Wednesday, February 27, 2008

المود قدر ام اختيار

لما تبقي ماشي وشايف الدنيا سوده، والناس حواليك بتضحك اوى، وانت تبصلهم اوى، وتفتكر انهم بيضحكو عليك وتفتكر انهم بيبصولك، ولما تشوف واحد مبوز، تبصله بحب اوى، ويبقا هاين عليك تروح تطبطب عليه، وكمان تشوف الشارع مضلم اوى، والدنيا مغيمه، والناس وشوشها كئيبه، وعيونهم كئيبه، تبص للبت اللى قاعده فى المكروباص جنبك كده، وتقعد وتطلع اسقاطاتك عليها، يعنى تقول شوف البت مبوزه ازاى(مع انها مبتسمه وزى الفل ) لا وزى ما تكون شايفه الدنيا سوده، والوانها كئيبه اوى (حتى لو كانت لابسه فسفورى) ا

انما بقا لما تبقا ماشي، وشايف الدنيا بمبي، والناس حواليك بتضحك اوى، فتروح انت باصصلهم اوى ، وتضحك معاهم من بعيد لبعيد كده، ولو شفت واحد مبوز ولا حاجة، تعمل نفسك مش شايفه، و كمان تشوف الشارع منووور وهايص، والناس وشوشها مليانه سعاده، وتبص للبت اللى جنبك فى المكروباص، تلاقيها موزه اوى(مع انها وحشه) وتحس كده انها بت مبسوطه ومتدلعه ولابسه الوان فى منتهى السعاده (حتى لو كانت لابسه اسود) ا

وممكن تكون ماشي عادى، مش حاسس بالناس اللى بتضحك، ولا الناس المبوزة، ولا حاسس بشارع ولا بطريق ولا بأى حاجة، ومتشفش البت اللى جنبك فى المكروباص اساسا .... وده اللى كلنا عايشينه، بحكم التعود على الطريق و تكرار الايام ومش هنتكلم عليها

الحاله النفسيه للبنى ادم بتأثر جدا جدا على حياته، والموضوع ده بيبدء من اول ما الواحد يفتح عينه من النوم، يعنى فى أيام بتبان من اول ما تفتح عنييك ،يعنى اول ما تصحى بتفضل تقول يارب عدى اليوم على خير، وفى ايام تبقا تصحا حاسس انك مهما حصللك فيها بردو هتفضل محافظ على مودك العالى، وفي ايام بتصحا عادى ممكن تحصلك حاجه تعليلك المود او حاجه تجيبهولك الارض

طيب وزى ما ياما المحللين النفسيين سئلو... السعاده قدر ام اختيار؟؟ انا احب اسئل .....المود قدر ام اختيار؟؟

هبة سعيد

9 comments:

zamzooma said...

heboooooz...welcome ...w a7b agaweb 3la l so2al ....mn ra2yey en el mood kadar + e5tiar ....l wa7d msh bey5tar el a7dath elly bte7salo ...w f nafs el wa2t kodreto 3la el ta7akom f modoh bta5talf mn yom lel tany ...

SuPeR_mAz said...

السعادة و الموود...طبعا الموود هو حاجة موضعية بتتغير كل كام ساعة اما السعادة فادى بتكون حاجة كده فى المجمل....يعنى ممكن الواحد مووده يبقى كويس اوى و بعدين يقلب و بعدين يرجع و كل ده و هو مش سعيد او و هو سعيد....الواحد بيقدر يتحكم فى موده بشكل كبير و ساعات بتفلت منه...اما السعادة دى بقى رزق...زى الاكل و الفلوس و كده...حاجة من عند ربنا...ساعات نستاهل ان ربنا يباركلنا فيها و ساعات حتى و اسبابها موجودة مش بنحسها عشان ربنا مش مبارك فى رزقنا عشان مش نستاهل...ربنا يباركنا فى رزقنا و يجعل ايامنا كلها سعادة و موود عالى

modhash afandy said...

انا شايف طول ما مافيش سبب يخلي المود مش تمام يبقى احنا بمزجنا بندخل نفسنا في مود خنيق وده بييجي لما بنفضل نقنع نفسنا بافكار سلبية
لكن لو في حاجة تخلي المود مش تمام مشكلة يعني او اي حاجة
يبقى ده قدر

modhash afandy said...

آه صحيح نورتي ياهبة معلش الموضوع خدني

Mostafa said...

ya mra7eb ya heba......mnwra el blog...bel nsba lel mood fna shayef enno ekhtyar labodd mnno

Heba said...

المشكله فى المود ان اللى بيحصل النهارده ويقلب مودنا ممكن يحصل بكره وميأثرش فينا خالص وفى ناس بتحصلها مصايب ومع ذلك تقدر تحافظ على مودها عالى ونفس الشخصيه ممكن تحصلها حاجه هايفه تروح متعكننه
المود لا ه قدر ولا اختيار المود حاجه كده منقدرش نصنفه لانه حلاوته تكمن فى انه ميبتصنفش
متشكرييييين عالترحيب بتاعكو

Islam Attia said...

قدر
وبعيدا عن التحليلات النفسيه و بما اني مؤمن بالطب فاقدر اقول انها تغيرات كيميائيه لعينة :D

iceman said...

i belive that we, ourselves can make our destiny by beliveing in ALLA then beliveing in ourselves....
for me....
i think nothing conrol my mood but me...
when i have alot of problems and alot of stuff to think in, i have a so bad mood..
and when i solve some problems and attend a party to mounir or wagih, i just fly whatever happens around me....
by the way, its so rare with me to be in the seconed mood..

Heba said...

ايس منور البلوج جدا
ديه حاجه
تانى حاجه احب اقول ان فى ناس كتير مودها بيتغير من اقل حاجه من مجرد التفكير فى حاجه كده يروح مودها مقلوب

وكلنا الحاله التانيه ديه نادره عندنا بس بتحصل يعنى