Wednesday, February 25, 2009

نهايات مفتوحة....أوي


وحشتني أمي ....
ودعوتها ليا....
ف مكالمة دولي...
قبل ما تقوللي سلام....
وتقولي مالك؟.... وأرد مالي؟؟...
أخر تمام......
وتقولي صوتك مش عاجبني..
.و أقولها دا دور زكام.....
وقبل ما الدمعة تخوني....
أقول ألوووو......الصوت بيبعد......
واقفل قوام......

ووحشني خالي....
وحضنه اللي ريحته.....
ريحة سجاير....
تايهة ف عباير....
برفان رجالي......
وخالي ملوش أولاد ولاد....
غيري أنا.....
و زيي تمام....
ملوش معاد....
ويومه بسنة......
ويشتم ف مصر ويلعن خرسها.....
وانا ألعن ف حسني وجمال وف حرسها....
ونضحك.....
واقوله طيارتي بكرة.....
ف يسكت.....
يطلع علبة سجايره......
وياخد سيجارة.....
ويقطع نفسها
...........
مصطفى ابراهيم

11 comments:

vepoo said...

تعرف إن أنا دمعت ؟؟؟
ولو تعرفوا اد ايه الحكاية دي بقت صعبة !!!!

Sumaya Rabie said...

طول عمرك يا مصطفى متعلم ودماغك نضيفة وبتقول كلام يمس القلب

ربنا يرجعك بالسلامة بقى

Unknown said...

ترجع بالسلامة يادرش
تحقق كل أحلامك ان شاء الله

Noha Khattab said...

وانت كمان وحشتنا يا مصطفى
ربنا يحميك وتفضل زى مانت ماتتغيرش وترجعلنا بألف سلامة
:)

تــسنيـم said...

جامدة اووي يا مصطفى

وجعتني أووووي

hend elsawy said...

جميلة اوى وحسيتها بجد

Abu Shahin said...

ربنا يمسيك بالخير يا مصطفى انت وعم رافت

Gehan said...

ربنا يحميك يا مصطفى

Amr Khater said...

الله

وربنا يرجعك بالسلامة

zamzooma said...

yaaaaaaah..7asa en f waga3 f l 7al2 w enta bt2olha ..fazi3a ya mostafa ..terga3 b alf salama ya mostafa ..

last-knight said...

عبقريه