Monday, August 11, 2008

قصص من سطر واحد

قصص من سطر واحد


تحية لرائدة هذا الاتجاه فى المدونة ...... الزميلة العزيزة .. سمية




- فَتَحَت الباب .. فبادرتها الشابة

" صباح الخير يا حاجة .. أنا داليا مندوبة شركة ( أولويز ) .. عندك بنات يا حاجة ؟ "

صفقت الباب فى وجهها .. أسنتدت ظهرها إلى الباب الموصد .. واستسلمت للجاذبية .. فى حين اغرورقت عيناها بالدموع .



- أخرجَ ( كان ) البيبسى من صندوق الزبالة .. و أفرغ ما تبقى منها فى فمه.. ثم وضعها بجانب رفاقها فى الشوال ... نظر إلى السماء و تسائل .. هل سياتى اليوم الذى سيشرب فيه علبة كاملة بمفرده ؟!.



- قرر أن يحيا مثاليا .. فمات . ثم قرر أن يحيا حقيقيا .. فعاش.



- لم يرَ فى طريقه شجرة إلا و صعدها إلى منتهاها .. متحملا كلام من يكونوا ف الطريق حينئذ .. كان يخيل له إنه بمجرد انتهاءه من الصعود .. سيكون بمقربة من السماء .. لكنه فى كل مرة كان ينظر إلى السماء بعد صعوده فلايزال يجدها بعيدة عنه بكثير .. ولكنه رغم ذلك لم يسأم الصعود .. متحملا كلام من يكونوا فى الطريق حينئذ .



- قالتَ له وهو ينزلُ من فوقها ...

"حظ سعيد المرة القادمة "

دارى دموعه وحزنه وإخفاقه خلف ضحكة بلهاء .. فقد تربى منذ صغره على ان " الراجل مابيعيطش " .



- كان يريد كل شئ .. فلم يحصل على أى شئ .



- كان من الممكن أن يصبح مدخنا شرها .. إلا إنه عاش حياته محاولا ألا ينساق وراء تلك العادة الذميمة .. عاش هكذا .. إلى أن مات بسرطان الرئة .




أحمد شاهين

مايو 2008

15 comments:

Anonymous said...

صحيح هى الرائدة
بس معلش يا سمية ما تزعليش
ساعات التلميذ بيتفوق على الاستاذ
اخدت وقت طويل عشان اعلق عليك
وحياة ربنا ساعات ببقى فعلا مش عارفة اعلق لان الكلام بيكون كتير ومش عارفة اخرجه ولان الكتابة بتكون جميلة جدا وبتوجع لدرجة كبيرة
ساعات بيكون تعبيرك ورد فعلك الوحيد هو الصمت اللى هو السكوت لانك مش عارف تقول ايه سكت الكلام زى ما بيقولوا
بس كل اللى اقدر اقولة انى حبيتهم اوى
وانهم كل واحدة فيهم وصلتنى لحالة مختلفة وان كان بيجمع بينهم كلهم حاجة واحدة
هى الوجع
بصراحة انا اتوجعت اوى
عجبتنى جدا المعنى فى القصة دى
انه كان برضه بيطلع الشجرة بالرغم من كل شىء عايز يوصل للقمة مهما كان حواليه
تحياتى يااجمد احمد فى الدنيا
مش محتاجة اقول انا مين
ولا ايه

Noha El-arabi said...

:)
ابناء الاسماعيلية قادمون
استمر للمرة الاولي بعد المليون الاول

Somaia said...

أحلى واحدة فيهم بتاعة المثالي اللي مات والحقيقي اللي عاش

بس معلشي برده الأصل أصل والتقليد تقليد
:P:P:P

Anonymous said...

روحى العبى فى الجنينة شوية يا سمية
احنا اصلى اصلى يا بنتى

Blue Bird said...

الله .... أحلي ما في الابداع خروجه للنور
انا سعيد جدا بالتعارف ، واعتذر عن التأخير لبعض مشاكل النت
وحقيقي انا سعيد حدا من اللي منشور ، بس انا محتاج وقت لاستكمال القراءه ، ممكن المراسله علي الايميل وارجو مداومة الاتصال
محمد الغزاوي
elghazawy@gmail.com

Blue Bird said...

اسم المدونه ... محضر اثبات حاله ، ان الكل مساجين
لكنه بيقول للخوف لا احنا آه ممكن نكون مساجين لكن مش خايفين
انتم مين؟؟؟؟
خقيقي انا سعيد بالتعارف
محمد الغزاوي

Foxology said...

والله افكار حلوة مفيش كلام بس قصة الرجالة مبيعيطوش مش عارف انتو قاصدين منها ايه ولو اللى ف بالى مش كان الأحسن نجيبها مستعارة عن كدة شوية ؟؟ مجرد رأى مش اكتر :)

خدو القصة دى كمان

تصفح المدونات كعادته كل صباح ثم قام بالمرور على تلك المدونة الشابة قرأ افكار الآخرين ووجد متنفسا للتعبير عن رأيه فى بلد لا يسمع الا رأى واحد

تحياتى :)

كراكيب said...

اولا: البلوج كلها عسووولة جدا

ثانيا: حلوة اوي فكرة ان حبة صحاب يعملوا مدونة مع بعض

ثالثا بقى: البوست فعلا تححححححححفة
والجمل فظيعه مش عارفة اقول انهي احسن من انهي
انا حبيتهم كدة كلهم كلهم
اعملوا كدة تاني بقى وتالت وسبعتاشر وسبعة وسبعين .. ماشي؟؟

miro el niro kwaniro

عاشقة القمر said...

البوست بجد جامد آخر حاجة .. بجد حلو اوي .. مع انها جمل صغيره بس فعلا تحس انها قصص بتبتدي وتنتهي زيها زي اي حكاية طويلة .. كلهم جامدين جدا جدا ومعانيهم حلوة اوي اوي .. وانا مبسوطة اني جيت هنا وعجباني مووت فكرة المجموعة .. ربنا يخليكم لبعض ويكبر البلوج بيكم كلكم

Amgad said...

لا لا لا
دانا فاتني كتير اوي عندك يا بوحميد
مواقف هايلة بجد
والي الامام دائما

Mostafa said...

gamda keeeek ya wad......w mtz3leesh ya somaia y3ny.......:D

Abu Shahin said...

أمى .. نجلاء طبعا
والله بجد انا اللى لما قريت كلماك ده عملت زى ما انتى كاتبه كده بالظبط بجد والله ماعارف اقول اى حاجة غير شكرا كبيرة جدا ليكى يا اجمل ام ف الدنيا

نهى
طبعا ابناء الاسماعلية قادمون
شكرا يا نهى

سمية
اصل مين وبتاع مين بقى .. خلاص راحت عليكى وفعلا تروحى تلعبى ف الجنينة كده شوية :)
انا مبسوط بجد انها عجبتك

أ محمد
بجد انا سعيد بمعرفة حضرتك جدا وحضرتك كتاباتك هايلة بجد بس الظاهر ان حضرتك مش فاضى شوية
وانا فى غاية الفرحة بجد من كلام حضرتك الجميل ده وانا طبعا اللى سعيد بالتعارف

فوكسولوجى
انا مبسوط جدا انها عجبتك بجد
ولكن انت عندك لبس شوية
هى المدونة جماعية اى نعم لكن واحد بس اللى بيكتب الموضوع يعنى انا كنت اقصد منها اننا بنتربى على ان الراجل مابيعيطش بس هو ده القصد
واحب اقولك ان قصتك دى احلى من كل القصص اللى انا كاتبها :)

ميرو النيرو كوانيرو
انا مبسوط اوى ان المدونة عجبتك وبجد المدونة جميلة بيكوا وبتعليقاتكوا اللى بتدى للواحد امل وبجد طاير م الفرحة ان جملى عجبتك

عاشقة القمر
بجد انا مبسوط برايك ده جدا وبجد مش مجاملة انتى مدونتك جميلة جدا

امجد باشا
ربنا يخليك يا امجد
وبجد انت فنان .. انا قريت شعرك لما كنت بتنزله ف ضربة شمس كان جميل بجد وقريت بوستك الاخرانى على مدونتك اكتر من رائع يا امجد .. انت فنان جميل

مصطفى
ربنا يخليك يا معلم
سمية مين وبتاع مين يا عم
:)

حسن ارابيسك said...

مجموعة من القصاقيص التيتحمل فكراً لم ينفصل عن هموم هذا الوطن
والحقيقة كل فكرة وفكرة رغم انها محتاجه بوست لوحدها لكن الحقيقة كلهم في عنقود واحد لاينفصلون
تحياتي
حسن أرابيسك

possy said...

ماكنتش اعرف ان معانا ناس جامدة كده فى ضربة شمش يا احمد، بجد انا فرحانه بيك اوووى،
القصص رغم انها سطر او سطور قليلة لكن فيها كلام كتيرر يخللى الواحد بعد مايخلصها يفكر فيها انت اختزلت معانى كتيرة فى كام كلمة لمست قلب وعقل الواحد فعلا )
اكتر واحده عجبتى " طالع الشجرة، ووجعتنى " كان البيبسى
ربنا يوفقك وانا مبسوطه ان اتعرفت عليك من خلال كتابتك
GO ON ( possy)

Abu Shahin said...

انا اللى تحياتى يا حسن يا ارابيسك
بجد تعليقاتك بتفرحنى جدا وخصوصا انك فنان كبير
مبسوط جدا ان القصص عجبتك


بوسى
لا .. من هنا ورايح تعرفى
:)
ربنا يخليكى يا بوسى
بجد انا ماستاهلش ربع كلامك الجميل ده
ومبسوط جدا ان القصص عجبتك
ومبسوط اكتر بمعرفتنا