بعد ضهر الخير يا مصررررر

احنا ( جيل التمنينات يعنى ) اتربينا زمان ( قبل الدش والرسيفر ومشروع وصله لكل مواطن ) على برامج صباح الخير يا مصر ومساء الخير يا مصر وحاليا استبدلو مساء الخير يا مصر بالبيت بيتك عشان لقوه مش جايب همه....المهم البرامج ديه كل مهمتها فى الحياه انها تثبتلك بالدليل القاطع والبرهان الساطع ان مصر بخير وان الحكومه بتاعتنا بتبذل قصارى جهدها من اجل راحه المواطن الفقرى البطران على النعمه وان يا ناصح مفيش توريث ولا حاجه وكله بالانتخابات النزيهه ( النزيهه اوى )

ودلوقتى ظهرت برامج تانيه بتفضح ادامك الحكومه وبتثبلك بالدليل القاطع والبرهان الساطع ان حكومتنا حكومه زفت والحياه فى مصر بقت سوده والقادم اسوء

انا بقا احترت اتفرج على انهى فيهم.....لو اتفرجت على القنوات المحليه هحس بالعته لان اللى بيتكلمو دول بيقولو كلام مالوش اى علاقه من قريب او من بعيد بالواقع بتاعنا و هصدق الكلام اللى بيتقال وابتدى ارضي بالموجود وخلاص....ولو جبت الدش واتفرجت على البرامج التانيه هلاقي الكلام بييجى عالوجيعه وممكن يجيلي اكتئاب واحساسي باّدميتى هينخفض ومش بعيد يتلاشي ( ديه تبقا مصيبه ) والنتيجه الطبيعيه انى مش هقدر اشتغل ولا اعيش

اذا...فالقنوات المحليه رغم مصداقيتها القليله فهى بتعمل حاجه حلوه اوى فى الناس....اللى هيا حسن الشعور بالدنيا...زى المخدرات يعنى....وبالتالى بتخليهم يقدروا يشتغلوا ويعيشوا من غير اكتئابات بس طبعا مش هيقدروا يبدعوا او يقدموا جديد لانهم اصلا عايشين فى كدبه

وعلى الجانب التانى هتلاقي ان البرامج التانيه بتوجه كل تفكيرك فى ازاى تغير الوضع ده وازاى تبدع وازاى تبقا مختلف وازاى تتبطر على الوضع الحالى....من غير ما تعيش الواقع

طيب فين الحل؟؟؟ اقولك ....اولا مفروض تفهم ايه غايه كل واحد منهم...دول عايزين يغطوا على اخطائهم بالبرامج اللى بتقنعك ان غلطهم ده فى مصلحتك...ودول عايزين يجذبوك انك تتفرج عليهم ويقنعوك انهم بيفهموك الحقيقه...والاهم بقا انك توصل لان الاتنين بيخدموا نفس الهدف وكل كلمه بتتقال على الفضائيات محسوبه ومتراقبه ومعروفه والا مكنتش فضلت شغاله لحد دلوقتى

فى بقا حل تانى

احنا نعمل برنامج جديد بالمذيعين الارضيين على القنوات الفضائيه عشاننضرب عصفورين بجحر ونسميه

"بعد ضهر الخير يا مصر"

هبه

نهايات مفتوحة....أوي

وحشتني أمي ....
ودعوتها ليا....
ف مكالمة دولي...
قبل ما تقوللي سلام....
وتقولي مالك؟.... وأرد مالي؟؟...
أخر تمام......
وتقولي صوتك مش عاجبني..
.و أقولها دا دور زكام.....
وقبل ما الدمعة تخوني....
أقول ألوووو......الصوت بيبعد......
واقفل قوام......

ووحشني خالي....
وحضنه اللي ريحته.....
ريحة سجاير....
تايهة ف عباير....
برفان رجالي......
وخالي ملوش أولاد ولاد....
غيري أنا.....
و زيي تمام....
ملوش معاد....
ويومه بسنة......
ويشتم ف مصر ويلعن خرسها.....
وانا ألعن ف حسني وجمال وف حرسها....
ونضحك.....
واقوله طيارتي بكرة.....
ف يسكت.....
يطلع علبة سجايره......
وياخد سيجارة.....
ويقطع نفسها...........

مصطفى ابراهيم

ف طريق البحث عن الحقيقة .. اوعى تعيط .. مفهوم

ف رحلة البحث عن الحقيقة .. هاتمشى ف طريق طويل وهاتشوف حاجات كتير هاتجذبك وهاتبقى عايز تفضل جنبها .. ولو مشيت وسبتها هايبقى نفسك ترجعلها
ولما تمشى ف طريق البحث عن الحقيقة .. هاتقابل محطات كتير .. هايبقى نفسك لوتقعد و تستريح وتعيش مع الناس اللى فيها لاخر العمر .. كل الناس اللى فيها .. سواء اللى شبهك او المختلفين عنك .. ولو انت حقيقى بجد هاتحب الناس اللى شبهك من كل قلبك .. وهاتتقبل الناس المختلفين عنك وتحبهم .. وهاتكون مستعد ف اى لحظة انك تساند الناس المختلفين عنك قبل الناس اللى شبهك .
ولكن ولانك انسان حقيقى ومابترضاش بانصاف الحقايق .. هاتسيب المحطة دى برغم كل مافيها من فرحة وراحة وحب .. وهاتكمل لمحطة تانية .. المحطة اللى هاتعرف فيها ناس كتير برضه .. وهاتلاقى نفس الصوت اللى بيقولك ما خلاص اقعد بقى خليك هنا .. لكنك برضه بتسيبها وتمشى فى سبيل بحثك عن الحقيقة .
وعلى فكرة مش كل مرة انت اللى هاتسيب المحطة وتمشى .. لأ .. ساعات كتير الناس اللى ف المحطة هما اللى هايسبوك ويمشوا .. ساعتها اكيد هاتكون اصعب عليك لكن اوعى تزعل او تعيط او تياس .. واعرف انه" لو غاب (قمر) مليون قمر طالع" .. وانهم هما كمان سابوا المحطة ومشيوا .. لانهم ف طريقهم للبحث عن الحقيقة زيك بالظبط .. وانهم سابوك ومشيوا ..عشان ف طريق البحث عن الحقيقة مافيش حد مطالب انه يمسك حد من ايده ويوديه لاخر الطريق .. الباحث عن الحقيقة بيساعد الناس بس ويرشدهم انه فى حياة تانية غير اللى معظم الناس عيشاها .. حياة احلى وامتع ..حتى لو الناس العادية قالوا عكس ده .. حياة اكيد فيها متاعب ومصاعب .. لكنها احلى بكتير من الحياة المملة الجامدة الناشفة .. واللى فيها مصاعب برضه .
ولازم تعرف كويس انك على قد ماهاتعرف ناس .. على قد ما هاتودع ناس ، وعلى قد ما تعيش تجارب ..على قد ما طريقك هايبقى ممتع اكتر .. حتى لو كانت التجارب دى قاسية عليك حبتين ..لكنك طول مانت مصدق انه" لو ف يوم راح تنكسر لازم تقوم واقف كما النخل باصص للسما "يبقى خلاص انت مايتخافش عليك يا معلم و "الطريق مفتوح قدامك ابدر جواه احلامك" لكنك لازم "تمد الخطاوى عشان مشورارك لسه طويل" وماتنساش وانت ماشى ع الطريق "تعلى صوتك بالغنا

أحمد شاهين

Beyond the Hand

Put your hand infront of your eyes, spread your fingers and look at them...how many fingers are they?!!.......concentrate, take your time looking...now how many fingers do you see??!!! (I'm kinda sure that you started to think am stupid now) if the answer was the same number then you just have looked to your fingers and thought in your mind they are five fingers or you even didn't look cause you previously know their number, and unconsciously your mind thought it's a well known granted answer why would i think…Well let me tell you that you just satisfy your self by understanding things the way they look to most of the people....if you repeated the hand thing i told you about, but this time try to look in deep, toward your hand but behind it, until your eyes get an overlapped image...now how many finger you see..!! some have realized what I'm aiming for...for those who didn't get to it… they are ten fingers, some might got what i wanna say…others think this was a waste of time, so let me get to the point directly...think of it it(your hand) in another way, not that you use it to eat or to hold things using it...u can make hand shadows with it, u shake hands with it, u can cuddle somebody with,, u can say it's the main mean of physical communication...So don't look to things by the conventional way, why don't we have a wide look, why we always lock our minds in a corner,,, it's not about imagination or creativity, it's about how we deal with situations or how we deal with our thoughts...if you think with less limits, removing the barriers of the previously assumed ideas, if you looked to things from different corners and different points of view...you wont see unclear or uncompleted images for anything anymore,, in fact you will get dazed of how clear images will be, how simple things will get, how easy handling situations will be and how smooth you will deal with your feelings thoughts and ideas...and more and more,,, just look from more than a window,, widen your thoughts, look widely,, look beyond the hand....

سمعوني زغروطة بقى ... لولولولولوولولولولولولولولوي

سمعوني أحلى زغروطة بقى .. لأ مش هتجوز .. بس جالي عريس عقبال أملتكومعلشي أنا مش قادرة ما احكيش الموقف ده .. أصلها أول مرة تحصل بالشكل ده معايا يعني .. اللي هو يجيلي واحد ويقعد في الصالون مكسوف والحوارات ديه .. اسمعوا بقى التفاصيل وقولولي بذمتكو حاجة تفطس من الضحك ولا لأ؟ عشان ماما مصرة انها حاجة ما تستاهلشي اني أضحك لحد ما عينيا تدمع يعني
صلوا على النبي

أنا كنت خارجة مع واحدة صاحبتي ماشي؟ .. وبعدين واحنا بنتمشي ومروحين خلاص .. لقيت واحد بيبيع ورد .. قولتلها تعالي نجيب ورد .. وللأسف الراجل ماكانشي عنده ورد أحمر قاللي للأسف مافيش بنوزعه كله عشان الفالانتين ..ناهيك عن إني بصيت لصاحبتي بإستغراب وبعدين سألت الراجل هو البتاع ده امتى؟ قاللي يوم 14 .. يا راااجل؟ ابقى فكريني بيه يا إيمان بيه والنبي

المهم بقى .. طبعا الطريق زحمة .. وأنا أصلا مشيت متأخر .. فداخلة البيت الساعة 9.30 تقريبا .. ماما واخواتي بره البيت عند خالتي .. وأنا طالعة على السلم عمالة أغني أصلا وماسكة الورد في ايدي وعمالة أغني الدنيا ربيع والجو بديع قفلي على كل المواضيع قفل قفل قفل .. ومع قفل الأخرانية كنت بفتح الباب بالمفتاح .. لأفاجئ ببابا قاعد في الصالة (احنا حاطين الصالون في ركن كده في الصالة) وقاعد معاه واحد .. بيبصلي بإندهاش أوي .. من هنا فصاعدا بقى الكلمة اللي هكتبها بين قوسين هي اللي كانت في بالي وماقولتهاش

أنا بقى داخلة ورافعة الورد في وشي زي ما بكون بأدي طابور التحية العسكرية وشايلة البندقية .. ربنا ستر وماكتش برقص بقى كمان .. المهم لقيت كائن في وشي بيضحك .. رحت منزلة السلاح (الورد يعني) وكشرت في إندهاش وبصيت لبابا بصة تحمل معنى (مين الأخ؟!) وبعدين غصب عني ضحكت وقلت : (سلامو عليكو) ودخلت حطيت الورد على الترابيزة .. وانتو عارفينني بقى .. صباح التلقائية يعني .. ببص على الكنبة اللي في الصالة لقيتها مكركبة بغباء . عمار أخويا الصغير كان بيعمل إختراع صاروخ .. وساب مخلفات الإختراع بقى عليها .. ولك أن تتخيل مخلفات صاروخ بقى .. اشي ضمغ واشي مواتير وأسلاك ولقيت قلم كان ضايع مني وكان فيه شمعة مش عارفة كان بيعمل بيها ايه .. (يادي الفضيحة .. ايه المنظر ده) وقفت ألم الحاجات كلها بقى وبعدين حطيتهم في الدرج وقفلت عليهم .. بابا بيقوللي إعملي شاي بقى يا سمسم ( ده وقت دلع يا حاج) .. حاضر يابابا .. دخلت المطبخ ولعت على المية .. وبعدين إفتكرت إني عطشانة أوي فخرجت تاني جبت إزازة المية .. وبعد شوية إفتكرت إني ما سألتوش كام معلقة سكر .. فخرجتله .. قلت من باب إكرام الضيف أسأله لو يحب شاي أخضر ولا حاجة ..

أنا: شاي أخضر ولا عادي؟

هو: أنا مش عايز أتعبك والله

أنا: (ياختي كميلة اخلص يا كتكوت) لا والله مافيش تعب ولا حاجة .. ها أخضر ولا عادي؟

هو: خلاص أوك ناخده جرين ... وراح ضاحك

أنا: (ده عبيط ده ولا ايه مافيهاش تضحك) بالنعناع؟

هو: لالالا .. لا نعناع ولا سكر

دخلت المطبخ تاني صبتله الشاي وبعدين قلت المفروض أجيبله كوباية مية .. هيا ماما بتشيل كوبايات المية فين؟ لقيت كوباية كده عاملة زي ما يكون كان مزروع فيها قلقاس .. غسلتها وبعدين خدت بالي إن أنا شربت الإزازة كلها .. يعني المفروض أخرج تاني عشان أجيب إزازة وبعدين أرجع تاني أصبله في الكوباية وبعدين أروح خارجة مقدماله .. فاضياله أنا بقى .. رحت حاطة الكوباية فاضية .. كنت بفكر أعملها مقلب وقلت بلاش بابا ذنبه ايه .. رحت شايلة الصينية على ايد واحدة زي القهوجية بظبط .. وفتحت الثلاجة بالإيد اتانية طلعت إزازة مشبرة .. وحطيتله الإزازة والصينية جنب بعض .. وقلتله اتعامل بقى ..

قاللي: مرسي على تعبك والله ..

أنا: (ربنا يهدي) ابتسامة حاولت أخليها رقيقة بس والله أعلم كانت زي ابتسامة صورة الفيش والتشبيه

دخلت جوه .. وبعدين شوية وخرجت أدور على الشاحن بتاع الموبايل .. بصيت عليه مالقيتهوش فبقوله معلشي بص عليه جنبيك كده .. قعد يبص عليه .. أنا زهقت دخلت وسبته .. شوية وافتكرت ان الكاميرا بره وأنا عايزة أشحنها .. خرجت جبتها من بره .. المهم اني في كل مرة أخرج أبصله شذرا كده وأبص لبابا ما معناه ( ياعم الأشكال اللي انت جايبها ديه) .. وبعدين بابا سألني بيهيص هو كمان : هو انتي كنتي فين بقى؟

أخ ايه السؤال ده .. أقوله ايه ده؟ أقوله كنت فين يعني؟ كنت صايعة مع صاحبتي بنلف؟ قلت لا ما بديهاش بقى نديها كدبة وربنا يسامحنا .. واهو برده الواحد يترسم شوية

أنا: كنت في الساقية يا بابا .. ورسمت على وشي علامة (اكيد في مكان مهم هو أنا هروح فين يعني إلا أماكن مهمة)

راح الباشا بقى رادد

هو: ساقية عبد المنعم الصاوي؟

أنا : (تخيل؟ سبحان الله يعني) آه

هو: بتحضري بقى ولا بتروحي تقعدي وخلاص؟ ها هاها

أنا: (بس ياد قوم روح يللا) لأ بحضر طبعا...

هو: بتحضري ايه بقى؟

أنا: (وانت مالك ان شاء الله؟ عبيط عبيط) بحضر أي حاجة مواعيدها تبقى كويسة حفلات ندوات أمسيات

هو: بتحضري عمر خيرت؟

أنا: لاااااااااااااا بتبقى غالية أوي

زمانه قال عليا مش لاقية آكل

هو: ليه بكام يعني؟أنا: بأربعييييييييييين جنيييييييييييه بحالهم .. بستخسر بصراحة

هو: مش غالية أوي يعني

أنا: (ما انت تلاقيك على قلبك رزم رزم) لأ غالية طبعاااااا .. بناقص يعني أنا بحضر حاجات رخيصة .. بلاك ثيما اسكندريللا وسط البلد كده يعني

وبعدين لقيته هيصاحبني بقى رحت داخلة وسايباه .. شوية افتكرت ان الشاحن بتاع الكاميرا بره أصلا رحت خارجة تاني جايباه .. والله زمانه بيقول عليا يا هبلة يا بستهبلشوية وافتكرت اني سايبة الورد بره .. رحت قايمة جايبة الفازة ومالياها مية ورحت قدامه بقى فتحت الورد ورصيته في الفازة .. وعايشة كأنه عم عبده السفرجي مثلا .. وبعدين رحت باصاله ورفعت راسي في إباء وشديت الفازة ودخلت .. وأنا داخلة وحاضنة الفازة قلت لبابا: أنا قاعدة جوه بقى لو عزت حاجة نادي عليا .. بابا أول ما دخلت راح منادي عليا .. نعم يا بابا (ده من جوه بزعق يعني) قاللي مش عايز حاجة قولتله احنا هنهزر بقى مش كده؟آخر مرة بقى طلعت .. كنت عايزة الكتاب بتاعي اللي سايباه على الترابيزة .. فالترابيزة قدامه أوي وأنا مش هعرف أعدي عشان أجيب الكتاب قولتله: ناولني الكتاب ده الله يخليك .. وهو متحمس بقى راح مديني الكتاب .. والبيه بيهزر بيقوللي: ده كتابي على فكرة مش كان قدامي؟

أنا: (كر كر كر كر .. ياخراااابي ايه الظرف ده ...قوم روح بدل ما أخليك تندم انك تعرف أبويا) لا على فكرة ده كتابي بقى .. ومكتوب عليه إسمي كمان .. ورحت داخلة جوه

شوية والراجل مشي بقى .. وبعدين ماما رجعت من بره .. وأنا قاعدة في أمان الله في قوضتي بقرا رواية صالح هيصة بتاعة خيري شلبي ومستمتعة بقىماما من القوضة التانية: سمية تعالي عايزاكي

أنا: عملت كأني ما سمعتش .. شوية وهتزهق

ماما راحت باعتالي عمار روحي كلمي ماماروحتله

اأنا: نعم يا ستي؟

ماما وعلى وشها ابتسامة الأم اللي جايبة لبنتها عريس وفرحانة بيها: ايه رأيك في الراجل اللي كان قاعد مع أبوكي

؟أنا: الراجل الكوميدي ده؟

ماما: كوميدي ليه بس يابنتي؟ ده راجل ملو هدومه .. وبتقرالي من الورقة بقى .. عنده شقة 160 متر في مدينة نصر ومرتبه ألفين جنيه ومهندس كمبيوتر ...أنا: هو مديكي السي في بتاعه تشوفيله شغل ولا ايه؟

ماما: لأ أصله متقدملك وكان جاي يقعد مع أبوكي عشان يطلب ايديكي

أنا: لا والنبي؟ احلفي كده

ماما: يابنتي عريس والله

أنا: عريس!!! وانفجرت في الضحك لحد ما عينيا دمعت ... وكل ما آجي أتكلم أفتكر منظري وأنا داخلة بالورد ومنظري وأنا داخلة خارجة داخلة خارجة ..

أنا: يا ماما تلاقيه أصلا قال عليا بنت هبلة والله .. هو مش هييجي هنا تاني

ماما: لا يا بنتي ده معجب بيكي أوي

أنا: أتاريه بقى كان عمال يبصلي أوي ... نظام الله ديه طلعت عينيها ملونة .. وبتنور

ماما: أفهم من كده ايه؟أنا: مش موافقة طبعاااااماما: يابنتي ده بيشتغل في الكويت وراجل محترم وعنده عربية موديل الفين وسبعة

أنا: بس يا ماما الله يخليكي بدال ما أموت من الضحك

ماما: انتي هتقعدي في أرابيزي في الآخر أنا عارفة .. من كتر خطابها بارت

أنا: بضحك بضحك بضحك بضحك بضحك بضحك بضحك
زغرطي يا اللي ما انتيش غرمانة

جايلي عريس محترم وابن ناس وعنده شقة 160 متر في مدينة نصر وبيشتغل في الكويت وبيقبض 2000 جنيه لولولولولولولولولولولولولولولولولولوللوولولولولولولوللوي

Somaia Rabie

10/2/2009

مالناش بخت

خلاص يا مصر..ملناش بخت
مهما علي حسي مهما صرخت
مكتوب علينا فراقنا والوداع
سلام يا احلى ام واخت
بس عايزك
لما تيجي تودعيني
عند باب المطار
اياكي تبكي
او تفتكري
ان انا اللي خدت القرار
صدقني
كان غصب عني
مكنش ادامي اختيار
انا عمري ما كنت قاسي
ولا عمري هبقى ناسي
ترابك اللي في اتمرمغت
حبك ده اصلي وكياني
وحضنك اللي اواني
انا عمري عنه ما انسلخت
وابقي سامحيني
لو يوم غلطت او لبخت
كل ده كان

من ورا قلبي
يوم ما تعبت فيكي ودوخت
ملقتش ليا مكان جواكي
ولقيت القدر بيبعد خطاكي
وغيوم بتحجب لون سماكي
علي حسي

صرخت
ليه يا زمن بوخت
طلع مالناش بخت
سلام يا احلى ام واخت

احمد مصطفى

عييييييييييش وحلااااااااااااااااااااوة في الدياااااااااااار

يوم التلات 13 يناير 2009

كنا وكونتو معشر عيش و حلاوة في جريدة الديااااااااار

: )

شكر خاص للصحفية الاستاذة عبيرالعربي

هتشتري ايه بنصيبك في مصر؟؟

"يا باشا احنا عيلة بتبيع أعضاءها عشان تحسن من مستواها الاجتماعي"

ماجاش في بالي وأنا بقرا خبر بيع أصول مصر في الجرنان غير الجملة ديه من فيلم لهنيدي ... بنبيع أعضاءنا فعلا ...

لما تبقى الأرض بتاعتك ومحتل يحتلها .. فانت تعمل مقاومة شعبية وتحارب بأقصى قوة عشان ترجع أرضك ليك من تاني ... ساعتها انت بتدافع عن حقك ... انما لما تبقى انت اللي بايع بيتك بنفسك .. انت اللي بعت ... ساعتها عايز ايه؟؟ مش من حقك ترجع تاني تقول أنا عايز أرضي ... مابقيتشي أرضك خلااااااص

هشتكنا وبشتكنا يا ريس .. بس كفاية هشتكة بقى الله يخليك ... قلبي وجعني من الهشتكة ... دول بيبيعوا أًصول البلد !!! ومكتوبة كده في المصري اليوم مكتوب : بيع كل ما يمكن بيعه من أصول البلد ..... يا لهوي !!! وعشان ماحدش من الشعب يفتح بقه هنوزع على الشعب القمور أسهم مجانية في الشركات ديه .... وياريته كل الشعب ... ده اللي أكبر من 21 سنة بس ... والباقي حقه محفوظ في صندوق الأجيال ... طب بالنسبة للورث؟؟ طب هما كده عملوا حساب الشعب اللي لسه هييجي؟ ظلم في التوزيع وكأن الشعب هو حبة الناس اللي عايشين دلوقتي .... تقريبا هيسمموا الأسهم ديه عشان يبقى ده آخر جيل من الشعب ...

سؤال يطرح نفسه .. طب الحكومة هتستفيد ايه؟ لا يا عزيزي هيا من جهة مستفيدة مستفيدة طبعا بس حدد الأول انت تقصد ايه بالحكومة؟ لو تقصد بيها التعريف الصح للحكومة الحكومة اللي بجد فهيا مستفيدة انها هتحط رسوم بيع على الصكوك ديه ... دمغة يعني فيطلعلها قرشين حلوين برده

أما بقى لو تقصد بالحكومة الحكومة بتاعتنا .. اللي هما رجال الحكم والمحيطين به وكلاب السلطة فدول بقى مش مستنيين جنابك عشان تقولهم هيستفيدوا ازاي ... أصلا اللي سعادتك بتاخده ده الفتات اللي وقع منهم وهما بيهبروا الهبر الكبير

أصل انت مش فاهم

هما الأول كانوا بيبيعوا الحاجة واحدة واحدة ويمصمصوا براحتهم وينقنقوا ويشفطوا البهاريز من جواه ... كلوا كل الهبر السمين التقيل، العضم اللي فضل نفسهم عافته فقالوا نستفيد منه باننا نديه للشعب ... اهو مننا خصلنا من قرفه وغمه وهمه .. وخلصنا من الرأي العام وكلامه اللي مابيخلصشي (قال يعني كان بيهمه) وبرده يطلعلنا منه سبوبة حلوة ... تفكير اقتصادي ميه في الميه ...

خد بالك بقى من حاجة كمان ... انت دلوقتي هتوزع على مين؟ على الغلابة اللي مابيفهموش حاجة في الاقتصاد غير ان الكام ملطوش اللي معاه مش هيقضوه لآخر الشهر ... وبتقوله كمان ده قيمته دلوقتي 2000 جنيه بس خد بالك ياعم الحاج .. البتاع اللي معاك ده ممكن يخسر ... يعني ما نضمنالكشي أي حاجة ... شوية وهيلاقي السهم بيخسر فعلا ... هيعمل ايه؟؟؟؟ أكيد هيبيع طبعا

وهنا يسألني قارئ ومين اللي هيشتري؟؟ أرد عليه في سرعة وحسم :أي حد يا عزيزي مش هيفرق .. هتسألني ليه؟؟ ما يمكن اللي يشتروا مصريين ... هرد عليك ساعتها في سرعة وحسم أكبر : أي حد معاه فلوس .. يبقى حرامي ... بقت قاعدة خلاص صدقني .. أصل قوللي واحد معاه مليااراااات هيجيبهم ازاي من غير ما يدي ده رشوة ويعمل سمسرة غير شريفة ويبيع في السوق السودا؟ شفت بقى؟ أكيد حرامي

طب رجال الحكم دول ماعندهومشي دم ومش فارقة معاهم .. ماشي عارفين ... ده شئ مفروغ منه ... انما احنا؟؟؟!! هنحس امتى بالخطر؟؟ الناس اللي في الشارع ديه هتتحرك امتى وتحس ان فيه أزمة؟؟؟

آخر سؤال بقى هسألهولك ... هتشتري ايه بنصيبك في مصر؟

بقول لماما هتشتري ايه بنصيبك في مصر؟ قالتلي هنشتري بيهم لبس الشتا .. ماما كانت بتهزر .. بس تفتكر لو سألت واحد يوميته 15 جنيه .... الاجابة هتختلف كتير؟؟؟ ما أظنش

اشتري بنصيبك في مصر أي حاجة ... بس هتعرف تشتري بيهم دفا؟؟ حتى لو كان بيجيلك هربان ... هتعرف تشتري بيهم شوارع بتلمك؟ حتى لو كانت مش علطول بتفهمك... هتعرف تشتري بيهم ناس شبهك؟؟ حتى لو كانوا شبهك في الحزن ... هتعرف تشتري بيهم وطن؟؟ ... حتى لو وطن بيكرهك؟؟ ...

موسم

بيع يا تاجر فيها حته ..بعد حته

بيع دا موسم ...ينتهي علي شهر سته

يتوجد فيه اللي يشري دمه ده ...بأعفن جاكتة

مشي سوقك ..بص فوقك

...

شوف فلوس ...و البس بافتة

بكرة تنقص حته ...حته

بعدة تخلص ..الا حته

و بعد بعده نجيب كارته

تساع جاكته مع بافته

و نشوفلنا بقي اي حته....

اسماء

مصطفى سافر
:(

كراسة طفل صغير

عندما وجدت امامى كراستى فى الطفولة
تصفحتها...لم اجد كتابة سوى فى خمس صفحات
قرأتهم...و على الفور انتقل لجسدى شعور لم اعرف ماهو حينها...
هو شعور جيد انطبع على مع كل كلمة قرأتها من الكلمات التى كتبها فى صغرى
بالفعل هو شعور جيد و خالص من اى شوائب
لم اهتم بالورق الذى اصفر لونه
و لم انتبه لذرات التراب التى غطت الصفحات
و لم اكترث بركاكة اللغة و الاسلوب او حتى السقطات الاملائية
كل ذلك لم يؤثر على هذا الشعور بالنقاء و الصفاء مع قراءة كل كلمة
اتدرون لماذا؟؟
ليس لانى انا من كتب هذا الكلام
و لكن لان هذا الطفل الذى كتب هذا الكلام كان بريئا...بسيطا...لم تترك الحياة تفاصيلها المعقدة على وجهه الصافى النقى
ببساطة
لانه كلام خرج من قلب له بريق قلوب الملائكة

تذكرت كيف كانت تلك الكراسة جديدة و لها رونق... كانت صفحاتها ناعمة ملساء...بيضاء...
السطور ممتدة مستقيمة فى تأهب و شوق...متشوقة لان يكتمل جمالها بكتابة بعض الكلمات المضيئة عليها...
هكذا كانت.
ثم عبس وجهى لما رايته من حال تلك الوريقات التى انكمشت اطرافها و اصفر بياضها...
ما عادت تعكس ما يشع عليها من ضياء , و كيف تلمع و قد ا ُغرقت فى بحر من التراب...ذرات تراب متناهية الصغر تجمعت و تكاتفت حتى صارت بقعا كبيرة متجمعة سويا لتشكل جدارا ثقيلا ملقى على تلك الورقة البيضاء المسكينة... فتراها تختنق بعد ان اغلق الغبار مسامها و تنازع تحت حمل هذا الجدار...و كانك اذا اردت ان تكتب عليها مجددا اضطررت ان تنفخ ما عليها من تراب حتى يزرق وجهك... و ما ان تكتب كلمتان حتى تستقر ذرات التراب التى نفضتها او ياتى غبار جديد ليخيم مكان القديم...

من العجيب انك قلما تجد طفلا له رائحة كريهه...و ان وجدت فصدقنى تلك الرائحة تنبعث من ملابسه لا من جسده...فما بداخله لم يمت لتنبعث منه تلك الروائح النفاذة...اما عن الكبار...فما ادراك و ما ادراك...
عطور و مزيل للرائحة و ما الى ذلك...كل هذا لندارى ما ينبعث من داخلنا...من تلك القلوب التى كمكمت لندرة وقوع النور عليها...و اذا حدث فيكون نورا مصطنعا قصير المدى...يقتل اطراف البقع البكتيرية و يترك اصولها لتتفشى من جديد...

ما احلى هؤلاء الاطفال قبل ان تلوثهم الحياة
ما اجمل تلك الراحة التى نشعر بها مع الاطفال و البهجة التى نحصل عليها بمجرد النظر فى عيونهم الطاهرة النقية من الادناس...
لا شئ اصعب من ان تحتفظ بهذا القلب الملائكى...
و لا شئ اكثر حزنا من ان ترى برائة طفل و انت تعرف مصيره و مصيرها...

ورقة صفراء...منكمشة...تنبعث منها رائحة كريهة

مواقف مصرية

هكذا نحب!!

اعلم ان معالم الرومانسية تغيرت كثيرا مع ثورة التكنولوجيا التي نعيشها..فلم يعد هناك شوق ولهفة وكلام من اللي بقينا بنتريأ عليه ده..لان الموبايل والنت قرب البعيد ..لكن في رومانسية..اكيد لسه في...دخلت انا محل موبيلات زي اي حد..دخلت بنت بعدي ..وما اكثر البنات اللي بيدخلو محلات الموبيلات..لكن هي مختلفة هذه المرة..اكتشفت من كلامها انها الحب القديم للشاب صاحب المحل..جمل عتابية..ردود حارقة ..صعود وهبوط بنربات الصوت..انتهى الموضوع برده.."عايزاني ابعتلك مسدجات ليه ؟...مش قولتي خلينا اخوات؟"...لبس بعدها قناع الحكمة والرزانة..ثم خرج صوته رخيما.."انتي عارفة ..فودافون عاملة الدقيقة ببريزة من 1بالليل ل 9 الصبح..انا مشتركتش في العرض ده..لسه ملقتش البنت اللي اضيع رصيدي عليها طول الليل..اول ما هلاقيها هشترك" ..ياعين امك يا خويا...الغريب ان البنت اتأثرت جدا!!!!

شهادة وفاة!!

صاحبي..ايوه بتاع التحرير...توفى والده في الاسكندرية..طبعا حادث اليم..ولكن الحياة لابد ان تستمر..ذهب صديقي لمنطقة العامرية في محافظة الاسكندرية..لاستخراج شهادة وفاة والده تحضيرا لسفره امريكا..بعد معاناة ومشي في الصحراوي ..وصل المكتب..واستخرج الشهادة ثم عاد للقاهرة..ذهب بها لاحد المكاتب ليستخرج بها اوراقا اخرى..وما اكثر الاوراق في بلدنا..اخذت الموظفة منه الشهادة ..وتمعنت بها واذا بها تقول " متنفعش..مكتوب التاريخ بس مش مكتوب سنة كام..تروح للموظف اللي طلعهالك..وتخليه يكتبلك السنة" رد صاحبي "انتي عايزاني ارجع اسكندرية تاني عشان اكتب 2008 وارجع؟...انا هكتبها انا"هنا ظهرت على وجه الموظفة كل معاني الاخلاق و الذمة وصرخت"اياك..ده تزوير" رد هو" لأ هكتبها"...اخذ ورقة بيضاء وبدأ في تقليد خط الموظف حتى وصل للمراد..وبعد ربع ساعة عاد للموظفة.."الشهادة اهه"..نظرت اليها.."انت اللي كتبتها..شاطر يا حبيبي" ثم ختمتها له!!!

هارديز!!

تقولي اكتر حاجة تخنقك في الدنيا ايه؟...اقولك اني افضل ملطوع مستني حد ويـتاخر عليا..وافضل واقف مبعملش اي حاجة غير اني اتفرج على الناس والناس تتفرج عليا..ليا واحد صاحبي بارع في الموضوع ده..عنده استعداد يلطعك من الوقت ما تشاء..ودايما عنده الحجة بتاعة "مواصلات الهرم زفت"...ساعة ونصف بالتمام تأخير..وانا قاعد على السور الحديدي اللي ادام هارديز التحرير.. الحقيقة المرة دي مادبش جوايا الملل بالدرجة اللي تخليني اتخانق معاه لما ييجي...حبيتين طماطم واقفين جنبي (بنتين)..نظرات مستفزة ابتسامات بلهاء ...قلت في نفسي "ياااااه لو معانا عربية......كنا دوسناكو"..مفيش ربع ساعة وجم حبيتين خيار(ولدين)واخدو البنتين وبدأت السلطة....بائعة جرايد توقف تاكسي "اخر طلعت حرب يا اسطة"!!!..طبعا مش محتاج اوصف المسافة بين اخر طلعت حرب وميدان التحرير...امال بتبيع جرايد ليه؟...شاب يطارد بنت بصراحة الشاب كان معذور..هي كمان كانت مستفزة..وقفت البنت فجأة ادامي "قوله حاجة ده.. ماشي ورايا من الصبح" ..انثى بقى بستنجد بيا..وانا اعز الانـ.....قصدى الشهامة اوي...منزلتش من على السور ..وده لسببين الاول اني مش ناوي اخد موقف كبير مناصرا ليها..ثانيا مضمنش الواد اللي قدامي...فبكل هدوء ورزانة بصيت للواد"في ايه يا كابتن؟"..الغريبة انه منطقش وانسحب بهدوء..قولت جه دوري عشان امشي وراها بداله..لكن صاحبي جه

احمد مصطفى

بعد القمار والسرمحه

بعد القمار و السرمحه و الهلس كله......

مفاضلش غير المروحه م العفش كله.......

و فاضل كمان حته حشيش.......

من قرش ماكنتش لفيته كله.......

و ع الحيطه صوره لواحده حلوه.....

لابسه… لكن مش لابسه كله.......

و كاسى اللى فاضى......

اللى واقف قصادى.....

و لون التراب.....

خلاه رمادى.....

بقى زيه زيى مالهش عازه.....

اول ما تفضى اخر ازازه....

اصل اللى زيى حيعيش لماذا......

لو عاش لوحده.....

العمر كله.....

مصطفى

على مد الشوف

.

.

.

.

على مد الشوف
على مد البصر
علامات تعجب
و رفعة و ضمة
و شدات و كسر
حروف و نقط
و صح و غلط
مراكب ورق
مراكب زلط
مفيش مركبة
ليها نور او بصر

طريق طويل
بيفط اعلانات
فيها احلام
اوهام طموحات
متزخرفة فى يفط
مع احلى بنات
لا شايف اللى جى
ولا حابب اللى فات
سايب وراك خراب
و قدامك سراب
لا قلبك صحى
ولا منه و مات

على مد الشوف
على مد البصر
مفيش غير خوف
و قلب اتكسر
لكنه لسه مندى
مع انه اتعصر
هايهرب بعيد
و ينسى البشر
مهاجر
مسافر
لابعد حدود
و نابذ 
و كاره
فكر الوجود
هايهرب و ينسى
دناوة البشر
يمكن يلاقى مكان
فيه ينتصر

.

.

.

.

اخوكم : معتز
SuPeR_mAz

عيد

عيد..
هو ده عيد ده ..
فاكر العيد ايام ما كنا عيال.
لما كنا ننزل نصلى العيد ..
انا و أنت و حودة ومحسن والواد جمال.
ونطلع نغير بسرعة ونروح نادى المنتزة..
ونطلع على شجرة الجميز ونجيب حب العزيز..
اللى كان دايما يجيبلنا اسهال.

*******

طب فاكر السنة اللى امهاتنا جابتلنا فيها ..
بناطيل قطيفة انا وانت والواد بلال.
طب فاكر موضة البنطلون الباجى..
اللى كان مليان جيوب قدام وورا ويمين وشمال.
وفاكر كمان الجاكيت الدابل فيس..
اللى كنا بنمشى فيه زى التمثال.
ما كانش لينا اى راى .. طبعا مش كنا عيال.

******

طب فاكر لما كبرنا شوية..
و ظبطت انا والبت امال.
كانت امورة اوى ..
وجميلة اخر جمال.
تعرف ... اخر مرة شوفتها من سنة ..
كان معاها 3 عيال.
اوعى تقول لجوزها اننا اتقفشنا قبل كده..
ف بير السلم عند الواد بلال.
احنا ما عملناش حاجة ..
مش باقولك كنا عيال..

أحمد شاهين

معاني

معاني...

حلم؟

يعني فكرة من الوف

يعني تتحدى الظروف

يعني طريق مرسوم بسهم

-------

صح؟

كلنا صح مادام بجد

اصل ده مش ملك حد

بس الشاطر اللي ينجح

------

مبدأ؟

يعني طريق منه تبدأ

يعني لازم تكون مصدق

انك تقدر تحلم تحقق

-------

خوف؟

من ايه وليه واشمعنى

هي الحياة يبقالها معنى

من غير ما اشوف

------

عيب؟

سيبك يا عم ده عبط

لو عشت خايف م الغلط

هتفضل على طول غريب

------

دموع؟

يعني ضعف يعني يأس

وعشان تبقى عارف بس

كل الدموع نقطة رجوع

-----

حزن؟

اياك في يوم تسلم له

لو راح م الفرح ضله

راح يرجع تاني ويحن

------

صعب؟

كل حاجة بتيجي ع المهل

لو انت عايزه هيبقى سهل

بس لازم تتعب

-------

جراح؟

هو مين عايش مرتاح

بس كلمة السماح

بتخلي الحياة براح

------

الخوف م المقدر؟

يبقى البركة ف عم ريختر

زلزال مجهول المصدر

وهو ده الاخطر

احمد مصطفى

حلقه ال10 مساءّ على خلفيه اضراب 11/ 11

منى: طبعا باختصار اللى حصل ان فى مجموعه من الشباب عملوا اضراب يوم الحد 11 11 واحنا قدرنا نحصل على ميعاد مع واحد من مجموعه الشباب وهو الوحيد اللى محضرش الاضراب استاذ احمد مصطفى اهلا بيك
- احمد: اهلا بيكى يا مدام احنا من زمان نفسنا نطلع فى برنامجك
- منى: ميرسيه ده بس من زوقك ايه رئيك فيا وانا لابسه اخضر
- احمد: تجننى احسن من الابيض والاسود بتوعك اللى قرفتينا بيهم
- منى: بجد قرفتكو؟
- احمد: احنا جايين نهظر يا حاجه ما تخشي فى الموضوع
- منى: طيب بالراحه يا عم متزقش....ياريت الاول تفهمنا ايه عيش وحلاوه ديه...اصل محدش يعرف عنكو حاجه خالص
- احمد: عيش وحلاوه ده نشاط طلابي ابتدا بتمن طلاب فى هندسه القاهره من تلات سنين بالتحديد سنه 2008 وانتهى بردو بتمن طلاب هما هما يعنى كان بيجمعنا حلم واحد هو اننا نغير اللى بيحصلنا ده و نحاول نبقي ناس مفيده فى مجتمعها
- منى: ثوانى كده معلش ازاى تبقو ناس مفيده فى المجتمع
- احمد: اقولك يا ستى احنا قررنا اننا مش هنربط نفسنا بالشهاده عندك انا مثلا كنت فاتح محل موبايلات ومنفض للكليه عشان افيد المجتمع واديهم موبايلات كويسه وصالحه للاستخدام الادمى
- منى:معقول قدرت تعمل كده
- احمد: اه امال ايه هو احنا بنلعب
- منى: طيب وايه حكايه الاضراب ده بقي
- احمد: الاضراب ده احنا اعلنا عنه من سنه فى فرح سميه زميلتنا اللى هى حامل ديه وعملنا ايفنت عالفيس بوك وظبطنا كل حاجه وكان معانا 15 الف واحد عاملين اتيندنج للافينت ده ومع ذلك محدش جاه الاضراب... الاضراب ده كان عشان نعبر عن اعتراضنا على رغيف العيش البلدى اللى بقا بخمسه جنيه عشان كده عملنا الاضراب ادام فرن العيش اللى تبع وزاره الداخليه
- منى: اه عشان كده محدش اشترك معاكو
- احمد: فعلا افتكرونا مستنين العيش واللوحه اللى كنا ماسكينها افتكرونا هنجيب عليها عيش ده احنا فضلنا مضربين اسبوع والعيش بردو ماجاش
- منى: وبعدين يا احمد
- احمد: ولا حاجه حسينا بقا اننا لازم ناخد خطوه تانيه ورحنا عملنا اضراب على سلم نقابه الصحفيين واول ما وقفنا لقينا ناس جات وقفت جنبنا من غير ما تسئلنا انتو مين ولا عايزين ايه بس وفى الاخر جاه الامن واكتشفنا ان الناس ديه بتعرف تجرى ومحدش بيعرف يجيبهم فمحدش اتمسك غير العيش حلاويين
- منى: طاب احمد انت ليه مكنتش معاهم فى الاضراب ده
- احمد: مين قال ...انا كنت معاهم وهما واقفين عند الفرن ولما جينا نروح النقابه انا وقعت فى بلاعه مفتوحه و طبعا هما سابونى وقالو هنروح نعمل الاضراب ونبقي نعدى ناخدك واحنا راجعين
- منى: طيب يا احمد انت رحت زرت اصحابك
- احمد: ازورهم فين ده الدبان الازرق مش عارف يوصلهم
- منى: معانا مداخله الو؟ استاذ مصطفى ابراهيم العيش حلاوى بيتكلم من امريكا
- مصطفى:اهلا يا مدام منى
- منى: اهلا بيك تفسر بايه انك متمسكتش ساعة الاضراب وافرجو عنك على طول
- مصطفى:انا معايا جرين كارد يا حاجه يعنى اتخن تخين فى البلد ميقدرش يعملى حاجه...وانا فى امريكا الناس عارفننى كل ما اى حد يعمل اضراب يتصل بيا انزل احضر الاضراب واطلع...هى دى الحريه والديموقراطيه
- منى:طاب مش حرام عليك اصحابك اللى مستقبلهم ضاع دول تحرضهم عالاضراب وتطلع منها انت
- مصطفى: يستاهلو انا ياما نصحتهم ييجو معايا امريكا وهما مرضيوش وانا بحذر المسئولين ان السته المعتقلين دول لو مخرجوش انا هقوم الدنيا فى امريكا ومش هقعدها ولا ايه يا احمد
- احمد: اه طبعا يا مصطفى ده مى ومعتز وهبه عندهم امتحان المشروع كمان اسبوع
- مصطفى:انا بحذر لتانى مره لو ما افرجتوش عنهم الدنيا هتقوم مش هتقعد هنا فى امريكا وحبايبي بتوع الاضرابات نفسهم يخدمونى
- منى:شكرا على المداخله ومعانا تليفون تانى من السيد المسئول محمد محمد
- محمد: اهلا يا مدام منى
- منى:استاذ محمد ياريت تطمنا وتطمن اهالى المعتقلين على حالتهم الصحيه و النفسيه
- محمد: احب اقول ان المساجين دول تعبونا اوى... احمد شاهين خلقه ضيق وكل ما حد يقوله حاجه يرد يقوله انى اعترض وبيدور على تليفزيون يتفرج على ماتش الاسماعيلي...اسماء مكاوى ملهاش دعوه بحد وماشيه تلون فى الزنازين كلها....مى حازم منامتش من ساعت ما جات عشان قرفانه من الفرش مع انه زى الفل ولسه مجددينه السنه اللى فاتت...هبه بقي نايمه من ساعت ما وصلت حتى مش عارفين نستجوبها....معتز زكى الحمد لله اتصاحب على السجن كله
وده كان تقرير سريع عن شباب 11/ 11
- احمد: ابقا سلملى عليهم كلهم وقولهم انى مش ساكت عاللى حصل ده
- منى: الحمد لله اظن كده اهالى الشباب اتطمنو عليهم خلاص وشكرا على مداخلتك استاذ محمد محمد... ومعانا مداخله تانيه مدام سميه العيش حلاويه من شقتها فى الهرم
- سميه: الو ازيك يا منى وازيك يا احمد طول عمرك ابن محظوظه حتى السجن نفدت منه
- احمد: يعنى انتى اللى كنتى بايته عالبورش مانتى كمان زوغتى
- سميه: لا اخرس انا مزوغه بقرار جمهورى من بابا حسنى
- احمد: خلاص بقا اسمه بابا حسنى
- منى: ثوانى يا استاذ احمد انا مش عارفه اتكلم هو مين المذيع هنا
- احمد:طاب اتفضلي
- منى:احكيلي حكايه الافراج عنك يا سميه
- سميه:الناس لما عرفوا ان انا حامل فى التانى وعلى وش ولاده خلاص من قلبهم الطيب مسابونيش اروح المعتقل فخرجونى لحد ما العيل يروح المدرسه
- منى: ياااه
- سميه: اه اجازه رعايه طفل وانا من موقعى هذا احب اشكر الساده المسئولين على جهودهم الجباره فى المحافظه على الامن.....
- احمد: ايه ده يا سميه انتى بعتى دماغك؟
- سميه: بس يلا انت...احب كمان اقول انى معرفش الناس ديه وهما ضحكو عليا وخدونى معاهم بالعافيه
- احمد: بالعافيه يا سميه يا شيخه اتقى ربنا
- سميه: اتلهى بقا يا احمد خلينى اكمل كلامى
- احمد: لالالالالالالالالالا الا كده على فكره بقا انا هقول على كل حاجه وعالهوا كمان سميه ديه مش حامل ولا متجوزه حتى...وانا اللى ضاربلها الشهاده بتاعت الحمل ديه
- منى:؟؟؟ايه ده يا احمد
صوت طرقات عنيفه على باب سمية
- احمد: يعيش العيش حلاويييييييييييييين....عيش وحلاوه ونص رغيف .....
- منى:للاسف خلص وقت برنامجنا النهارده ان شاء الله نجيلكو بكره بحلقه جديده فى العاشره مساء

مانشيتات الصحف على خلفية إضراب 11/11/2011

قبل القراية

شكرا لابو سويلم صاحب الفكرة لما كتب مانشيتات يوم القيامة ومن بعده أشرف توفيق لما كتب مانشيتات الصحف بعد صدور كتابه .. ألف مبروك يا أشرف

بمناسبة مرور سنة بالتوقيت العيش حلاوى (9 شهور يعنى )فاليكم .. عناوين الصحف بعد القاء القبض على جروب عيش وحلاوة على خلفية اضراب 11/11/2011الذى دعوا اليه
حيث لم يحضر الاضراب سوى 7 افراد هم افراد جروب عيش وحلاوة ماعدا احمد مصطفى

الاخبار
-رفض شعبي عارم لاضراب الامس
-الاهالي بالمحافظات : لم نسمع بالاضراب الا بعد حدوثه

الاهرام
-الرئيس مبارك بقلبه النابض وحسه المرهف و بنظرته الثاقبة و بخبرته الطويلة وبحنكته المتاصله وخوفه على ابناءه من الوطن يصدر قرارا بارجاء القبض على -سمية لحين وضعها واتمام نفاثها

الجمهورية
-فى تصريحات خاصة للجمهورية .. حبيب العادلي يقول : والله لا نوريكوا يا كلاب

الدستور
ابراهيم عيسى يكتب انا معكم لمضربون-
the king still the king خالد كساب يكتب
-شاهين يخص الدستور برسالة من المعتقل : انا ليه ماطلعتش هيثم انا ليه مااسميش لؤى
-نص تحقيقات النيابة مع العيش حلاويين نهدينا لنهى العربي .. الدور عليكى يا نهى

الفجر
-الفجر تنفرد لماذا لم يتم القبض على مصطفى ابراهيم ... هل كان مصطفى جاسوسا ام ان له اقارب فى السلطة ام لجواز سفره الاخضر
-بالصور انحرافات معتز فى الساحل الشمالي

نصف الدنيا
-سمية ..صورة مشرفة للمراة المصرية .. لم يمنعها الحمل من الانخراط فى العمل السياسي
-سمية فى تصريحات خاصة لنصف الدنيا : لو جه ولد هاسميه عيش ولو جت بنت هاسميها حلاوة

الوفد
-الوفد تتعهد بدفع اتعاب المحاماة نيابة عن المتهمين
-صراع بين اباظة وجمعة على مين اللى يدفع الاتعاب

الاهالى
-اتصالات مكثفة لمعرفة عما اذا كان احد الافراد ينتمى للاخوان واذا ثبت العكس سندافع عن المتهمين بكل ما اوتينا من قوة

اخبار الادب
-تهافت القراء على ديوان احمد مصطفى وتراجع حاد لمبيعات ديوان مصطفى ابراهيم
-احمد فؤاد نجم يخص اخبار الادب بقصيدته الجديدة والتى يقول فى مطلعها.. اضربنا اكتر اضربنا عمر ماضربكوا راح يضربنا عن اضرابنا

الكواكب
-وحيد حامد يستعد لعمل مسلسل جديد بعنوان عيش وحلاوة

القناة لسان حال الشعب الاسماعلاوى
-الى احمد شاهين .. لا انت ابننا ولا نعرفك

الاسبوع
-هل كان سعد الدين ابراهيم وراء اضراب العيش حلاويين
-اسرار عدم مشاركة احمد مصطفى فى الاضراب .. هل كان خايف ولا ماكانش موافق على ميعاد الاضراب ولا وكان ف الساحل يوميها

الكرامة
-الاضراب وسيلة مهمة جدا لنيل الحقوق و التوريث خطير جدا
-هبة سيد تكتب للكرامة ... عملتها حركة كفاية

اخوان اون لاين
المرشد يدعو لمقاطعة الاضراب منعا للاختلاط وحبيب يدعو للمشاركة

يتبع بحلقة العاشرة مساءً