Sunday, July 6, 2008

النظرة الزجاجية


النظرة الزجاجية



هل بردت مشاعرنا .. هل لم نعد نتأثر بمشكلات الغير .. بمشكلات المجتمع .. هل أصبح تعامل الاشخاص مع بعضهم البعض عبر لوح زجاجى .. هل لم نعد نرى سوى ما نحب أن نراه .. هل لم نعد قادرين أو حتى مستعدين لمعرفة مشاكل الغير .. و إن عرفنا يصبح دورنا المواساة وتطييب الخاطر .. وليس محاولة فهم المشكلة أو ( بعد الشر ) حلها .

قديمًا .. على ما أسمع ولحد وقت مش بعيد .. كانت من تتعطل سيارته على طريق سفر يجد الناس جمعيا بجواره .. من يقدم المساعدة ..حتى وإن كانت زهيدة فى قيمتها ؛ ولكنها كانت شهامة يشتهر بها الشعب المصرى كان ذلك الى وقت ليس ببعيد .. قبل أن يطل علينا ذلك الإعلان المستفذ والذى يرفض فيه الشخص النزول لدفع سيارة صديقه اللى راكبها .. متعللا بالتعب .. أومال ايه ده كان لسه مخلص حفلة .. فيبادره صاحبه صاحب السيارة بقوله .. ولا يهمك أنا معايا كارت المساعدة هاتصل بيهم هايكونوا هنا ف ثوانى .

أصبحت المساعدة بكروت .. أصبح حل المشاكل عبر الاتصال بالنجم المشهور .. اللى معاه المنشار لكل العقد والمشاكل اللى ف حياتنا .. مع إنه لو كان يملك حلا لمشكلتى لكان من الاولى ان يحل مشاكله والتى أفردت لها صفحات الجرائد من قبل .

و أصبح الحب بالتليفون .. فمكالمة خمس دقائق أو أقل قليلا تكفى جدا لخبير الحب فى دراسة أبعاد وجوانب المشكلة مع إعطاء الحل .. إما نصيحة أو تحفيز أو يعمل فيها أبو العريف ويطلق كلام حنجورى عتابا وتأنيبا .

وهكذا فى كل شئ حتى عند استفسارك عن مكان ما .. عليك أن تتصل بالرقم الفلانى ولكى تعرفى طريقة طهى .. اتصلى بالرقم العلانى .

ترى .. ما سبب هذا .. أهو سببه جشع بعض الاشخاص من التربح من وراء اى شئ حتى ولو كان على سبيل هموم الناس ؟؟ أم هى سذاجة المستخدمين لهذه الكروت والتليفونات ؟؟ .. أم هى ضريبة التطور التكنولوجى ؟؟.. ولكن من وجهه نظرى المتواضعة - سيبونى أنظَّر شوية - فإن الاسباب السالفة الذكر قد تكون من العوامل التى أدت الى استعمال تلك الارقام وانتشارها بتلك السرعة .. ولكن السبب الرئيسى هنا هو عدم وجود من يتفاعل مع مشكلاتك .. إنها النظرة الزجاجية .. فالاخر ينظر ولا يرى .. يسمع ولا يدرك .. ومابيحسش من اساسه .. فان وجد الاخر الذى يستطيع أن يسمعك ويتفاعل معك ويجد حل لمشاكلك .. فلن تكن بحاجة للاتصال كى يأت شخص مأجور ليدفع سيارتك المتعطلة .. او كى يعرفكِ طريقة عمل المكرونة بالبشاميل .


أحمد شاهين

القاهرة فى ..

نوفمبر 2007

5 comments:

معاذ said...

انت لمست نقاط جوهرية لنموذج تحول المجتمع التقليدى إلى مجتمع حديث
وبيصاحب التحول ده انتقال قيم التراحم إلى قيم التعاقد - على حد تعبير المسيرى الله يرحمه
قيم التراحم اللى بتعد من سمات المجتمع التقليدى بتحكمها علاقات انسانية فى المقام الأول والعلاقات دى ناتجة عن شعور الفرد بأنه عضو فى منظومة اجتماعية قائمة على الحب والتكاتف والوحدة العضوية
وده تلاقيه بيتجسد بشكل كبير فى المجتمعات الريفية اللى لسة تيار الحداثة والتغريب مطحنهاش فى سكته
اما المجتمع الحديث اللى رياح التغريب والحداثة ظبطته فهتلاقى قيم التعاقد بدأت تغلف العلاقات الانسانية اللى بتدور فيه
التعاقد لفظة جاية من العقد اللى فيه بنود وشروط جزائية ومكسب وخسارة ومنفعة وربح بغض النظر عن أى قيم انسانية تانية
مش عيب ان التعاقد يغلف معاملات المؤسسات والشركات...لكن المصيبة لما نلاقى ان التعاقد بدأ يغلف علاقاتنا الانسانية
وزى ما انت قلت يا شاهين تلاقى مشاكل الحب بقت تتحل فى اطار تعاقدى بيقوم على البيع والشراء..أشوف مشاعرك تسوى كام وأبيعلك الحل بتمنها
كل ده ميمنعش ان التراحم ممكن يظهر بقوة والتعاقد يختفى فى حالة وجود خطر داهم او مشروع موحد يجمع مشاعر الناس فى وعاء مشترك...متهيألى ساعتها هنلاقي ان العلاقات الانسانية المجردة خدت مكان الصدارة فى المشهد

Noha El-arabi said...

ازيك يا شاهين؟؟
حلو واخد كذا فكرة في سكتك
بس ليه الخطأ واقع علي اللي بيبيعوا الكلام، امال اللي بيشتروه؟؟؟
بيتهيألي غلطهم اكتر
طول شوية و اعرض افكارك كلها
زي الفل

Heba said...

شاهين انت جايب كزا فكره مع بعض ومش كل الافكار واخده حقها يعنى مفرع مزا تفريعه كده وانا تهت منك حاول تعدل فيها شويه
يعنى مثلا كلامك عن بروده المشاعر وان الشعب بقا كله مطبطباتى عالاخر مش واخده حقها
ومش عارفه بقا هو فيه فعلا ناس بتصدق الاعلانات ديه وبتتصل بيها ولا ايه اصل كلامهم اهبل اوى يعنى تلاقى الاعلان بتاع الاحاديث والسنه راجل كده صوته وقور اوى والاعلان بتاع مشاكل الحب والمستشار العاطفى واحده صوتها ناعم ونفس الراجل بتاع الاعلان ده هو اللى عامل اعلان اهداءات الفلانتين هبل يعنى
ايه الاعلان اللى انت بتقول عليه ده؟

Abu Shahin said...

@معاذ باشا
مش هاتكسف وانا باقول انى اول مرة اشوف رد احلى م الموضوع الاساسى .. تسلم ايدك يا عمى .. ولا تعليق

@نهى
ازيك يا نهى
الخطأ ع اللى بيبعوا الكلام واللى بيشتروه

@هبة
داخلة شمال كعادتك
طب ده انا بخاف اطول ف المقالات مخصوص عشان خاطرك .. بجد مش هزار لانك اكتر حد كان بيقولى ان مقالاتك طويلة :)
ولسه بتسالى الناس بتصدق الاعلانات دى ولا لأ .. أمال بقى تفسرى بايه الزيادة المهوله للارقام دى .. بيخسروا مثلا
وبعدين انتى مش عارفه الاعلان اللى بتكلم عنه ؟ انتى مش بتسمعى نجوم اف ام ولا ايه ؟ هو زى مانا حاكيه بالظبط كده .. الراجل كان معاه حاجة اسمها كارت المساعدة واتصل بيهم عشان يجوا يزوقوله العربية .. عبث

Anonymous said...

انت بجد تستاهل السلامة ع الكلمتين دول
انا بعانى منهم جدا يا راجل
وخصوصا لما تكون واحدة زيي كده
انت مش متخيل انت حطيت ايدك على منطقة وجع جامدة عندى قد ايه
انا بقول برضه انت كنت تنفع محلل اجتماعى
ايه يا عم ه مش كده والله
كل شوية تحطنى قدام مراية وتقولى شوفى اهه
هو ده اللى بيحصل
تسلم لى دماغك الحلوة يامحللى النفسى
تحياتى
مش هقولك انا مين