Wednesday, October 1, 2008

عيد





عيد..
هو ده عيد ده ..
فاكر العيد ايام ما كنا عيال.
لما كنا ننزل نصلى العيد ..
انا و أنت و حودة ومحسن والواد جمال.
ونطلع نغير بسرعة ونروح نادى المنتزة..
ونطلع على شجرة الجميز ونجيب حب العزيز..
اللى كان دايما يجيبلنا اسهال.

*******

طب فاكر السنة اللى امهاتنا جابتلنا فيها ..
بناطيل قطيفة انا وانت والواد بلال.
طب فاكر موضة البنطلون الباجى..
اللى كان مليان جيوب قدام وورا ويمين وشمال.
وفاكر كمان الجاكيت الدابل فيس..
اللى كنا بنمشى فيه زى التمثال.
ما كانش لينا اى راى .. طبعا مش كنا عيال.

******

طب فاكر لما كبرنا شوية..
و ظبطت انا والبت امال.
كانت امورة اوى ..
وجميلة اخر جمال.
تعرف ... اخر مرة شوفتها من سنة ..
كان معاها 3 عيال.
اوعى تقول لجوزها اننا اتقفشنا قبل كده..
ف بير السلم عند الواد بلال.
احنا ما عملناش حاجة ..
مش باقولك كنا عيال..


أحمد شاهين

17 comments:

Anonymous said...

الله عليك
مش ممكن جمالك وخفة دمك
بجد ممتع جدا
انا بصراحة شديدة مش عارفة ابطل ابتسام
تأثير الكلام اكبر من اى كلام ممكن اقوله
يخرب عقلك يا واد
انت جبت الكلام ده منين
بجد مجرم
اسعدتنى جدا فى وقت بجد كنت فى اشد الحاجة
انى افتكر يعنى ايه عيد
ايوة هو ده العيد
كلامك خلانى افتكره واحسه تانى
ربنا ما يحرمنا من ابداعك ياابو شاهين
انت طبعا عارف انا مين

Heba said...

ايه الطفوله المشرده ديه يا شاهين
ليه متكلمتش عالبمب والصواريخ؟؟ولما كنت بتاخد جنيه عيديه وتبقا الدنيا مش سايعاك من الفرحه؟
حلو يا شاهين بس البحر ضايع
استمر

ahmed afandy said...

ههههههههههه

جامدة يا شاهين

possy said...

بجد حلووووه اوى يا احمد
فاكرتنى بايام كنا عارفين السعاده والفرحه
واحلامنا كانت بريئة وبسيطة

A.SAMIR said...

تصدق بالله
احلى حاجة قريتها النهاردة
كل سنة وانت طيب ويارب لا نحرم من ابداعاتك
تحياتي

Noha El-arabi said...

هههههههههههههه
بتهرج؟
طبعا واضح ان اسماعيلية مأثرة علي خلفيتك الابداعية
نادي المنتزه ده تبعنا يا جماعه بقي
:)
كل سنة و انت زي الفل

Mostafa said...

ana b2a 7a2ol l gozha w 7wdeek f steen dahea ya waty :D.......gamda kal3ada ya sheen w kol sna wenta zay mnta kda

Anonymous said...

يا شاهين يا جامد...والله زى العسل
منونة

hager za3bal said...

خلاص
اوعي تعرف حد تاني لحسن جوزها يعرف وتروح في داهيه
ههههههههههههههههههه
كل سنه وانتم طيبين
:)

iceman said...

so nice one shahin...
but you talked about the feast in the past.......
what about now...
why it isnt a feast...

حمادة زيدان said...

هههههههههههههههههههههههههههههههههه

والله دمك عسل والبوست شربات جداً


كل سنة وانت طيب

وابقي سلملي على أمال !!!! ههههههههههههههههههههههههههههه

SuPeR_mAz said...

يخرب بيتك

انت ظبط مع امال انت كمان

طوول عمرك كبير يا معلم

SuPeR_mAz said...

يخرب بيتك

انت ظبط مع امال انت كمان

طوول عمرك كبير يا معلم

حسن محمد توفيق said...

الكل بيقولكم:

كل عام وانتم بخير

بس أنا مش هقول زى الكل ولكن هقول:

أنتم خير لكل عام

وأهديكم عطر الورد وألوانه

أرسل خطاب أنتم عنوانه

أهنيكم بقدوم عيد الفطر

وأيامه

والود ودى.. اجمع كل ورد العيد

وأكتب على كل وردة :

يارب أشوفك سعيد

Foxology said...

فعلا العيد زمان كان ليه طعم علشان كنا عيال

كل سنة وانتو طيبين :)

!!_Reham_Amr_!! said...

اللـــــــــــــه عليك بجد
وحياة ربنا تحفففففة ودمها خفيف اووووووووووووووى
ربنا يوفقك فى كتاباتك
ماشاء الله على اسلوبك بجد

Anonymous said...

grwebsite narratives artworks itemized ijurq scream groupnedp trying caveat spillover vlpo
lolikneri havaqatsu