معاني...
حلم؟
يعني فكرة من الوف
يعني تتحدى الظروف
يعني طريق مرسوم بسهم
-------
صح؟
كلنا صح مادام بجد
اصل ده مش ملك حد
بس الشاطر اللي ينجح
------
مبدأ؟
يعني طريق منه تبدأ
يعني لازم تكون مصدق
انك تقدر تحلم تحقق
-------
خوف؟
من ايه وليه واشمعنى
هي الحياة يبقالها معنى
من غير ما اشوف
------
عيب؟
سيبك يا عم ده عبط
لو عشت خايف م الغلط
هتفضل على طول غريب
------
دموع؟
يعني ضعف يعني يأس
وعشان تبقى عارف بس
كل الدموع نقطة رجوع
-----
حزن؟
اياك في يوم تسلم له
لو راح م الفرح ضله
راح يرجع تاني ويحن
------
صعب؟
كل حاجة بتيجي ع المهل
لو انت عايزه هيبقى سهل
بس لازم تتعب
-------
جراح؟
هو مين عايش مرتاح
بس كلمة السماح
بتخلي الحياة براح
------
الخوف م المقدر؟
يبقى البركة ف عم ريختر
زلزال مجهول المصدر
وهو ده الاخطر
احمد مصطفى
13 comments:
هو الصيام بيطلع الروائع دي؟
تحياااتي
بوست جميل جميل جميل :)
كلمات جميله ومعبرة عن ما يحصل لنا في الحياة
عيب؟
سيبك يا عم ده عبط
لو عشت خايف م الغلط
هتفضل على طول غريب
لازم الواحد يجرب ومش مهم يغلط بس المهم يتعلم من غلطة
تقبل مروري
مجنووون
allah 3aleek ya7mad bgd.....ykhreb 3a2lak
لا بجد ااخر حاجه بدون نقاش
احب انا اوى الكلام المقويات دة
بيعجبنى وبيبهرنى
=====================
انا بتلخبط فيكم وفى مدونه تانيه صاحبها عامل نفس النيك نيم
وافتكرتوا انتم يوم اللقاء
وسيحتلوا
بس مطلعش تبعكوا
المهم مدونتكم دى بجد بتعجبنى اوى اوى اوى
والله ينور يااحمد باشا
انا سيفتها عندى
ودة قلما يحدث
============
بيس
القصيدة جميلة جدا
مش عارفة اقول ايه؟؟
كلمات القصيدة تنساب بسهولة وبتعطيك احساس انك لازم تقرأها للنهاية.
ربنا يوفقك
تحياتي
بجد يااحمد الحالة حلوة اوى
فيها تفائل وامل كنت محتاجة اشوفه
تعبيراتك على قد ما هى بسيطة على قد ما هى جميلة وفى الجون
تسلم ايديك يا عم
يارب ما تحرمنا من موجات التفاءل الحلوة دى
نجلاء
ان كنت ممن يتذوقون الشعر العامى والزجل ، ارجو زيارة مدونتى والتفضل بالنقد والتعليق ، فالنقد كالنصح ، والدال على الخير كفاعله
كلنا نقدس مصر ، ولكن اليس من حقنا ان نغضب اذا ما انحرف بها المسار
معانى كلها موجودة حتى لو مدفونة جوانا لازم فى يوم تكسرنا وتخرج للبراح :)
روعة
تحياتى وكل سنة وانتو طيبين :)
الله
بجد جميله اوي
ومعانيها عاليه اوي
عجبني اوي الكلام دا
دموع؟
يعني ضعف يعني يأس
وعشان تبقى عارف بس
كل الدموع نقطة رجوع
انا قلتلك عليهم جامدين قبل كده؟؟
طب جامدين
متشكر بجد لكل الناس الجميلة اللي ردت
وبجد نورتونا
Post a Comment