Thursday, March 6, 2008

اهى عييييييييشه والسلام

طبعا طبعا كلنا بنمشي فى الشارع وبنركب عربيات وبنعيش فى شقق... زى كل الناس طبعا
انما عندنا فى بلدنا المحروسه-اللى الاجانب بقو بيخافو يهوبو ناحيت القاهره من كتر التلوث-لما تيجى تمشي فى الشارع تبقى مش عارف تلاحق عليها منين ولا منين من الدوشه وصوت الكلاكسات اللى تطرش ولا من مناظر الناس اللى بتجيب اكتئاب يعنى راجل ومراته وعياله قاعدين بيحرسوا ارض ولا حاجه الراجل ما شاء الله عنده بتاع سبع عيال وقاعد يضرب فيهم هما وامهم والعيال عمالين يصوتوا وهو شغال لحد ما يتعب... تمشي شويه تشوف عيل صغير من اطفال الشوارع نايم عالارض ومغطى راسه بايده وساعات بيبقي نايم كده والدنيا بتمطر عليه... وتعدى من جنب صفيحه زباله ويجيلك اختناق وضيق تنفس من ريحت الزباله اللى تحس انهم بقالهم سنين مشالوهاش-وممكن فى نفس اللحظه تسمعهم فى الراديو بيتكلمو عن الشركه الاجنبيه اللى احنا بندفعلها ملايين عشان تيجى تاخد من الناس فلوس وتلم الزباله طاب لزمتها ايه نديهم ملايين اقولكو انا عشان المعدات بتاعت لم الزباله المقشه والعربيه يعنى-
وممكن تكون راكب عربيه- مكروباص مثلا بما ان معظم الناس بتركب مكروباصات- قاعد كده فى امان ربنا وطبعا الدنيا زحمه اوى بقالك ساعه واقف فى نفس المكان والسواق مشغل اغانى غريبه والشريط زى ما يكون سافف وانت قاعد باصص من الشباك كده تلاقي العربيه اللى واقفه ادامك اول ما الاشاره تفتح تنطلق وينطلق وراها دخان اسود مهبب يخلايك تفضل تكح وكانك هتموت وممكن مثلا لما تبقا قاعد فجأه تلاقي الناس هجمت عليك عشان يركبو -معزورين برضو مش عارفين يروحو... بس انت زنبك ايه-وتلاقي المطروباص اللى حمولته 12 نفر بقدره قادر شايل 20 نفر والكتمه و الجو مع ريحت العوادم مع صوت الشريط السافف... يارب نوصل بـــــقا
ممكن بردو تبقا قاعد فى بيتك –لو كنت قدرت توصل للرفاهيه ديه يعنى – وتلاقي بقا الميه قاطعه تستناها تيجى ساعه التانيه التالته وبعدين تضطر تنزل تملا ميه من القهوه وعادى اوى لما الميه تقطع يومين تلاته ايه المشكله يعنى – مش كفايه انك عندك ميه اساسا- ممكن كمان المجارى تطفح ادام بيتكو وتفضل تعانى من الريحه والارف والناموس و خد عندك بقا حجات كتير
وهتعرف ان كل اللى انت شايفه ده مجرد خيالك المريض هو اللى صورهولك لما تسمع الاغنيه بتاعت لؤى بتاعت الحزب الوطنى....... ابقو اسمعوها

5 comments:

zamzooma said...

الحزب الوطني ف مصلحتك .....مش كدة ولا ايه ؟؟؟....انا و أنا بقرا الموضوع عايزة اكح ...او ارجج .......مصر فيها حاجات وحشة كتير ....بس نعمل ايه بقي ....القرد ف عين امه ...غزال علي رأي المثل ...و في النهاية احب اهدي اغنية بلدنا بتتقدم بينا ...لحضرتك ...و لكل اسرة القناة الثالثة ....

Abu Shahin said...

طب هى الاغنية دى بتيجى ع القناة الرابعة ولا ايه النظام .. شوقتونا انا عايز اسمعها .. يا ريت ترفعيها يا هبة مع الموضوع عشان الموضوع يكمل ..بواب ومجاىرى وزبالة .. وحزب وطنى

Anonymous said...

معظم الحاجت اللى السيئه فى مصر سببها ناسها
اهل البلد دى بحس احيانا انهم بيكرهوها
او مش عارفين يحبوها صح
ازاى الحكومه قدرت توصلنا اننا يكون عندنا شعور بالفرديه والانفصال عن العالم المحيط بينا شغلتنا بحاجات كتيره قوى وكبرت شعور الفرد جوانا كل واحنا للاسف منقادين وكل واحد بيقول يالا نفسى وبس
بس انا كنت عايزه اعرف اشمعنى لؤى ياخسارة الواد ده صوته حلو

a7medelsayed said...
This comment has been removed by the author.
a7medelsayed said...

أصل لؤي كان واخد شقة بالقسط في مشروع مقابر الش.........آ....... قصدي اسكان الشباب و معرفش يسدد اللي عليه قاموا قالوله تغني البتاعة دي باللي عليك