Friday, March 7, 2008

أحكام مسبقة


أحكام مسبقة


.. كم هى لعينة تلك الاحكام المسبقة .. كم تسببت فى عدم خوضنا للعديد من التجارب .. كم من مرة حكمنا على أشياء وأشخاص .. وكنا مخطئين حيال ذلك .. كم من مرة حكمنا على أنفسنا بالفشل من قبل أن نخوض التجربة وكم وكم وكم .. ولكن عزيزى القارئ دعنى أركز على (كم) واحدة من الكام (كم) اللى فاتوا دول .. والكم دى هى ..... كم عرقلت الاحكام المسبقة علاقتنا بالاشخاص من حولنا؟
فكم عزيزى القارئ ( أصله عجبنى موضوع عزيزى القارئ ده ) كم عزيزى القارئ رأيت فيها شخصا لاول مرة و (طَسِيته ) حكم بانه إنسان خنيق ورخم وغتيت .. ورصيت عيوب الدنيا كلها فيه .. رغم إنه ممكن تكون العيوب دى كلها فيك أنت ومش شايفها .. فـ "أنت ترى القشة فى عين أخيك ولا ترى الخشبة فى عينك " ..و لكنك أصدرت الحكم فوريا بانه لا يستحق دخول جنتك والتعرف على شخصك المصون .. وخلاص ثبت ف مخك أنه كده .. واستبعدته من حياتك تماما ..رغم انك ممكن تكون لم تتعامل معه المعاملة الكافية للتعرف على شخصه الحقيقى.. رغم إن ممكن يكون الشخص ده ربنا بعتهولك كى يكون له دور مهم جدا بل وخطير من شأنه تغيير حياتك .
ولا يخفى عليكم إن البعض يصدر أحكامه اعتمادا على أراء أشخاص اخرين ..وإنتوا طبعا مش مستنيين أقولكم إن ده قمه العته ؛ وبهذا تكون عزيزى القارئ قد أضعت على نفسك فرصة التعرف على .. فكر جديد - ولا بلاش فكر جديد دى - خليها ..شخص جديد ..و خبرة جديدة .. لان كل شخص .. أى شخص .. حين تعرفك عليه ستكتسب حتما شيئا جديدا .
وعلى النقيض تماما .. فكم من مرة بمجرد رؤيتك لشخص ..بُهِرت به .. بهرت بجماله أو ربما بشخصيته القوية .. أو ربما بشجاعته أو لباقته ف الكلام.
قومت حضرتك ما كدبتش خبر .. قومت مركب له جناحين ولمبة نيون .. ومش أى جناحين .. دول جناحين ( ألترا ) ومش أى لمبة دى لمبة توشيبا العربى فى الموسكى تلتميت وات .. وتعاملت معه من تلك الزاوية فهو ملاك لا يخطئ .. ترى كل ما يفعله جميلا و إن كان قبيحا .. تحب من يمدحه وتنهر بشده من ينتقده ؛ وتصبح تتتبعه وتقتفى أثره وتترصد أخباره بل تجد نفسك متلبسا - سعيدا - بطريقة كلامك المشابهه لطريقة كلامه ..تقيس الناس جميعا بالنسبة إليه ..فتجد الناس جميعها مسوخ بجواره .. وانت برفقته تجد أجمل لحظات حياتك ..وتنتظر بفارغ الصبر مقابلته مرة أخرى .. ويا سلام بقى لو كان الشخص ده مخالف ليك ف الجنس .. يا سلااااااااااام قد تتحول لقصة حب كبيرة من طرف تالت إنما ايه اخر كوميديا ............تستمر تلك الألفة لفترة.
ولكن فجأة .......... تاتاتاتاتا ........يصدمك ذات مرة تصرفه فى موقف ما .. فتصيح مسائلا نفسك فى عنف ..كيف يفعل هكذا .. ليس هو الذى من الممكن أن يتصرف كذلك .. تصطدم صدمة كبيرة من جراء تصرفه مثل البشر.. تصرف بشرى عادى قد لا يكون مخطئا فيه .. ولكنك أنت من رسمته ملاكا فى ذهنك .. ويصبح هذا الملاك البرئ أبو قلب طيب قوى .......... يصبح وغدا نقلا عن ترجمة لـ
MBC2
حينها ستسرع الى الجناحين اللذين علقتاهما فى الماضى ........ لا تكتفى بانزالهم فقط .. ولكن تقوم ب(نتفهم) ريشة ريشة وحتة حتة .. وتذهب لللمبة لتدغدغها فوق رأسه وتطلع كل فولت م الـ تلتمية على جتته .. حينها ستفقد الايمان باشياء كثيرة مثل الشرف والامانة والصدق العدل والحب.. ولم لا فقد ألبست كل تلك الصفات لذلك الشخص .. لتصبح أغنيتك المفضلة حينئذ "يا ما ف زماننا قلوب ..رسماها أعمارنا ..زى النجوم (خوازيق ) على ضل شباكنا ".
لذا عزيزى القارئ ..لا تنتقص من قدر أحد أى أحد .. ولا تُجمل احد وتحمله ما لا طاقه له به ..واعلم جيدا أنك تعامل بشر ..ليسوا ملائكة ولا شياطين ..فى دنيا البشر؛لا مخلوقات دونية ولا مخلوقات فوقية .. وتذكر دائما حرف النون اللى فى كلمة بنتولد.. " بنتولد ..طاهرين .. بنتولد .. باكييين .. بنتولد .. كما زرعة خضرة ف أرض طين ".. وتذكر أيضا الوصية الخالدة " دور ع الناس ف قلوب الناس هاتلاقى الخير والخير ف الناس " وتذكر دائما اننا جميعا مخلوقات الله .. خلقنا جميعا لهدف واحد .. ونحن أمام الله لا فرق بين عربى وأعجمى إلا بالتقوى . ولكن ..وفى خضم ذلك كله ..تذكر أيضا أنه .. " ليس سوى أن تريد .. أنت فارس هذا الزمان الوحيد .. وسواك المسوخ
"


أحمد شاهين

10 comments:

Anonymous said...

انت عامل معايا اتفاقيه ولا ايه
مش حا تكسف اقولك انى كنت الشخص ده
اللى انت بتوصفه بالظبط بكل العيوب دى
تحليل رائع وفعلا صدمتى كانت بتكون جامده واموت وكده بس تعبت قوى عقبال ما قدرت اتخلص من العيب الخطير ده
بعد تجارب كتير مريره جدا وصدمات اكتشفت بعد تفكير عميق انى السبب فيها
وبطلت الحمدلله بس انك تحط ايديك على عيب نفسى خطير زى ده يبقى تسلم فعلا الدماغ
بجد شكرا على دماغك
وطريقة عرضك وكتابتك جميله
تحيه من اعماق دماغى

Mostafa said...

gmda akher 7aga ya shaheen bgd ...w fkrtha 7lwa awi.....w 3gbtny awi waghd zay mbc 2 de :D

zamzooma said...

انا و انا بقراها كل ما اخلص جملة اقول ...عندك حق والله ...واللي بعديها ...يااه نفس اللي حصل مع فلان الفلاني ...واللي بعديها ...تصور..الواحد بيعمل كدة فعلا...حلوة بجد يا شاهين ...و عندك حق ...تليليم تليلم تليلم ....عندك حق ...

modhash afandy said...

جامدة تلتمية وواحد فولت
بس هو مين اللي بيغني بتاعت الخوازيق دي؟؟

معاذ النجار said...

فعلا الأحكام المسبقة دى مشكلة
أو ممكن نسميها الانطباع الأول اللى غالبا بيبقى خادع أو كاذب
الحل ان احنا منستسلمش للانطباع الأول ده انه يسيطر على مشاعرنا ويفضل مسيطر على تصرفاتنا وردود أفعالنا مع الناس اللى حوالينا

بوست رائع كالعادة يا شاهين
بس ايه جناحين الترا دول؟ هه

Anonymous said...

الله ينور يابرنس وربنا معاك ومعاك قلوبنا ولابلاش دى برضه ع تغير كل ماهو راسخ ومتخلف ف نفس كل واحد فينا ارزع ف الصميم اكتر
تسلم ايدك يا استاذى
احمد شاهين

azmeralda said...

يا شاهين يا جاااااااااااامد.... بجد اصلا وانا بقراها قولت اوبااااااااااا الواحد باين عليه متراقب يا جدعان... بجد تحس انها حقيقية جدا... عظمة علي عظمة يا عم

Islam Attia said...
This comment has been removed by the author.
Islam Attia said...

صدفة سعيدة

Abu Shahin said...

@ماما نجلاء الاباصيرى
شكرا ع الرد الجميل ده من اعمق اعماق قلبى..انا عن نفسى باسعد جدا لما الاقيكى هنا ف المدونة .. بس بعد كده ياريت تبقى تسيبى امضائك بعد التعليق .. هو انا باعرف لوحدى ان التعليق ليكى .. بس عشان الزوار بس
أكرر التحية مرة اخرى

@مصطفى
أنا مبسوط انها عجبتك يا شاعرنا يا جميل
وفى حاجات كتير اوى عندى نقلا من على ال ام بى سى تو ..الناس المترجمين دول عسل اوى يا مصطفى والله

@أسماء
فعلا دى مشكلة عويصة وبتحصل مع معظم الناس بس الشاطر اللى ما يخليش الاحكام المسبقة تسيطر عليه
اشطة عليكى يا اسماء

@أحمد افندى
اهو انا الواحد فولت ده يفرق معايا كتير والله يا احمد
وبعدين الخوازيق دى انا عامل ميكس لاغنية حواديت لمحمد منير .. سامحنى يا منير .. سامحنى يا مجدى يا نجيب .. سامحنى يا احمد يا منيب

@معاذ باشا
انت من الناس اللى فعلا باسعد بتعليقيها ع الموضوعات لانك انسان واع بجد ورايك بيهمنى جدا
انا مبسوط يا برنس ان المقالة عجبتك
واعذرنى عشان مقصر ف حق مدونتك الجميلة

وبعدين الموضوع عدى من غير مشاكل ... ليه الفضايح دى بس يا عم معاذ

@أكيد أكيد هانى
ما هو اصل مافيش حد ممكن يقولى يا استاذى ده الا انتى يا حبى
وبعدين ايه تسلم ايديك دى . .هو انا كنت باديك حقنة؟
ماتقطعش الزيارة يا هانى

@مى
خلى باللك انتى بتتعاملى مع اذكى جهاز مخابرات ف العالم .. ده اقل حاجة عندى عشان تكونى عارفة .. اشطة
على فكرة انتى قولتى لى انك هاتسيبى
2 كومنت
انتى مديونه لى بكومنت اشطة

@إسلام عطية
إحنا الاسعد يا سيدى

@الجميع
شكرا على تفاعلكم معنا