Thursday, August 21, 2008

انا كنت انا




انا كنت انا فى يوم من الايام
بعدين بقيت واحد تانى
هو مين ده
و ليه اخد مكانى
و انا ايه غيرنى
و ايه خلانى
انسى نفسى
انسى طريقى و انسى حلمى
و انسى مكانى
هو الحب بيحير
ولا العمر بيغير
ولا الدنيا خلت انا ينسانى
و يكون واحد تانى

انا كنت انا فى يوم من الايام
بعدين بقيت واحد تانى
هو مين ده
و بيعمل ايه هنا
و ليه اختارنى انا
ولا فى ناس تانى
صحيوا من هم جوانى
على هم برانى

هو ليه عنده شعر ابيض
و ليه قلبو عرف الاسود
و ليه بقى بيقول انا
مين ده
ده مش انا
ده واحد تانى
قلبنى فى المحفظة
و استولى على عنوانى
وورقة و شهادتين متزورين
جابلى صحاب تانين
برضه مضروبين
ليه بستنى حد منهم
 و ليه فيهم بسال
طلعوا ولا نزلوا
هما صحاب متلفقين
صحاب الواد التانى


و انا لسه زى مانا
بسال و بيتسال عنى
بزعل و لسه بحس
و بيتزعل منى
انا لسه زى مانا
باشوف البحر افرح
و اخاف لو فيه غيوم
و لو معايا صحابى
بنخلع الهدوم و ننط في البحر
نلعب و نعوم

انا لسه زى مانا
بحلم احب و اتحب
لسه بحس
لسه عندى قلب 
لسه اما اشوف قطة
بجرى وراها
ساعات ارخم عليها
و ساعات العب معاها
و مش هادارى يعنى
لسه بخاف مالكلب

انا لسه زى مانا
ممكن دموعى تنزل
ممكن مالكلمة ازعل
و ساعات باعمل زعلان
و انا اصلا باستهبل
 انا لسه زى مانا
لسه بالعب اولة
و اجرى ورا الحجر
و لو وقعت اضحك
و ساعات اتدارى
و بجد بعملها
ممكن ادوق ورقة شجر

انا لسه زى مانا
بزعل عالورد لما بتقطف
لسة برئ
ساعات اخاف
و ساعات اكون جرئ
و بجد بجد
والله لسه باتكسف

انا لسه زى مانا
بس الناس مش شايفانى
 مش فى مكانى
مش لاقينى
انا فى مكان تانى
ماتخافوش
شوية و راجع تانى
هاروح ادور عليا
واما الاقينى
هاديكوا نمرتى
و يمكن كمان عنوانى




اخوكم : معتز
SuPeR_mAz


9 comments:

walid said...

gamda ya mo3taz...nazelhalna fel dostor b2a

Abu Shahin said...

جميلة بجد يا معتز
ولو لقيت الواد التانى اللى بتدور عليه قولى لقيته فين يمكن الاقى انا كمان الواد التانى

معلش يا معتز رد ع السريع كده

بس بجد هايلة

Desert cat said...

توهنا من نفسنا وبعدنا عن حلمنا
مبقيناش عارفين مين انا ولا انت مين
تعبيراتك قوية جدا يا معتز
تحياتى

Noha El-arabi said...

احلي حاجة قريتها يا معتز
بجد حلوة اوي اوي

Mostafa said...

gamda awi ya mezo.....mna a7la l 7agat elly ktbtha bgd

Heba said...

حلوه يا معتز بدايتها قويه ونهايتها قويه بس اللى فى النص مش اد كده وطولت منك شويه


جو اون

shahenda said...

بجد دا اللى كلنا حاسيين بيه
دا اللى انا كان نفسى اكتبه
انا دلوقتى فعلا بقيت مش انا
الله عليك

ShimaaMahdy said...

ان شاء الله هاتلاقيك

بجد كلمات جميله

تحياتى(:

Foxology said...

والله مش عارف اقول ايه يا معتز

جميلة اوووووووووووووووووووووووووى

لالالا جميلة ايه ؟ دى رائعة بجد

بس مش شايف انها تحريف لأغنية المطرب الكبير عبد الباسط ( انا مش عارفنى ) ولا ايه ؟؟ :)))

تحياتى وفى انتظار المزيد :)