Tuesday, March 18, 2008

انا عادي ...بني آدم عادي



رايح طب على فين يا عنادي؟

ليه الناس شايفاك مش عادي؟

هو انت فعلا مش عادي

ولا كل الناس حواليك

افكارهم من اجداد اجدادي

وانا عادي بنى آدم عادي

لما قلت انا لسه شباب

حلمي.. اصبح م الكتّاب

قالو بطل يابني هباب

علشان تبقى من الكتّاب

لازم تاخد بالاسباب

لازم تقرا الف كتاب

بعد اما تخلص كلية

راح تلقى نفسك كداب

هو انا فعلا بقى كداب

ولا انا حلمي لسه قصادي

وانا عادي بني آدم عادي

واما في يوم حبيت من قلبي

طلعت راح تتخرج قبلي

هو ده فعلا كان من هبلي

اني سقطت ف اعدادي

ولا ده عادي؟

وانا عادي بني آدم عادي

واما شافوني جيت صليت

قالو عليا ان انا بوّخت

كانو ييجولي لحد البيت

ويقولو ليه يابني استشيخت؟

وبعدت خلاص وكمان نفضت

هو انا فعلا بقى نفضت

ولا الظالم هو البادي؟
!
وانا عادي بني آدم عادي

وساعة عيد الحب

جيت وكتبت واتريقت

قالو ده حقد

هو ده فعلا حقد بجد

ولا دي حرقة دم قصادي؟
!
وانا عادي بني آدم عادي

وقلت اعيش حالة استجمام

طلعلي شيخ بيقولي حرام

الغنى والمسرح والافلام

هو ده فعلا كله حرام

ولا ده بيقول اي كلام

احنا في وادي وهو في وادي؟

وانا عادي بني آدم عادي

رايح بقى على فين يا عنادي؟

انا شكلي هجمع اغراضي

وراح اطفش خالص يا بلادي

علشان يرضى ليا عنادي
احمد افندي

13 comments:

Mostafa said...

gmda akher 7aga ybny wlahi........bema ennak sayeb el balad b2a a7gzlak m3aya? :))

Anonymous said...

gamda yabn el eeeeeeeeeeh wallahi malhash 7al

Sumaya Rabie said...

صباح الاحباط !!! تخلي عن كل الأفكار السودا ديه وركز في انك تعمل حاجة ده أفضل بكتير ظبط النوايا وانطلق بدل الكلام المحبط (بكسر الباء وفتحها)اللي مش هيفيد بحاجة وانت عارف ده كويس وابقي اعدل الصورة وانت تشوف كويس مافيش بني ادم بيشوف كويس وهوه واقف علي نافوخه كده

SuPeR_mAz said...

mabd2yan,,,lw hat7gezlo m3ak enta 3arf ma2drsh ast3'na 3ankom :))

bs walahy gamda gdan ya ahmed,,w so7aby kaman by2ololy 3aleha gamda

Abu Shahin said...

جامدة جدا يا أحمد
وزى ما قولتلك اوعى تبطل عناد
واوعى اوعى تلم اغراضك
ماتعملش زى ناس .. هه .. زى ناس

Noha El-arabi said...

انا كنت علقت عليها قبل كده يا احمد
بس الصورة عاجباني جدا
احب اللقطات المختلفه اللي فيها لسعان كده
بالمناسبة من غير تطفل يعني انا سامعه حوار سفر كده ينوبكوش ثواب في اختكوا و تدورولنا علي اي شغلانة بره
:)
سلام

Abu Shahin said...

منورة والله يا نهى
ربنا ما يقطعلك عادة .. وتدوامى على زيارة مدونتنا الغراء

وبعدين ايه موضوع الهروب الجماعى ده
البلد دى بتاعتنا يا جماعة
مش هانسيبهالهم يخروبوها ويقعدوا على تلها

Ahmed Mostafa said...

اه طبعا احجز يا مصطفى ..بس هتعلرف تظبطنا هناك؟

انا مش محبط يا سمية ومش انا اللي مقلوب ده الدنيا هي اللي مقولبة

طبعا يا ميزو انا حاجزلك مكان في الشنطة

هو انا كان على عيني اني اسافر يا شاهين بس هنعمل..العين بصيرة وقاعد ع الحصيرة

منورة يانهى الجروب ومتانسيناش كده..
حوار الشغلانة ده بقى مصطفى يتصرف فيه
هو المنسق العام للهجرة

Anonymous said...

مين مجنون ممكن يقول انك عادى بنى ادم عادى
انت اكيد غير عادى ودى ميزة تمسك بيها للنهاية اصل الناس العادية بقت كتير
يبقى ليه تكون زيهم عادى بنى ادم عادى
حلوة جدا مليانة حماس مش احباط ولا حاجه وروحها خفيفه وفكرتها واضحة
وسيب عنادك يوديك زى ما هو عايز
تحيا العناد
NAGLAA

Heba said...

جامده اوى يا احمد
اما بالنسبه للحاله المتفشيه فيكو بتاعت السفر ديه فاحب اقولكو انى عارفه مين مصدر الحاله ديه واللى خلاها تتفشي كده...مصطفى متلعبش فى دماغ الناس

zamzooma said...

more than wonderful ....

vepoo said...

فيه مفكر اسلامي مهم اسمه عائض القرني .... الراجل ده قال في كتاب ليه اسمه "لا تحزن " كلام ما معناه يعني ان كل انسان حالة فريدة مش هتتكرر ... يعني انا حد مجيتش قبل كدة ولا هييجي زيي بعد كدة ... وانتا وهي وكلنا .....
اي حد بيفكربيدور في الدايرة الي انتا بتدور فيها دي ... وبييجي وقت - على حسب شخصيته - بيركن في ركن منها ويستقر عليه.... او يغلبه الاحباط ويبطل يدور ....
بس احنا دورنا في الدنيا اننا ندور لحد مانلاقي اللي يناسبنا ... مادام قررنا نشيل مسئولية اننا نفكر ويكونلنا رأي ومبدأ ....
عاوز اقولك .. اطمن ... ده طبيعي ويمكن صحي .... المهم متستسلمش لحالة الاحباط الي ممكن تجيلك وقوم تاني .... وجميل اوي ان الشحنة جواك بتتحول لابداع من النوع ده ...ناس كتير مبتلاقيش ده.....
وعلى فكرة .... صعب اوي حد يقع وحواليه اصحاب من نوع اصحابك .....

Ahmed Mostafa said...

ربنا يخليك يا فيبو
منونا دايما بتعليقاتك الجميلة
انت بجد بتدينا دفعة معنوية جامدة