Sunday, February 24, 2008

غسل قلوبنا المطر





غسل قلوبنا المطر
زي ما غسل شوارعنا
ورسملنا ابتسامتنا
طب كنا فين ورجعنا
ده جه في وقته تمام
طيّرنا فوق وطلعنا
شال من كلامنا الزهق
والخنقة من مواضيعنا
في شاب حيران واقف
حوالين الفكرة طايف
يمكن في يوم زي ده
راح ييجي ويودعنا
وشاب طفل مزقطط
واقف عمال يتنطط
بيقول نحسبها ليه؟
م الجد خلاص شبعنا
وبنت واخدة راحتها
نقط المطر صاحبتها
بتقول هنطير لفوق
ومين بقى هيمنعنا؟
وبنت رافعة العلم
لاقية لفرحتها معنى
وعيون الناس علينا
بيقولو ازاي واشمعنى
اصلهم ميعرفوش
ده خلاصنا من مواجعنا
بينا وبينه كلام
لو قربت هتسمعنا
غسل قلوبنا المطر
زي ما غسل شوارعنا
ورسملنا ابتسامتنا
طب كنا فين ورجعنا
واهو ماشي خلاص سايبنا
رايح لفين وبايعنا
للخوف يتحكم فينا
من تاني يجمعنا
من ارضنا هيقلعنا
وف ارض خوف يزرعنا
غسل قلوبنا المطر
زي ما غسل شوارعنا
ورسملنا ابتسامتنا
طب كنا فين ورجعنا


احمد افندي

7 comments:

Anonymous said...

يا أحمد تسلم ايدك لانك عبرت عن الحالة أوي ... وكمان اهم حاجة يا جماعة أنا حسيت فعلا ان المطر غسلني

واحده من الناس said...

تحفه بجد
المدونه كلها رائعه
المواضيع كلها حلوه ودمها خفيف
GO ON

تحياتي

Mostafa said...

tsda2 nfsy nakhod soora kolna t7t el mtra wlahi w n7ottha 3al blog.........gmda kal3ada yabo 7meed

Sumaya Rabie said...

بتغسلنا فعلا رغم ان انا اللي اجيتك الفكرة بس انت أبدعت يا فنان
التلميذ تفوق على أستاذه
:P:P
عاجباااااااني

zamzooma said...

gamda moooooooot ya modhesh ....bas t5aly l wa7d bardan aktar ma hwa ....msh n3ml 7sab l nas elly 3andaha bard

SuPeR_mAz said...

walahy 100% ,,,, w fe3lan lama el donya matart nesena kol 7aga w 3eshna bgd,,,,rbna yeg3l ayamna kolaha matra w ahmed yektb 3aleha

Sumaya Rabie said...

yaaaaaaaaaaaaaaaah
zekryaaaaaat