Tuesday, March 4, 2008

ماليش نفس

كان نفسي أنزل بوست حلوة وجميلة
أتكلم فيها عن الحياة والناس والمجتمع
أو بوست أحكي فيها موقف من مواقفي الشخصية
أو أنشر قصيدة أحبها
بس اتكسفت
وقلت يعني تبقي الناس بتموت في غزة وأنا بكتب عن حاجة عادية
قلت طيب هكتب الموضوع عن غزة وهقعد أشتم في اليهود وحكام العرب اللي ضيعونا وأدعي عليهم
وأدعو الناس للوحدة
ويمكن اجيب فيديوهات من اليوتيوب وصور للأطفال اللي ماتو ومنظر البيوت اللي اتدمرت بعد القصف
بس اتكسفت برده
وبعدين يعني ... ما احنا كل مرة بنعمل كده ومافيش حاجة بتتغير
فقررت اني مش هنزل حاجة مش هنزل لو اعتبرنا ده مجرد خواطر
ونقدر نقول ان اللا بوست ده تضامنا مع غزة وبقولهم سامحوني انا مش قادرة أعمل أي حاجة

7 comments:

Mostafa said...

2olty elly nfsy a2oolo wlahi

Hatem Mohamed Ab El Rahman said...

لا ... مش موافق على الكلام دا .. لازم نعرف مقدار حجم وثقل فعل الكتابة ... فعل الكتابة هو اللي بيحرك كل الساكنات.. هوا اللي بيه تقدر ترمي حجر في بركة المياه الراكدة العفنة اللي من 56سنة في البلد .. إكتب .. إكتب حتى لو مش قادر تكتب .. بس ماتدعيش زي مصطفى أصل دا .. داء ربنا ابتلانا بيه في مساجدنا ومع شيوخنا العجزة ... فهيا بنا ننبش في تاريخنا ونختار من هذا الإرث العتيق ما هو جيد ونرفض كل الهبل

Somaia said...

أنا معاك ان الكتابة أكيد بتغير
وإلا ما كانشي زماني لسه لحد دلوقتي بكتب
وما سبتشي المدونة
هي الفكرة بس ان الواحد في المواقف الكبيرة اللي زي ديه بيبقي نفسه يشوف ناس تتحرك أي حد يعمل أي حاجة
فلما تلاقي ان كله كلام والناس بتموت فساعتها غصب عنك بيتولد احساس بالعجز والذل غير عادي هو ده اللي بيوصلنا لحالة الإكتئاب المريعة ديه
لكن احنا مستمرين إلى أن يشاء الله بالنصر أو نموت احنا
شكرا على الرد نورتنا

Abu Shahin said...

أنا باضم صوتى لصوت الاخ حاتم
فعلا .. لا بد وان نؤمن ان دورنا فى الكتابة دور مهم ..هذا الدور خلقنا نحن من اجله ..لنغير ف الناس لتهب فى وجه الظلم والطغيان .. والكلام ده مش كلام شعارات ولا حاجة .. ولكن زى ما قال عمنا نزار قبانى فالكتابة عمل تحريضى .. بيحرض على الخير والعدل والثورة فى وجه الظلم
لا يجب ان نفقد الامل ونظن اننا مكتوفى الايدى

zamzooma said...

ياااااه يا سمية ...هو ده اللي انا حاسة بيه بالظبط

Anonymous said...

فعلا...محدش فينا هيقدر يعمل حاجة

كل واحد يعمل اللي يقدر يعمله في مجاله

فكرة البوست حلوة...ولا اللابوست بقي؟
:d

vido

Anonymous said...

بس انتى عندك حق ساعات كتير الواحد بيحس كده فعلا بس الاحساس ده مسموح بيه للانسان العادى مش لناس زيكم مسموح لى كشخص عادى مش مبدع ولا كاتب انى احس ان مافيش فى ايديى حاجه اعملها لكن انتى والناس الجميله اللى زيك اللى بتعرف تعبر وتقول لازم يفضلوا يتكلموا لحد ما يعلمونا الكلام
ولا ايه يا استاذه
تحياتى لاجمل شباب بجد