Sunday, April 27, 2008

وحدوووووه

وحدووووووه

هسألك سؤال وماتفهمنيش غلط، عمرك مرة وقفت وفكرت وقلت هو أنا لو مت دلوقتي هيحصل ايه؟؟؟ حاول تتخيل شكل الحياة على الأرض بعد ما انت تموت ... أنا هحاول أرد على السؤال على انه موجه ليا أنا شخصيا وانت كمان حاول تفكر في اجابة .....

أيا كان سبب الوفاة ... فمين أول هياخد الخبر ؟ هيعيط أوي ولا من الصدمة هيسكت ومش هينطق ولا هيقول لا حول ولا قوة إلا بالله كانت بنت حلال برده .... وأصحابي هيعرفوا ازاي? ... يا ترى ماما هتتصل بيهم ولا هيتصلوا يسألوا عليا فيلاقوني مت؟؟ مين هيزعل عليا أوي ومين نص نص ومين هيترحم وهو حاطط وشه في الأرض ومين هيقول ريحت !! سألت تلاتة أصحابي بقولهم هو أنا لو مت هتزعلوا قد ايه واحدة مارضيتشي ترد أصلا وقالتلي بلاش عبط وواحد قاللي اااااااااااااد كده والتاني قاللي ايه الأسئلة السخيفة ديه و مارضيش يرد وقاللي أنصحك ماتسأليش حد تاني السؤال ده ... هي الناس مالها متشائمة من الموضوع كده ليه !! عادي يا جماعة الموت علينا حق ......فيها ايه لما أسأل مين اللي هيمشي في جنازتي؟؟ ومين اللي هيفضل فاكرني بعد ماتفوت سنين وسنين وسنين ومين هينساني بعد أول شهر؟؟

وحاجتي هتروح فين؟؟ مكتبتي العظيمة بكل الروايات والأشعار، والكتب الفلسفية اللي مابفهماش، وكتب الدين الصغيرة اللي قريتها، والمجلدات الكبيرة اللي عمري مافتحتها، والكتاب اللي لسه شارياه جديد بس ماقريتهوش . مش معقول يعني ماما تحتفظ بالحاجات ديه كلها ... وسريري ودولابي ومرايتي اللي كنت بقف قدامها ألف الطرحة و المكتب اللي كنت بحط عليه الهدوم وأسيبه وأذاكر على السرير ... ورق الكلية والمحاضرات بتاعة التيرم ده ... البراويز اللي على الحيطة ... سلة الزبالة اللي بابا علطول كان بيفضيهالي عشان عمري ما افتكرت أفضيها ... النتيجة اللي مابصيتشي فيها أبدا عشان كنت معلقاها على مسمار عالي ما كنتش بطولها عشان أبص فيها ولا حتى عشان أقلب ورقها ... وازازة الزيت بتاعتي والتوكة اللي بحبها والطرحة اللي بلبسها لما حد بيجيلنا ...عباية الصلاة ... والجلابية المفضلة عندي اللي ماما ياما اتخانقت معايا عشان معلقة عليها وسايبة بقية اللبس في الدولاب ... طب بالنسبة لجلابية العيد اللي كنت شايلاها عشان ألبسها في العيد ومالحقتش ... وكل هذه الأعداد من الدستور والمصري اليوم .. هتروح فين؟؟ هل ببساطة هياخدوها يفرشوها وياكلوا عليها ... اللي أنا في حياتي كنت مابرضاش حد يبهدل الجرنان عشان لما أشيله يحتفظ برونقه .. يللا بقى براحتهم هعمل بيهم ايه يعني دلوقتي أنا أصلا مت، والموتى لايقرأون الجرائد ... أصل معلشي يعني مهما يفضلوا قافلين القوضة حفاظا على ذكراي الغالية هيجيلهم يوم ويفتحوها ساعتها حاجتي ديه هيكون مصيرها انها تتكرتن وتتشال في أي حتة ده لو ما اترمتش ...

وماذا عن موبايلي؟؟ والأرقام اللي عليه ؟؟ هيغيروا الشريحة ويستخدموا العدة عادي؟؟ ولا هيشيلوه زي ماهو كده؟ ولا أي حد هياخده بشريحته ويمسح كل الأرقام اللي عليه؟؟؟ هيدوس على زرار يمسح بيه كل الناس اللي عرفتهم في حياتي ... خيتخلص من رصيدي الاجتماعي كله ... بس مالي زعلانة كده أنا أصلا مت مش هتفرق ... والإيميل؟؟ هيسيبوه لحد مايتقفل لوحده ولا هيخشوا عليه عشان يقولوا للناس اني مت ويقفلوه بعد كده ... ويشوفوا بقى الأوفلاين اللي فيها لينك لشريط منير الجديد ... والأوفلاين اللي فيها واحدة بتقوللي ميعاد الكورس ... ولا الإيميل اللي كان فيه صور تصميمات أنا كنت طالباها أعمل بيهم موضوع في منتدى الكلية ... آه صحيح طب والمنتدى إيه أخباره؟ حد هيخش يقولهم ولا هيسيبوه زي ماهو برسايله الخاصة اللي فيها حد بيطلب مني أضيفه عشان عايزني أكلمه عن رسالة شوية ... والتانية اللي هتبقى أكيد من حد بيطلب مني ما أنساش أجيبله المحاضرات معايا ... طب والمدونة بتاعتي؟؟ حد هيخش يكتب بوست إني خلاص هتوقف عن الكتابة للأبد لظرف قهرى وهو إني مت؟؟ ولا هيسيبها برده الناس تكتلبي تعليقات ويسألوني مابترديش على التعليقات ليه ... وليه توقفتي عن التدوين بقالك فترة ... والفيس بوك؟؟ هتفضل الـ فن وول عادي شغالة يجيلي عليها صور وفيديوهات عمري ما هشوفها ... ويفصلوا ناس غريبة تضيفني أنا ما أعرفهاش وتجيلي دعوات عشان أنضم لجروبات عجيبة ... ولا هيقفلوا الاكونت خالص !!!

ياااااااااااه كل ديه أسئلة تحتاج لإجابات ... طب وأنا أحيرهم معايا كده ليه !!! يعني أبقى متعبة حية وميتة ... لالالا لابد من كتابة وصية ... وهذه هي وصيتي يا سادة :

الناس اللي هتزعل عليا كتر ألف خيرها ادعولي بقى جامد وافتكروا كل حاجة كويسة عملتها في حياتي وانسوا الحاجات الوحشة أنا مت خلاص ... والناس اللي مش هتزعل ليه كده؟؟ على العموم كتر ألف خيركو برده بس تأكدوا إنه لو كان العكس أنا كنت هزعل جدا عليكو معلشي بقى

أما بقى متعلقاتي الشخصية ... فالمحاضرات وورق الكلية خلوا صاحبتي تشوف حد محتاجهم تديهومله يستفيد بيهم ... الكتب العلمية، بصوا هو فيه كتاب مش بتاعى أنا كاتبة عليه اسم صاحبه ابقوا رجعوهوله غير كده ودوا الكتب ديه مكتبة الكلية ... والكتب اللي هيا مش علمية بقى ولا حاجة فياريت تودوها مكتبة مبارك أو دار الكتب تبرع ماتاخدوش فلوس ... جرايد الدستور والمصري اليوم ... ممكن بدل ما تاكلوا عليهم تودوهم رسالة في إعادة التصنيع يبقوا كوبايات وكراسي وكراريس وكل هدومي برده ودوها رسالة ... لو يعني يا ماما لو مصرة تحتفظي بحاجة احتفظي بالجلابية اللي أنا بحبها وعباية الصلاة إديها لأختي الصغيرة هيا كانت هتموت وتلبسها أصلا وأنا ماكنتش برضى ... بقية حاجاتي بقى انتو حرين فيها زي ماتحبوا تعملوا بيها اعملوا لكن ليا رجاء الحاجات اللي هتتكرتن حطوها كلها في كرتونة واحدة كبيرة واكتبوا عليها من برة اسمي باللون الأزرق عشان بحبه ولو ترسموا قلب ووردة وعلم مصر تبقوا خدمتوني على الآخر والله العظيم ...

وياريت بس تشحنولي الموبايل بخمسين جنيه ولا حاجة (آخر مرة بطلب فيها فلوس) وتبعتوا رسالة لكل الناس اللي عندى علي الموبايل ... ماتسيبوش حد خالص تقولولهم اني مت خلاص وتخلوهم يدعولي ولو فضل رصيد ابقوا حولوه لأختي عشان أنا كنت مخلصالها الرصيد دايما ... وسيبوا الشريحة شغالة شهر عشان لو حد اتصل تقولوله وبعد كده اقفلوا الخط خالص واعملوا اللي انتو عايزينه بالعدة... والإيميل والمدونة والمنتدى نفس الموضوع ... هتلاقوا الباسورد مكتوبة في الكراسة اللي أنا بكتب فيها وهتلاقوا فيهاا برده في آخر صفحة اللي أنا عايزاه يتكتب في رسالة الموبايل ورسالة الايميل والمنتدي وبوست المدونة وبعد ماتعملوا كده ابقوا اقفلوا الإيميل والفيس بوك بس سيبوا الأكونت بتاع المنتدي وسيبوا المدونة مفتوحة عشان أي حد رجليه تجيبه فيها يقرالي الفاتحة ...

فاضل حاجة مهمة أوي بقى هتلاقوا في الصفحة قبل الأخيرة في الأجندة ... أسماء ناس كنت مزعلاهم ومالحقتش أصالحهم ابقوا خلوهم يسامحوني ... قولولهم ديه ماتت خلاص ... والزعل من الأموات مالوش معنى ... ماتجوزشي عليها غير الرحمة

معلشى بقى يا مصر كان نفسي أعمل حاجة قبل ما أموت لكن القدر ما أمهلنيش ... بس أنا سايبة ورايا رجالة مصر أمانة في رقبتك يا رجالة ... الناس اللي هتسافر ابقوا ارجعوا والعالم اللي عايشين فيها ومش طايقينها استحملوها معلشي قدركو في الحياة ... مصريين رغما عن أنوفكم

بس خلاص كده الحمد لله الواحد اطمن ... لو مات في أي لحظة الدنيا مش هتخرب والناس مش هتحتاس ... موضوع كئيب؟؟ لأ طبعا, الموت جاي جاي يبقى ليه ما نستعدلوش ؟؟؟ وكل ده الاستعداد بتاع الدنيا بس ما بالكو بقى بالاستعداد للآخرة؟؟ يللا السؤال متروك ليك برده وحاول تجاوب عليه ........

17 comments:

Anonymous said...

يا سمية
يااااااااااااااااا سمية
مش عارفة اكتب تعليق
على فكرة اللى اداكى لقب مدهشة كان عنده حق
انتى فعلا مدهشة
انتى عارفه انى دايما بسرح وافكر فى الحكاية دى
وساعات كمان كنت بتخيل الجنازة ومين بيعيط ومين هيفتكرنى وكنت بفضل اعيط على نفسى واحس فعلا انى مت
جميلة جميلة جميلة جداااااااااا
اجمل حاجة فى الدنيا لما يكون فى كلام جواكى وبيدور فى دماغك وتلاقى حد بيكتبه قدامك وبيطلعه وبشكل فيه ابداع وجمال
يسلم احساسك يا قمر

Mostafa said...

l post da gamed aaaaaaaad kda bgd :D

hana said...

جميل اسلوبك بالكتابة بجد سلس
واللى قولتيه ببالنا كلنا
الله كريم
يسلم قلمك الجميل

Anonymous said...

انا فعلا فكرت فى الموضوع ده قبل كده وكتبت برضه وصيه بكل ما املك من كتب وهدوم وحاجات
زيك كده بالضبط
بس الكلام ده كان من مده طويله ودلوقتى انا لو مت مش هيلاقوها
ربنا يكرمك ع الموضوع الرائع ده
انا هقوم ادور عليها
واحطها فى مكان يعرفوا يلاقوها فيه بسهوله
جزاك الله كل خير واتمنى نكون اصحاب ، انا ارتحتلك اوى:)
كلامك جميل

Maha Omar said...

انتي انسانة جميلة أوي بجد و الموضوع مش كئيب و لا حاجة الموضوع جميل و متميز و أنا كل يوم بفكر فيه
أنا هحط مدونتك من ضمن المدونات المفضلة عندي
مها عمر
مدونة تفاصيلنا

Abu Shahin said...

حقيقية حتى الثمالة .. متصالحة مع نفسك جدا
بجد بوست جميل جدا .. موضوع عن الموت انما انتى كتباه بطريقة ممتعة .. وده ف حد ذاته انجاز عالى اوى

Sumaya Rabie said...

Naglaa:
أحرجتيني انسانيا وعاطفيا
مش عارفة مين اللي اداني لقب مدهشة ده ... هو ده لقبي؟؟؟

Sumaya Rabie said...

Mostafa:
ya beta3 aaaad kda enta ;)

Sumaya Rabie said...

hana:
الله كريم فعلا
واحد شاي هنا عشان خاطر الضيفة

Yomna:
ربنا يخليكي هو أنا مريحة فعلا
دوري على الورقة مهمة جداا
ولما تلاقيها قوليلنا انتي كاتبة فيها ايه


maha:
أنا زرت مدونتك وما شاء الله فيها حاجات كتير ممتازة
واحد عرقسوس هنا يابني
ولا نجيب غدا؟

abu shahin
أقل حاجة عندي زي ما انت عارف طبعا
:D:D

zamzooma said...

finalllly l computer etsala7 ...w a7b a2ol ya somaia in el post gamed 2wy ...7'asatan el kartoona elly 3aleha warda w 2lb ....w 3alam masr ...to7faaaaaaaaaaa..

Anonymous said...

my life without meeeeeeee!?!?!?!?!?!?! ,i agree

بكيزه و زغلول said...

على فكره احنا فكرنا كتير فى الموضوع ده و خخصوصا مين اللى هيزعل علينا و مين اللى هيقول الله يرحمهم و يكمل حياته عادى و اللى مش هيكلف خاطره حتى انه يدعيلنا و الكلام اللى الناس هيقولوا علينا فى العزا بس اللى مفكرناش فى موضوع المتعلقات

Sumaya Rabie said...

@Zamzoma:
I think ennoh baz tany ... sa7? :D

@Anonymous:
Try to imagine ;)

@بكيزة وزغلول:
مع ان التفكير في المتعلقات شئ مهم، مش ديه حاجتي وأنا اللي كنت بقررلها مصيرها وأنا عايشة يبقى من حقي أختارلها مصير نهائي بعد أما أموت
نورتونا في المدونة

@all:
شكراااا يا جدعاااان، انتظروا المزيد
:):)

Anonymous said...

ربنا يكرميك بجد جدا جدا جدا
جامد جيدا
keep writing really amazing

Sumaya Rabie said...

@anonymous
شكرااااا ربنا يكرمك انت او انتي
وياريت بس أعرف مين صاحب التعليق .. امضاء بسيط يعني

Anonymous said...

Fantastic Way Of Writting Somia

For me, Yes I Thought Alot About that , Who will be sad on me , who will Cry , Who in my friends will be affected For days, and who will be for months and who will Still Remember Me For Life

who will say , "a7san fe dahya"

who will say "so what?"

and then Comes My Emails , Just like u , will my sister sign into My messengers and Send to all people that i am Dead Now :S

What will happen at UniMasr , Who will Post the News And How?

How Will My Friends knew ? and hayeego el 3aza ezay? we meen hayeegy?

El Lockers beta3ty haydawaro feeha we yela2o secret stuff i hided?

Lots Of Questions Came to My Mind , And U Wrote Some Of them :D

GoodJob Somia



IonFox

esraa negm said...

انا سمحت لنفسي بزيارة المدونة الممتعة دي والتعليق فيها
بجداحساسك رائع يا سمية
وفعلا الافكار دي بتراودني دائما وبدايتها من يوم ما اتصلت بواحدة كنت اعرفها كان بقالي شهر ما سمعتش صوتها فقلقت عليها اختها قالتلي انها توفت فكرت كتير بعدها ياترى صحابي امتى هيكتشفو غيابي لما اموت يا ترى هيعرفو ازاي ياترى هيزعلو عليا ياترى هوحشهم يا ترى هيفتكروني بالخير
يا ترى ويا ترى
والى الان لم اجد اجابة على سؤالي لأن معظم اصدقائي لما بسألهم بياخدو الموضوع تهريج ويقولولي يااااااااااااااه ياساتر ده احنا هنفرح اوي وهنقول اخيرا غارت
طبعا بيهزرو مش بجد"
بس فعلا المفروض اعمل للحظة دي على الاقل لما يفتكوني يقولو الله يرحمها ويغفرلها مش عايزة اكتر من كده
تسلم ايديكي يا سمسم