Monday, February 4, 2008

من فوق ... ومن تحت




" البلد دي اللي يشوفها من فوق ... مايشوفهاش من تحت"... جملة عادل امام في طيور الظلام ... وبحكم اني كنت بشوف مصر من فوق النهاردة نظرا لكوني من سكان الدور 14 افتكرت الجملة دي


ليل... وساقعة وبلكونة بتبص علي مصر من فوق ومنير بيغني في وداني "ابكي... ابكي لو في عيني

دموع" ... صحيح الغنوة دي غناها منير لحبيبته بس ماعرفش ليه سيطر عليا احساس اني لو غنيتها هغنيها لمصر ... معرفش ليه حسيت اني عايزة انزل شوارعها واغني الغنوة دي...

ويبدأ منير مع " ابقي احساس الامان اللي عمره ما يبقي خوف".... صحيح هو مش البلد دي المفروض تبقي احساس الامان وليه احيانا بتتحول لاحساس خوف عجيب... خوف من حاجات قاااااااااااااد كده ....خوف من اي واحد بيلبس ابيض في الصيف واسود ومهبب علي دماغنا في الشتا ليخدك من قفاك ويوريك اللي عمرك ما هتشوفه في مصرالا من تحت... خوف من انك تصبح تلاقي ابنك عيان وانت اللي معاك مايكفيش غير انه يعالجه بلمونتين وحبة كراوية لتكتشف فقط ان الموضوع اكبر من الكراوية واللمونتين

ويسترسل منير..." احضنيني لو الغرام ممنوع "... تلخيص لكل اللي عايزاه من البلد دي ... مش عايزة غير حضنها .. حضن البلد اللي غرامها ممنوع
ايوة ممنوع علينا نحبها ... عايز تحبها حبها في سرك في صمت انما اكتر من كده ماتحاولش

طيب ازاي طالبين من واحدة بتشوف مصر بحلاوتها دي من فوق كل يوم الصبح وبتحلم انها تزل تلاقيها كده برده من تحت انها ما تدوبش في تراب البلد دي

ازاي عايزيني اخليني في حالي واقول وانا مالي واحب مصر من طرف تلات زي ما بيقولوا وانا حلمت بعلم كبيييييير اعلقه في اودتي من وانا 7 سنين

لأ مش هقول وانا مالي...

هحلم باليل وانا واقفة بشوف مصر بجمالها ده كله من فوق... وهعافر في نهارها اني اخلي اللي تحت زي حلاوة اللي فوق
وبحلم ان البراح اللي بشوفه في سماها من فوق يكون موجود علي ارضها من تحت... بحلم ان الهيبة والعزةاللي بحسهم في الهرم وانا شايفاه من فوق احسهم في ملامح كل مصري من اللي تحت من اللي كسره جريه ورا لقمة العيش... بحلم ان انوارها اللي عمرها مابتطفي ليلها من فوق تنور قلوب ناسها الطيبين اللي كتم عليها احساس الظلم والقهر
بحلم اني احب مصر من تحت زي ما بحبها من فوق
ويسترسل منير...."تبقي احساس الامان اللي عمرة ما يبقي خوف"
ازميرالدا... مي

8 comments:

modhash afandy said...

حلوة يا مي بجد..بس انا مش عارف ليه بقيت بحس ان صورة شوارعها بقت باهتة كده وساكنة بحس انها جسد من غير روح

SuPeR_mAz said...

حلوة اوى يا مى و كلنا لو دورنا جوانا هانلاقى نفس الشعور اللى عندك ده...بس بتختلف من واحد والتانى فى اللى مكبر و فى اللى بيحاول...يارب نكون كلنا من اللى بنحاول
يا احمد اللى بنفكر فيه و مقتنعين بيه بيتعكس غالبا على اللى بنشوفه

Anonymous said...

fazeeee3a ya mai ....bra3'm kol elly fo2 welly ta7t ....7oby l masr da 7ob fa7t ...bas bts3ab 3laya ....mai ...kelma 7elwa sm3taha ...e7na msh mas2olen w e7na f snena da 3an elly feha ...e7na etwaladna la2ena l bashawat 3amlen feha keda ....bas elly f edna eno lma yeegy 3alena l door w n3'ayar ...n3'ayar bgad ...aw n7awl 3la 2d ma n2dar f nafsna welly 7awalena ....sa3tha masr hatb2a a7san mkan fl donya b 2eden shababha ...w bgad hayeb2a manzarha gameel 7ata mn shbak l microbus...
zamzooma

resalawy said...

yaaaaaaaaaaah 7ELWA AWY
hya fe3lan 7elwa awy mn foooo2
w sa3at btb2a 7elwa mn ta7t
bs lma btb2a fadya w mafehash nas!!
bs bgd zay ma el o5t shereen bt2ol:
( W MADAM BN7B BALADNA TEB2A
HATET3'AYER B EDENA)

7anafy said...

a7la 7aga 2aretha mn zman.......el okht mai de yeegy mnha

Somaia said...

طب ما انتي حلوة اهه يا مي وزي الفل
عاجباني والله وقريتها من أول ما نزلتيها بس الظروف
كما قال أحمد أفندي لذيذة بلدنا أوي على فكرة فيها من المتناقضات يخلي الواحد نافوخه يفرقع

Moustafa Shaaban said...

جربي كدة في ساعة تجلي.....تنزلي تتمشي في البلدوالسماعة بتاعت أي حاجة بتطلع صوت في ودانك بتسمعي الأولة بلدي بسلطن جو موالي و دا الموصوف دوا العيان....و التانية بلدي بقول الكلمة بالعالي و عالمكشوف و في المليان.....و التالتة بلدي يا كنزي و عزوتي و مالي و ملو الشوف أوانك آن......عم الشيخ إمام

Anonymous said...

eh ya bet el gamadan daaaaaaaaaaaaa!!!7elwa awi ya mai hwa mn fo2 aked 7elwa l2en ba7es en el balad de bgad leha tabe3 mo5talef w momayz 3n ay balad tanya leha gaw kda dafiiii bs hya bardo mn ta7t 7elwa ...7elwa b nasha ..el nas eli t3bana de w btegry wra lo2met el 3esh bgad el sha3b da tayb wlahi sa7e7 tebto de m3adetsh zy zman bs tebto de we el nas de hya eli m5alya masr hya masr de..2edeha el sha2yana we we weshoshha el malyana bt3ab we torab el senen w el 3omr...;);)