Wednesday, September 10, 2008

حلقه ال10 مساءّ على خلفيه اضراب 11/ 11

منى: طبعا باختصار اللى حصل ان فى مجموعه من الشباب عملوا اضراب يوم الحد 11 11 واحنا قدرنا نحصل على ميعاد مع واحد من مجموعه الشباب وهو الوحيد اللى محضرش الاضراب استاذ احمد مصطفى اهلا بيك
- احمد: اهلا بيكى يا مدام احنا من زمان نفسنا نطلع فى برنامجك
- منى: ميرسيه ده بس من زوقك ايه رئيك فيا وانا لابسه اخضر
- احمد: تجننى احسن من الابيض والاسود بتوعك اللى قرفتينا بيهم
- منى: بجد قرفتكو؟
- احمد: احنا جايين نهظر يا حاجه ما تخشي فى الموضوع
- منى: طيب بالراحه يا عم متزقش....ياريت الاول تفهمنا ايه عيش وحلاوه ديه...اصل محدش يعرف عنكو حاجه خالص
- احمد: عيش وحلاوه ده نشاط طلابي ابتدا بتمن طلاب فى هندسه القاهره من تلات سنين بالتحديد سنه 2008 وانتهى بردو بتمن طلاب هما هما يعنى كان بيجمعنا حلم واحد هو اننا نغير اللى بيحصلنا ده و نحاول نبقي ناس مفيده فى مجتمعها
- منى: ثوانى كده معلش ازاى تبقو ناس مفيده فى المجتمع
- احمد: اقولك يا ستى احنا قررنا اننا مش هنربط نفسنا بالشهاده عندك انا مثلا كنت فاتح محل موبايلات ومنفض للكليه عشان افيد المجتمع واديهم موبايلات كويسه وصالحه للاستخدام الادمى
- منى:معقول قدرت تعمل كده
- احمد: اه امال ايه هو احنا بنلعب
- منى: طيب وايه حكايه الاضراب ده بقي
- احمد: الاضراب ده احنا اعلنا عنه من سنه فى فرح سميه زميلتنا اللى هى حامل ديه وعملنا ايفنت عالفيس بوك وظبطنا كل حاجه وكان معانا 15 الف واحد عاملين اتيندنج للافينت ده ومع ذلك محدش جاه الاضراب... الاضراب ده كان عشان نعبر عن اعتراضنا على رغيف العيش البلدى اللى بقا بخمسه جنيه عشان كده عملنا الاضراب ادام فرن العيش اللى تبع وزاره الداخليه
- منى: اه عشان كده محدش اشترك معاكو
- احمد: فعلا افتكرونا مستنين العيش واللوحه اللى كنا ماسكينها افتكرونا هنجيب عليها عيش ده احنا فضلنا مضربين اسبوع والعيش بردو ماجاش
- منى: وبعدين يا احمد
- احمد: ولا حاجه حسينا بقا اننا لازم ناخد خطوه تانيه ورحنا عملنا اضراب على سلم نقابه الصحفيين واول ما وقفنا لقينا ناس جات وقفت جنبنا من غير ما تسئلنا انتو مين ولا عايزين ايه بس وفى الاخر جاه الامن واكتشفنا ان الناس ديه بتعرف تجرى ومحدش بيعرف يجيبهم فمحدش اتمسك غير العيش حلاويين
- منى: طاب احمد انت ليه مكنتش معاهم فى الاضراب ده
- احمد: مين قال ...انا كنت معاهم وهما واقفين عند الفرن ولما جينا نروح النقابه انا وقعت فى بلاعه مفتوحه و طبعا هما سابونى وقالو هنروح نعمل الاضراب ونبقي نعدى ناخدك واحنا راجعين
- منى: طيب يا احمد انت رحت زرت اصحابك
- احمد: ازورهم فين ده الدبان الازرق مش عارف يوصلهم
- منى: معانا مداخله الو؟ استاذ مصطفى ابراهيم العيش حلاوى بيتكلم من امريكا
- مصطفى:اهلا يا مدام منى
- منى: اهلا بيك تفسر بايه انك متمسكتش ساعة الاضراب وافرجو عنك على طول
- مصطفى:انا معايا جرين كارد يا حاجه يعنى اتخن تخين فى البلد ميقدرش يعملى حاجه...وانا فى امريكا الناس عارفننى كل ما اى حد يعمل اضراب يتصل بيا انزل احضر الاضراب واطلع...هى دى الحريه والديموقراطيه
- منى:طاب مش حرام عليك اصحابك اللى مستقبلهم ضاع دول تحرضهم عالاضراب وتطلع منها انت
- مصطفى: يستاهلو انا ياما نصحتهم ييجو معايا امريكا وهما مرضيوش وانا بحذر المسئولين ان السته المعتقلين دول لو مخرجوش انا هقوم الدنيا فى امريكا ومش هقعدها ولا ايه يا احمد
- احمد: اه طبعا يا مصطفى ده مى ومعتز وهبه عندهم امتحان المشروع كمان اسبوع
- مصطفى:انا بحذر لتانى مره لو ما افرجتوش عنهم الدنيا هتقوم مش هتقعد هنا فى امريكا وحبايبي بتوع الاضرابات نفسهم يخدمونى
- منى:شكرا على المداخله ومعانا تليفون تانى من السيد المسئول محمد محمد
- محمد: اهلا يا مدام منى
- منى:استاذ محمد ياريت تطمنا وتطمن اهالى المعتقلين على حالتهم الصحيه و النفسيه
- محمد: احب اقول ان المساجين دول تعبونا اوى... احمد شاهين خلقه ضيق وكل ما حد يقوله حاجه يرد يقوله انى اعترض وبيدور على تليفزيون يتفرج على ماتش الاسماعيلي...اسماء مكاوى ملهاش دعوه بحد وماشيه تلون فى الزنازين كلها....مى حازم منامتش من ساعت ما جات عشان قرفانه من الفرش مع انه زى الفل ولسه مجددينه السنه اللى فاتت...هبه بقي نايمه من ساعت ما وصلت حتى مش عارفين نستجوبها....معتز زكى الحمد لله اتصاحب على السجن كله
وده كان تقرير سريع عن شباب 11/ 11
- احمد: ابقا سلملى عليهم كلهم وقولهم انى مش ساكت عاللى حصل ده
- منى: الحمد لله اظن كده اهالى الشباب اتطمنو عليهم خلاص وشكرا على مداخلتك استاذ محمد محمد... ومعانا مداخله تانيه مدام سميه العيش حلاويه من شقتها فى الهرم
- سميه: الو ازيك يا منى وازيك يا احمد طول عمرك ابن محظوظه حتى السجن نفدت منه
- احمد: يعنى انتى اللى كنتى بايته عالبورش مانتى كمان زوغتى
- سميه: لا اخرس انا مزوغه بقرار جمهورى من بابا حسنى
- احمد: خلاص بقا اسمه بابا حسنى
- منى: ثوانى يا استاذ احمد انا مش عارفه اتكلم هو مين المذيع هنا
- احمد:طاب اتفضلي
- منى:احكيلي حكايه الافراج عنك يا سميه
- سميه:الناس لما عرفوا ان انا حامل فى التانى وعلى وش ولاده خلاص من قلبهم الطيب مسابونيش اروح المعتقل فخرجونى لحد ما العيل يروح المدرسه
- منى: ياااه
- سميه: اه اجازه رعايه طفل وانا من موقعى هذا احب اشكر الساده المسئولين على جهودهم الجباره فى المحافظه على الامن.....
- احمد: ايه ده يا سميه انتى بعتى دماغك؟
- سميه: بس يلا انت...احب كمان اقول انى معرفش الناس ديه وهما ضحكو عليا وخدونى معاهم بالعافيه
- احمد: بالعافيه يا سميه يا شيخه اتقى ربنا
- سميه: اتلهى بقا يا احمد خلينى اكمل كلامى
- احمد: لالالالالالالالالالا الا كده على فكره بقا انا هقول على كل حاجه وعالهوا كمان سميه ديه مش حامل ولا متجوزه حتى...وانا اللى ضاربلها الشهاده بتاعت الحمل ديه
- منى:؟؟؟ايه ده يا احمد
صوت طرقات عنيفه على باب سمية
- احمد: يعيش العيش حلاويييييييييييييين....عيش وحلاوه ونص رغيف .....
- منى:للاسف خلص وقت برنامجنا النهارده ان شاء الله نجيلكو بكره بحلقه جديده فى العاشره مساء




10 comments:

Gelaan said...

جميله بجد
بس كان عندي سؤال
طلعت من البلاعه ولا لسه
؟؟
هههههههههه
بجد بوست حلو اوى ولذيذ جدا
تحياتى
وكل سنه وكل العيش حلاووووووويين دول بخير
ههههههههه
الا حلوين بتتكتب ازاى
؟؟

كلام على بلاطة said...

كل عام وانت بخير

كلام على بلاطة said...

كل عام وانت بخير

Abu Shahin said...

ههههههههههههه

اجدع حاجة التنظيم الطلابى اللى ابتدى وانتهى بتمانية ده

اول مرة اعرف انك فقر كده يا هبة

اكتبى ف السكة دى عشان بجد دمك خفيف

أبو الفـــداء said...

خيال خصب ...وقلم ساخر رائع

تدوينة رائعة...


ومدونة أروع

وأفكار جميلة..

حسن ارابيسك said...

عيش وحلاوة
هو ده الشغل الواحد ياخد كده المواضيع ببساطة وبالروح دي عشان ماحدش ضغطه يعلى ويجيله سكر ويروح فيها بدري بدري
واللهي أنا بقولها اه أنا ضحكت بصوت عالي جداً في بعض المقاطع
مفيش فاية في اشعب المصري ديأبدا في عز أزمته يضحك وينكت اللهي ينكد عليهم البُعدا دول سبب البلاوي دي
ياخسارة فاتتني الحلقة بقولكم ايه هيا هاتتعاد امتى مش مشكلفة أحاول اضبط القناة قبل مانام عشان ماتفوتنيش
مجموعه زي العسل ربنا يوفقكم يارب
تحياتي
حسن أرابيسك

مجنون ميت said...

جميل جدا

Heba said...

Gelaan
الحلاويين بتاكتب كده هو
واحم طلع من البلاعه بعديها بعد ما اتقبض علينا
==============
كلام على بلاطة
كل عام وانت بالف خير
==============
Abu Shahin
اه يا شاهين انت متوقع اننا هنزيد ولا ايه؟؟؟
بيس اوى
==============
أبو الفـــداء

شكرا اوى يا ابو الفداء ومبسوطه ان المدونه عاجباك
==============
حسن ارابيسك

ان شاء الله يا حسن هتتعاد الاضراب الجاى
12 12 2012
منورنا
==============
مجنون ميت

متشكرين جد
==============

resort in the philippines said...

black mold exposureblack mold symptoms of exposurewrought iron garden gatesiron garden gates find them herefine thin hair hairstylessearch hair styles for fine thin hairnight vision binocularsbuy night vision binocularslipitor reactionslipitor allergic reactionsluxury beach resort in the philippines

afordable beach resorts in the philippineshomeopathy for eczema.baby eczema.save big with great mineral makeup bargainsmineral makeup wholesalersprodam iphone Apple prodam iphone prahacect iphone manualmanual for P 168 iphonefero 52 binocularsnight vision Fero 52 binocularsThe best night vision binoculars here

night vision binoculars bargainsfree photo albums computer programsfree software to make photo albumsfree tax formsprintable tax forms for free craftmatic air bedcraftmatic air bed adjustable info hereboyd air bedboyd night air bed lowest pricefind air beds in wisconsinbest air beds in wisconsincloud air beds

best cloud inflatable air bedssealy air beds portableportables air bedsrv luggage racksaluminum made rv luggage racksair bed raisedbest form raised air bedsaircraft support equipmentsbest support equipments for aircraftsbed air informercialsbest informercials bed airmattress sized air beds

bestair bed mattress antique doorknobsantique doorknob identification tipsdvd player troubleshootingtroubleshooting with the dvd playerflat panel television lcd vs plasmaflat panel lcd television versus plasma pic the bestThe causes of economic recessionwhat are the causes of economic recessionadjustable bed air foam The best bed air foam

hoof prints antique equestrian printsantique hoof prints equestrian printsBuy air bedadjustablebuy the best adjustable air bedsair beds canadian storesCanadian stores for air beds

migraine causemigraine treatments floridaflorida headache clinicdrying dessicantair drying dessicantdessicant air dryerpediatric asthmaasthma specialistasthma children specialistcarpet cleaning dallas txcarpet cleaners dallascarpet cleaning dallas

vero beach vacationvero beach vacationsbeach vacation homes veroms beach vacationsms beach vacationms beach condosmaui beach vacationmaui beach vacationsmaui beach clubbeach vacationsyour beach vacationscheap beach vacations

bob hairstylebob haircutsbob layeredpob hairstylebobbedclassic bobCare for Curly HairTips for Curly Haircurly hair12r 22.5 best pricetires truck bustires 12r 22.5

washington new housenew house houstonnew house san antonionew house venturanew houston house houston house txstains removal dyestains removal clothesstains removalteeth whiteningteeth whiteningbright teeth

jennifer grey nosejennifer nose jobscalebrities nose jobsWomen with Big NosesWomen hairstylesBig Nose Women, hairstyles

GeBo0 said...

اسلوبك رااااااااااااااااائع