Saturday, February 28, 2009

بعد ضهر الخير يا مصررررر

احنا ( جيل التمنينات يعنى ) اتربينا زمان ( قبل الدش والرسيفر ومشروع وصله لكل مواطن ) على برامج صباح الخير يا مصر ومساء الخير يا مصر وحاليا استبدلو مساء الخير يا مصر بالبيت بيتك عشان لقوه مش جايب همه....المهم البرامج ديه كل مهمتها فى الحياه انها تثبتلك بالدليل القاطع والبرهان الساطع ان مصر بخير وان الحكومه بتاعتنا بتبذل قصارى جهدها من اجل راحه المواطن الفقرى البطران على النعمه وان يا ناصح مفيش توريث ولا حاجه وكله بالانتخابات النزيهه ( النزيهه اوى )

ودلوقتى ظهرت برامج تانيه بتفضح ادامك الحكومه وبتثبلك بالدليل القاطع والبرهان الساطع ان حكومتنا حكومه زفت والحياه فى مصر بقت سوده والقادم اسوء

انا بقا احترت اتفرج على انهى فيهم.....لو اتفرجت على القنوات المحليه هحس بالعته لان اللى بيتكلمو دول بيقولو كلام مالوش اى علاقه من قريب او من بعيد بالواقع بتاعنا و هصدق الكلام اللى بيتقال وابتدى ارضي بالموجود وخلاص....ولو جبت الدش واتفرجت على البرامج التانيه هلاقي الكلام بييجى عالوجيعه وممكن يجيلي اكتئاب واحساسي باّدميتى هينخفض ومش بعيد يتلاشي ( ديه تبقا مصيبه ) والنتيجه الطبيعيه انى مش هقدر اشتغل ولا اعيش

اذا...فالقنوات المحليه رغم مصداقيتها القليله فهى بتعمل حاجه حلوه اوى فى الناس....اللى هيا حسن الشعور بالدنيا...زى المخدرات يعنى....وبالتالى بتخليهم يقدروا يشتغلوا ويعيشوا من غير اكتئابات بس طبعا مش هيقدروا يبدعوا او يقدموا جديد لانهم اصلا عايشين فى كدبه

وعلى الجانب التانى هتلاقي ان البرامج التانيه بتوجه كل تفكيرك فى ازاى تغير الوضع ده وازاى تبدع وازاى تبقا مختلف وازاى تتبطر على الوضع الحالى....من غير ما تعيش الواقع

طيب فين الحل؟؟؟ اقولك ....اولا مفروض تفهم ايه غايه كل واحد منهم...دول عايزين يغطوا على اخطائهم بالبرامج اللى بتقنعك ان غلطهم ده فى مصلحتك...ودول عايزين يجذبوك انك تتفرج عليهم ويقنعوك انهم بيفهموك الحقيقه...والاهم بقا انك توصل لان الاتنين بيخدموا نفس الهدف وكل كلمه بتتقال على الفضائيات محسوبه ومتراقبه ومعروفه والا مكنتش فضلت شغاله لحد دلوقتى

فى بقا حل تانى

احنا نعمل برنامج جديد بالمذيعين الارضيين على القنوات الفضائيه عشاننضرب عصفورين بجحر ونسميه

"بعد ضهر الخير يا مصر"

هبه

9 comments:

البدري said...

مجهود لطيف...ولكن توجد اخطاء املائيه (الفقري)وانا من بعد المسابقه اصبخت من انصار الفصحي .....الفصحي فقط..لان السلوب العامي اتضح انه يفقد العمل الادبي بريقه

مـجـنـووون said...

والله في نظري يا ريت ايام زمان ترجع ايام القناة الاولي والثانية كان في فلم واحد في اليوم وبالليل كمان ومكنش في قلة ادب في المسلسلات والأفلام الي بنشفها دلوقتي

اي نعم عرفنا كل حاجه في العالم بس في نفس الوقت خسرنا عادتنا وتقاليدا الي اتربينا عليها


تقبلي مروري
مجنووون

Ahmed Mostafa said...

جامدة يا هبة كالعادة
وانا مع رأي مجنون

Rosie said...

عندك حق...ضربتى عصفورين بحجر..و ممكن كمان نتفرج شوية على المحلى و شوية على الفضائى...
هو أهم حاجة مانزودش من الانتنين...لأن النتيجة هتبقى سيئة على طول...

moro_wbs said...

والله انا فكرت في الفكرة دي قريب ..

ولقيت ان ساعة اما بتفرج عالبيت بيتك .. لو ما اقنعتش نفسي ان دي الفقرة الكوميدية بتعب نفسيا من الكلام ...

يمكن عشان الواحد خد على عمرو اديب ومنى الشاذلي ...

لكن في النهايه .. بلاقي برده ان عمرو اديب بيمثل الفقرة الكوميدية لكن من وجهة نظر تانية ...

فاهم حاجه هو ازاي تبص للحدث .. وازاي تقنع نفسك ان دا الفقرة الكوميدية .. لان الفقرة الكوميدية الحقيقية هي اللي احنا عايشينها كل يوم ..

واسف للاطاله .. لكن الموضوع جميل وشدني..

تحياتي ..

Abu Shahin said...

اتفرجى ع الاتنين
وما تصدقيش غير قلبك

جامدة يا هبة

Anonymous said...

حلو جدا

وانا رأيي اننا نكتب بالعاميه جدا

عشان ديه اسلوب كلامنا

ودي طريقتنا

الفصحي دي بحس اني بقرأ الجرنال

مش غلاسه علي اللي رد قبلي بس ده رأيي

والموضوع حلو جدا اجد

شكرا

Heba said...

@ Silver HOK
امال فقرى بتكتب ازاى
وانا بفضل الكتابه بالعاميه...بتوصل بسهوله

@ مـجـنـووون
والله حكايه ان ايام زمان الافلام كانت محترمه اكتر ديه انا مش مقتنعه بيها لان زمان ايام السبعينات الممثلات كانو بليبسوا هدوم انيل من اللى بتتلبس دلوقتى والافلام كانت اهيف من اللى بتتعرض دلوقتى
بس انا معاك فى اننا خسرنا عادتنا وتقاليدنا


@ahmed afandy
ماشي بس متبقاش تغير رئيك بعدين

@Rosie
انا تقريبا بطلت اتفرج عالاتنين
:))

@moro_wbs
ما هى المشكله بقا فى حته تقنع نفسك ديه

@ Abu Shahin
وقلبي ماله بالاخبار بس يا شاهين
:)))

@Anonymous
هو انا مش عارفه انت مين ...بس جميل انك تلاقي حد بيبص للموضوع من نفس وجهه نظرك

Anonymous said...

منطقي جدا موضوعك
واحساس في محله
وانا شايف
الحل نولع في الريموت