المملة الجامدة الناشفة .. واللى فيها مصاعب برضه .

ولازم تعرف كويس انك على قد ماهاتعرف ناس .. على قد ما هاتودع ناس ، وعلى قد ما تعيش تجارب ..على قد ما طريقك هايبقى ممتع اكتر .. حتى لو كانت التجارب دى قاسية عليك حبتين ..لكنك طول مانت مصدق انه" لو ف يوم راح تنكسر لازم تقوم واقف كما النخل باصص للسما "يبقى خلاص انت مايتخافش عليك يا معلم و "الطريق مفتوح قدامك ابدر جواه احلامك" لكنك لازم "تمد الخطاوى عشان مشورارك لسه طويل" وماتنساش وانت ماشى ع الطريق "تعلى صوتك بالغنا


أحمد شاهين

17 comments:

Ahmed Mostafa said...

يا دماغك
: )

Abu Shahin said...

اقل حاجة عندى
:)

Amr Khater said...

اقل حاجة عندك
ومالة
دا ما ينمعش برضة انها هايلة
:)

vepoo said...

حاضر ... مش هعيط ...
هضحك وهغني وهفرح .... علشان دايما هفتكر اني قابلت حد زيك قالي الكلام ده :)

suzy badr said...

الله عليك يا احمد
بجد هايلة وصادقه

hend elsawy said...

جامدة ياابو شاهين وحعمل زى ماقولت وححاول على قد ااقدر انى مااعيطش مع ان الحكاية دى صعبة مع المشوار والطريق ده

أكرم يعقوب said...

شكرراً على تلك الكلمات اللى بجد كنت محتاجة

بجد شاهين شكراً

منونة said...

شاهين ... مش ممكن مع كل اللى انتا قلته نعيط بردو ..يعنى اعتقد البكاء بيحرر طاقة لازم تخرج ..وده عشان نقدر نكمل...بس تجنن

البدري said...

بص يا ابو شاهين
المقال عجبني بس في اخره سألت نفسي (حقيقه ايه بظبط)ورديت علي نفسي وقولت ده ابو شاهين ده معلم سابها عايمه عشان تبقي عامه
رجعت نفسي قالتلي(بحسها الفني الكتابي العالي طبعا)...احم احم
بس لوكان شاهين استشهد بمثال كده كانت الدنيا نورت وبقت عال العااااال
المقال فكرتف حلوه كان هيبقا ملوش حل لو كان فيه كده حبه امثله من ارض الواقع
استمررررررررررررررررررر يا شاهين

Anonymous said...

awesome ya Ahmed
Nayra_

moro_wbs said...

حاضر مش هعيط ..

او على الاقل هحاول ..

ساعات بيبقى صعب عليك تبقى زي النخل اللي باصص للسما ..

لكن مهما كان اهم شيء .. انك تفضل تعافر وتدور وتحاول ...

ومتسيبش نفسك ..

وتحاول متعيطش ..

شكرا على اقل حاجه عندك يا معلم :)

Sumaya Rabie said...

ياااااااااااااااااه يا شاهين
حلوة جدااا لا فوق الحلوة
وجاية في الوقت المناسب أوي أوي
طول عمرك دمااغ

Anonymous said...

جميله جدااااا يا شاهين
وطول ما انا ماشى . . هاعلى صوتى بالغنا


محمد الأزهرى

Anonymous said...

يا سلام عليك يا شاهين
فلسفتك الحياتيه ملهاش حل ياواد
لما بقرالك بسرح في الدنيا
وبحس انك بتقول كل اللي جوايا
بس الميزة انك دايما اوبتمستك
علي رأي مدرس الانجليزي بتاعي في ثانوي
واجمل حاجه فيك
انك ان مقدرتش تضحك مبتدمعش ولا تبكيش
هات بوسة بقي

Mostafa said...

sa7 bnsbt 90% ya shaheen :D..........tslm 2eedak ya wad

Tulip said...

ana 3rfa eni m2sara awy ya shahin bs wlahy ghsb 3ni bd h7awel b2a adkhol 3latol a2ra :)

bs bgd enta maestro :) wkalam sa7 mya flmya

EMY said...

بجد موضوع رائع وانا فعلا ليا نفس التساؤل حقيقة ايه بالظبط؟
المهم ان فعلا لو حد طبق الكلام ده هنقدر نعيش احلى لحظات حياتنا من غير مانندم على الماضي
في انتظار المزيد